Chinram Hrangah Ramdang An Tap

Chinram Hrangah Ramdang An Tap – Myanmar ram a buai hnuah nasaten ralhrang ralkap pawl do rerotu ramkulh pakhat ah Chin ramkulh a tel ve ih, Chin ramkulh hmun tinkim ah theitawk in ralhrang ralkap pawl do rero a si.

Chin ramkulh sungih ralhrang an do dan a takih hmuh duh ah ABC thuthanglatu Matt Davis cu Chin ramkulh ah a feh ih, CDF cangaih dan pawl a lak hnuah a him theinak ah a kirsal zo. Tu ahcun ABC thuthang cun Chin ramkulh sungih CDF pawl cangvaih dan leitlun hmuh an pholang ve.

Matt Davis cun India ram New Delhi khawpi in Mizoram a pan ih, Mizoram Aizawl khawpi a um sungah dothlengnak hrang zaihla hmangin theitawk suahtu Guys From Chin pawl a kawm. Guys From Chin sungtel Benjamin Sum , David le Thawng Bawi pawl cun Myanmar ram dinhmun cu Matt Davis hnenah an simfiang rero.

Matt Davis cun Aizawl khawpi in Chin ramkulh Thantlang peng sung a pan ih,CDF Thantlang in an rak mikhual. CDF Thantlang pawl thawn hmunram zohfelnak an neih ih, Thantlang kiangte tiang an thleng. Doawknak ruangah hriamhma ngah, kut le ke nei nawn lo, mitcaw tivek an tuamhlawmmi pawl khal Matt Davis cun a zoh phah thluh.

CDF Thantlang hmunram a zohkual theh hnuin CNA hmun khalah a feh ih, thil umdan pawl felfai zetin a lakhawm. CDF cun ziangtluk ralthuam an ttul timi cu Matt Davis hnenah an rak simthei ih, tuahcop ralthuam hmangin ralhrang do rero an si thu khal an sim.

CDF pawl cun ziangtik hmanah an beidong men lo ding thu le ralhrang ralkap pawl an neh hlanhlo ralhrang an do ding thu pawl an rak simthei. CDF lak ahcun CDM khal an um ih, tlawng phunsang zetzet kai nan, miphun hrangih pumpe aw tampi an rak um. Matt Davis cun Chin ramkulh sungih thilthleng a lakmi pawl ABC thuthang ih a thlah tikah rak zohtu leitlun mipi pawl cu mithli tla in an um thluh.

Matt Davis lakhawmmi zohtu pawl cun “hivek si leitlun in kan bom ding taktak. Ramsung ah nasaten an buai timi cu kan mithmuh a si ve thlang. An raltha tuk aw, an umdan le cangvaih dan zoh phah in kan mithli for rero. Myanmar mipi in nehnak co hram uh tivek in an tuarzia an tarlang.

UN Duhlonak An Langter – UN Myanmar palai Noeleen Heyzer in ralhrang hotu Min Aung Hlaing a ton thu ah Myanmar mipi an thinheng tukih, lamzawh duhphorhnak an nei.

UN Myanmar palai Noeleen Heyzer cun August 17 ah ralhrang hotu Min Aung Hlaing a tongih, mipi lakah ralthuam hmang nawn lo dingin, mipi inn urkang nawn lo dingin le kaihmi pawl thlah zalen thluh dingin a dil. UN Myanmar palai Noeleen Heyzer ih dilmi cu ralhrang lamin an pitlin sak hmel lo.

Myanmar mipi cun UN cangvaih dan an mawhthluk tukih, ralhrang hotu Min Aung Hlaing ton a ttulnak a um lo, NUG sawn tong ding nan si. Myanmar mipi hrang nan thinphan thu lawnglawng nan relsuak ih, ralhrang pawl mawhthluk in tutiang caan nan hmang, minung ziangzat an thih ahcun canvaih nan tum? kannih Myanmar mipi sawn UN hrang kan thinphang sawn a si tin’ lamzawh duhphorhnak an neihmi ah catar in an ausuak phah.

UN palai in ralhrang hotu Min Aung Hlaing a tong cu Myanmar mipi lawng siloin leitlun ngaihdan khal a silo tukih, ralhrang pawl cu biak menin remnak tuahpi theih sisehla Myanmar ram buainak a felnak ding caan a rei tuk zo tin an hmuh dan an sim.

Ralhrang In Khuapum In An Nawkkang – Makui ramthen Yesakyo myone Nga-ta-hmio (ငတမျှော်) khua cu August 17 le 18 ah ni 2 peh in ralhrang ralkap pawlin an luhcilh ih khuasung in inn tamsawn an nawkkang thluh.

Nga-ta-hmio khuami pakhat cun “Ralhrang rakap le Pyu Saw Htee mipum 80 hrawngin August 17,zinglam nazi 8 hrawngah ralthuampi in an kap ciamco. Cutikah kannih khua mipi pawl cu kan tilva pawl kan thlah hnuah zianghman la hman loin kan tlan thluh. Ralhrang kahsuakmi ralthuampi cun kan tilva hrekkhat a ngah that tlunah mipi inn tampi a kang phah.

“August 18 khalah ralhrang ralkap le Pyu Saw Htee pawl cun kan khua sungin inn pawl an nawkkang bet. Kan khua cu innkhi 600 hrawng kan si ih, inn 5 hrawng lawng a him in a lang. Phungki tlawng sungih fang le thilri pawl khal ralrhang ralkap cun an urkang thluh. Kannih khua cu lo hnatuan hlir kan si ih, buainak zianghman kan nei lo nan, hivek kan tong. Tu ahcun a remcan hmun ah kan beu hrih a si,” tin DVB thuthang a simthei.

Yesakyo PDF cun “Hivek in ralhrang pawlin mipi an nawkkang ih, khua an suahsamnak san ih lang cu mipi in PDF pawl bawm thei hlah haiseh timi an duhsan a siko. Mipi in anmai eiin le tulsammi an buaipi tikah PDF pawl an bawm thei lo ding tin an ruat. Nga-ta-hmio khua ahcun inn him a um lemlo ding a si,” tin a sim.

Myanmar Dinhmun Relcia Theih lo Titu RC Hotu – Myanmar ih RC hotu bik Charles Maung Bo cun Australia a tlawnnak ah a tufang Myanmar ram buainak cu a hnok tuk lawmmam ih ,zianghman relcia theih lo a si tin a sim.

Charles Maung Bo cun “Ralhrang pawl cu mipi ttih dingin an cangvai. Ralhrang pawl cun 2022 kum sung rori ah ramsung buainak tifel thluh an tum. An tumbikmi cu PDF pawl thianfai thluh a si ih, rapthlak tukin an cangvai vivo ding. Ralhang pawl cun duhtawkin mi an that dingih, mipi inn khal ren lo zetin an urkang ciamco ding.

“Tukhal ah ralhrang pawlin mipi inn an nawkkang tam tuk zo ih, mi tampi cu umnak ding nei lo vakvai khal an tam tuk zo. Myanmar ah inn nei lo ruangih harsa mipum ting 8 lenglo an um zo ih, an zaten bom ttul tuk hlir an si. Kan ram Myanmar buainak cu relcia theih a silo ih, a hnok tuk rori a si,” tin Vatican thuthang a simthei.

Russia In Kharkiv Khawpi An Kap – Russia le Ukraine doawknak cun remdaihnak lam a pan thei hrih lo ih, an doawknak a sosang deuhdeuh sawn. Crimea ih Russia ralkap hmunpi le vanzam sakhan a puak hnuah Russia lam anmahten an thinheng deuhdeuh ih, rorum sawn in Ukraine an kap.

Tuih dinhmun Russia le Ukraine doaknak cu Ukraine nisuahnak lam Donbas ramthen sungah a sinan, August 17 ahcun Russia ralkap pawlin Ukraine khawpi Kharkiv cu bomb zamthei in an kap ih mipi 7 an thih phah tlunah mi 13 hriamhma ngah an um.

Russia cun Ukraine an do pekte ah Ukraine khawpi bik Kyiv le Kharkiv khal bomb zamthei in an rak kap ciamco dah nan, duh vekin an hlawhtlin lo tikah an bansan ih, Ukraine nisuahnak lam sawn nasaten an do. Caan reipi hnu Kharkiv lam an kah nawn lo hnuah Russia in Ukraine nisuahnak lam lawng siloin Ukraine khawpi dang khal a kapsalmi a si.

Ukraine president Zelenskyi cun ‘Hivek cu san le vang um loin mipi an bat hrim rori. Mipi tuar ding zawngih cangvaihnak a si ih, ngaithiam theih an silo. Curuangah Russia cangvaih dan cu kan thungrul ve hrimhrim ding a si,” tin a sim.