Chin ramkulh Paletwa myone Abaungtar khua kiangah Rakhine ralkap AA le ralhrang ralkap an kap aw tin khuami pawl cun an sim. Khuami pawl in meithal puak awn an theih hnuah ralhrang ralkap cun AA umnak hmunih an ruahnak hmun cu ralthuampi in an kap ciamco.
Abuangtar’ khua cu Paletwa khua in dunglam ah a um ih, khawpi thawn peng 4 hrawng a hla. An khua kiangkap ah AA pawl an um. AA le ralhrang ralkap cu may 26, zinglam nazi 10 hrawngah kap aw an si ih, ralhrang ralkap cun hlaral in ralthuampi thawn an kap bet. Ralhrang in ralthuampi thawn AA umnak an kah ruangah ziangtluk AA lamin an tuar timi cu theih a silo.
Khuami pakhat cun “Tutiang cu ralhrang lamin AA umnak dingih an ruahnak hmun cu Paletwa ralkap hmunpi in ralthuampi thawn an kap ciamco lai. AA le ralhrang an doawknak hmun cu Paletwa khua in nazi 1 sung hrawng lawngah thlen theih a si,” tin BBC a simthei.
Kan dung may 15, sun nazi 12 hrawng khalah AA cun Chin ramkulh Paletwa myone Tanthuang khua ih ralhrang sakhan hrang eiin phurtu ralhrang Helicopter cu a tumzawng ah an rak kap zo.
Paletwa peng Tanthuang khua cu Rakhine Ramkulh Myiuk Oo tlunih um khua a si ih, tivapi thawn naiaw te a si. Tanthuang khua kiang ahcun ralhrang pawl umhmun hnget zet an nei ih, an cangvai phah theu tin khuami pawl cun an sim.
Ralhrang helicopter a tumzawng ah AA cun khatlam in ralhrang Helicopter an kap ciamco. Ralhrang lam khalin an umhmun khuarnak ihsin AA pawl umnak hmunih an ruahnak cu ralthuampi 20 tlukin an kap ve. Hivek hnuah ralhrang cun Paletwa myone sungih AA umnak cu ralthuampi an kap salmi a si ih,a tufang AA le ralhrang karlak boruak a tha lo.
Tahan Ah Ralthuampi A Tla – Sagaing ramthen , Kalaymyo Tahan le Tuangphila vengah ralthuampi a tla ih, inn pahnih sungin thilri hrekkhat a siat phah. May 25, zan nazi 8 hrawngah ralthuampi a tla.
Tahan ,F Group Pi Lalhmachhuanni ih inn ah ralthuampi a tla ih, inn sung thilri tampi a siat phah. Ralthuampi a tlaknak luanglu a pop ih, inn sung coka lam thilri tampi a tlak siat. Tuangphila veng ahcun ah-htah-kah 2 tlawnginn kiangah ralthuampi a tla ve.
Tahan ih um pakhat cun “Ralhrang ralkap le mipi ralkap an do aw sipei maw tiah kan ruat lawk. Ziagahtile, meithal puak awn le bomb puak awn kan thei. A hnuah bomb puak awn ti ih kan theihmi cu ralhrang in ralthuampi an kahsuakmi a rak si. A ring tuk lawmmam ih, kan tih tuk. Neta ahcun doawknak khal a um lo, anmah ralhrang ralkap pawl hrosuang in meithal an puah,ralthuampi an kap suak men tin kan thei.
“Tu ahcun inn sungih um kannih mipi khal kan him nawn lo. Ralhrang ralkap in duhduh in ralthuampi an kap ih, ziangtikah kan inn ah a tla leh ding timi rel a theih nawn lo. Tuitum ih ralthuampi tla ruangah inntek khal hliam a ngah. Ralhrang ralkap cun an duhduh in ralthuampi an kap ih, a tlaknak ding hmun khal rel cia theih a silo. Curuangah, kan um a nuam thei nawn lo a si,” tin a sim.
Kalay Ralkap A Pe Aw – Sagaing ramthen Kalaymyo ih ralkap tuan Naing Win cu may 24 , zinglam nazi 7 hrawngah PDF kutah a pe aw ih a pekawknak san khal a sim. Naing Win cu kalaymyo ih ralkap tuan a sinan, kani lamah mipi ralkap do dingin an thlah ih,Kani a thlen ah tlansuak a si.
Mipi kutih a pekawk hnuah Naing Win cun “Thla 2 sung raldo dingin in thlah zo. Kalaymyo sung ahcun natchuang lamah mipi ralkap pawl thawn nasa ten kan do aw. Cumi hnuah Kani lamah in kuat. Khua kan nawkkang tivek cu tlunlam thupek a si tlangpi. Khatlam ahcun ralkap lam thi kan tam tikah mipi tihrimnak hrang khua kan nawkkang theu.
“Raldo dingin kan suah tikah ni 3 daih lawng eiin man in ken theu ih, cumi a cem tikah mipi thilri kan fir, kan laksak siko. Raldo dingin kan suah hnuhnu phone ken in siang lo. Raldo dingin kan suah tikah mi pakhat hrang cerek 500 in ken theu. Hivek in ralkap sungah nornak a tam tukih cumi ruangah ralkap sinak suahsan ka si,” tin a sim.
A Pa Aiah Kum 10 Pate Le A Nu An Kai – Yangon ramthen Insein myone Aungsan vengih Taxi mawng Myo Ko cu ralhrang ralkap mipum 20 hrawngin May 24 , sun nazi 2 hrawngah kai dingin an va panih, amah a rak um lo ruangah ralhrang cun a fa kum 10 mi le a nupi an kai.
An sungte pakhat cun “Fawm hruh lole fawm hruh ralhrang 20 hrawng an si. Myo Ko tei inn an kulh ih, Myo Ko a um lo ruangah a fa kum 10 mi le a nupi an kai. A thok ahcun a fa kum 10 mi lawng kaih an tumih, a nu in thlun lo theih loin a thlun ve,” tin a sim.
Ralhrang ralkap cun rampi thuneihnak an lak hnuah anmah dokalhtu ih an ruahmi cu an kai , hremnak an pe ih, an duhmi an hmu lo, an kai ngah lo asile an aiawh ah an sungtel pakhat khat an kai men.
Leave a Reply