China Palai In Tlangpar Ralthluamkai Pawl A Tong – China in Asia palai thar ih an ruatmi Deng Xijun cun Myanmar ram sungih tlangpar ralthuamkai pawlkom 3 pawl a tong ih, neta khalah Myanmar ram sungih tlangpar ralthuamkai pawl biak vivo a tum ti’n thuhla theitu pawl cun an sim.
Tutiang ah China palai cun Kachin ralkap KIA, Wah ralkap UWSA le Kokang ralkap pakhat sawn NDAA pawl an tong zo ih thureltlangnak an nei. Hmailam khalah China palai cun Koang ralkap dang MNDAA, Shan ralkap SSPP, Palaung ralkap TNLA le Rakhine ralkap AA pawl khal hmaiton ih biak vivo a tum.
China palai cu KIA hmunpi , Wah hmunpi ah NDAA hmunpi pawl ah a feh ih an hotu pawl thawn thureltlangnak an nei. Ziang thubik an rel timi cu KIA, Wah le NDAA pawlin mipi theihternak an neih lo ruangah cipciar in theih a silo. Wah ralkap thuphuangtu cun “China palai thawn tonawknak kan nei ih thureltlangnak kan nei taktak ko. Kan thurelmi picang bik cu Myanmar ramsung buainak thuhla a si,” tin a sim.
An thurelmi cipciar phuan a silo tikah cipciar in theih a silo nan, thuhla theitu pawl cun Myanmar ram buainak, tlangpar ralthuamkai le US pehtlaihawknak, NUG le US pehtlaihawknak an rel ti’n an sim ve.
February 18 ah US khawpi Washington ah NUG ramdang zung lomnak neih a si ih, cumi ahcun NUG ramdang palai le US palai pawl hmaiton in thureltlangnak an nei. Cumi hnu reilo ah China palai cun Myanmar ih tlangpar ralthuamkai pawl a tong cih ve hngal. China palai cun tlangpar ralthuamkai a tonmi pawl hnenah NUG in US ih ramdang zung an neih cu tha a tilo thu a sim hai ti’n an sim.
China hi ralhrang tuantpi rerotu an si ih, NUG in China biak an tum rero lai khalah China lamin an ngaihsak lo. Tu ah NUG in US an biak tikah China lam an thik asia lole an thinphang tuk sipei maw titu khal an um. Ziangahtile ram pahnih USA le China hi leitlun ramdang ciahnehtu si dingin zuam aw rero an si ih,an karlak khalah buainak tampi an nei.
Ahleice in China in ralhrang tuanpinak tampi a nei ih, China in Myanmar ram sungin hlawknak tamzet an ngah. Hlawknak tamzet an ngahnak ram in US an biak tikah China lam daiten an ummen thei loin a lang tiah Myanmar Politics thlirtu pakhat cun an sim.
Myanmar Polictics thlirtu U Hla Htun cun “Tlangpar ralthuamkai lakin China ramri pawl hi China thawn pehparawknak nei hlir an si. China hnenin ralthuam siseh sum dawnnak tuah tampi khal an um. Ramri tlangpar ralthuamkai lakah china pehpar lo taktak an um lo. A hlan khalah China ramri ih tlangpar ralthuamkai le China palai pawl an rak tong aw theu. Tu ah US in NUG a dinpi, bawm theinak ah a phunphun in bom a tum.
“Culawng siloin US in Burma Act daan a neihmi khalah Myanmar mipi, tlangpar ralthuamkai le NUG bawm dan ding tivek a um. China in ralhrang an tuanpinak siseh tlangpar ralthuamkai pawl an tuanpinak khal US hnenah hloh an siang lo a sibik. Politics hi cu mipi theih lomi sunglam thuthup tampi a um. China palai in tlangpar ralthuamkai pawl a tonnak san cu US ruangah a sibik ko ding. China ih cangvaih dan cu lenglam men ih theihthiam ding rual a silo,ziangahtile ralhrang ralkap khal an be rero thotho. An hlawknak ding hlir an ruat a si,” tin a hmuhdan a sim ve.
Israel In Palestine 11 An Puah That – Israel ramri Palestine ram West Bank hmunram sungih Lions Den tapung pawlin Israel an hnaihnok ringring ruangah Israel lam cun Lions Den tapung pawlih umnak hmun bomb a thlak ih Palestine mipi 11 an thih phah ti’n Palestine cun thu an rak suah.
Israel ih bomb thlakmi ruangah Palestine mi 11 an thih tlunah hriahma naazet nga h 7 an um ih, hriamhma tenau ngah mipi 102 hrawng an um. Israel in LIons Den tapung pawl umnak hmun bomb an thlakmi ah tapung pakhat a thi ih, tapung pakhat dang a rak tlan man.
Paelstine mipi 11 an thih hnuah Gaza ihsin Rocket 4 a puak suak ih Israel ram a tlak man hlanah Israel lam cun Van boruak ah ran kap tla. Palestine ramsung Gaza khal hi Israel ram cimit duhtu Hamas tapung pawl umnak a si. Rocket kahsuak thu ah Hamas lam an phuang aw lo nan, Gaza cu Hamasa tapung pawlih ukmi a si tikah Israel lam cun Hamas pawlih cangvaihnak a siko ti’n an sim ve.
Israel in tapung umnak bomb an thlak ruangah Palestine mipi 11 an thih phah cu Jordan, Egypt, Saudi Arabi, UAE , Qatar le Turkey pawl cun Israel cangvaihnak an mawhthluk.
US cun “Israel hi anmah le mah humhimawknak ah an cangvaih a tul fawn, Israel cangvaihnak ruangah sualnak nei lo mipi an thih phah ih,mipi in hriamhma an tuar phah hi cu a poi tuk lawlaw. Curuangah, kannih US cun Israel le Palestine karlak ah remnak um dingin theitawk kan suah ding a si,” ti’n US palai cun a sim.
Leave a Reply