Dalan Rinhlelh An Kaihmi 24 An Thlahsal

Ralhrang Mawtaw 10 In Chinram An Luhcilh – Ralhrang ralkap mawtaw 10 cun may 26, sun nazi 12 hrawngah Chin ramkulh Tedim peng sung an luhcilh ih, ke in hramlak an lut tin mit hmutu pawl cun an sim.

Ralhrang ralkap mawtaw 10 cu phurhmi nei loin an kirsal ih, ralhrang an phurhmi pawl cu Haimual thlan hlan Mualpi khua kiangah an tum. Mawtaw in ttum ralhrang pawl cu ke in hramlak ah an lut.

Hramlak ih lut ralhrang pawl ziang an tuah ding timi cu theih a silo ih,Tedim peng sungih mipi ralkap pawl an do ding sipei maw tin khua mipi cun an sim.

Dalan Rinhlelh An Kaihmi 24 An Thlahsal – Kaya ramkulh sungah ralhrang lamtang dalan ih rinhlelhmi mipum 24 pawl cu thutiamnak an tuahter hnuah an thlahsal thu KSCC cun mipi an theihter.

Kaya ramkulh sungih dalan rinhlelh kaihmi pawl cu mipi ralkap pawlin Kaya ramkulh mipi thuron pawlkom KSCC hnenah an ap thluh ih, an thuhla felfai zetin zingzoi a si hnuah KSCC in an thlahsalmi a si.

KSCC hotu cun “An zaten mipum 24 an si ih, kan thlah thluhsal. A tamsawn cu ralhrang hnenih thuthup simtu dalan rinhlelh in kaihmi an si. An zaten dalan an si taktak maw tin an thuhla felfai theitawk in kan zingzoi tikah ralhrang hnenih thuthup simtu dalan an rak silo ih, cumi ruangah hahdam ten kan thlahsal thluhmi an si.

“kan kaihmi zaten kan thlahsal thluh lo ih, thuhla felfai kan zingzoi hnuah ralhrang lamtang taktak an si ti ih felfai kan theihmi pawl cu kan thlah lo ih, kan retnak hmunah kan khum hrih lai a si,” tin a sim.

Rohingya Ruang 8 An Sar – May 24 le 25 ah Rakhine ramkulh Gua myone tipi kap ah Rohingya ruang 8 an sar. Ruang an hmuhmi hrekkhat cu sizung ah an kuat ih, hrekkhat cu khuami pawl in an vui cih.

Ruang buaipitu pakhat cun “Khuami pawlin tipi kapah Rohingya ruang 8 an sar ih, buaipi dingin kanmah in theihter. Ruang hrekkhat cu sizung ah kan kuat ih, ruang hrekkhat cu palik pawl in felfai zetin hminsin an tuah hnuah khuami pawlin an vuiliam,” tin a sim.

Ruang an hmuhmi pawl cu tipi par lawng cangsualnak ruangah thi an siko ding tin khuami pawl cun an sim. Rakhine ramkulh sungih Rohinguya pawl cu thupten Malaysia lut dingin lawng an to theu ih, lawng parah cangsualnak an tong theu.

Rakhine ramkulh in Ayeyarwaddy tipi lamah feh vivo an si ih, kan dung khalah Ayeyarwaddy tipi ah Rohingya raung 17 an rak sar zo. Rohingya ruang 17 an sarmi khal lawng cangsualnak ih thi an si.

Thupten Malaysia Lut Tum Myanmar Mi 26 An Kai – Thailand in Malaysia ih lut tum Myanmar mi 26 pawl cu Malaysia an luh man hlanah Thailand palik pawlin an kai ngah tin thu an suah.

Myanmar mi 26 pawl cu May 26 zinglam nazi 4 hrawngah Thailand palik pawlin an kai ngah. Kaihmi 26 lakah mipa 17 an tel ih, nunau 9 an si. Thailand palik pawlin an kaih hnuah covid 19 natnak an neih le neih lo an cek hnuah an khum cih ih, daan vekin hremnak an pek ding thu an sim.

Thailand palik ih kaihmi Myanmar mi 26 pawl cu Ayeyarwaddy ramthen, Rakhine ramkulh le Mandalay ramthen pawlin an si ih, thupten Malaysia lut dingin puaisa hnenah thailand tangka baht thawng 50 an pe. Kaihmi pawl cu Malaysia thing cetzung ah hnatuan dingin hruaimi an si.

Kaihmi pawl cun May 19 ah Myanmar an suahsan ih, Thailand ah thupten an lut. Thailand ram sung an thlen hnuah hramlak ah an relh ringring ih, may 26 ah Malaysia lut tum an si. Malaysia an luh man hlanah Thailand palik pawlin an kai ngah ih, khum cih an si.

Khua 1 Ah Mi 3 Ralkap An Lutter – Shan ramkulh, Pa’O mahte ukawknak hmunram khawte ṭhenkhat ah PNA ralkap (Pa-O National Army) cun khua khat ah mino 3 ciar PNA ralkap ah nan lut ding tin thu an pe.

Ralhrang SAC ralkap hnaṭuanpemi khawbawi pawlin PNO ralkap ah lutter dingin kum 18 ihsin 35 karlak mino hmin cazin an la rero zo ti a si ih, cumi sungin khua khat ah mino 3 fingfing suah cio dingin thu phut an tuah.

Cuhleiah Pa’O mipi humvennak hrangah tin innkhat ah kyat thawng sawmthum khongawknak a um tin khawmi pawl in an rel.

Hivekih hmalaknak an nei mi cu mipi lam in tha an pe lo hlei ah a dodaltu khal an um nan, tuahlo theihloin ralkap pawl in thuneihnak an suah tiah khawmi pakhat cun a rel.

“Mipi in kan duh lo kan ti khal le a theih lo. Ka pasal tla hmin cazin lakmi ah a tel. Kan neiaw pekte a si ih simrel ding khal ka thei lo.”

“Midang khalin an dodal nan a theih cuang lo. Kan nih mipi lam cun rampi a buai pek ihsin SAC ralhraang kan mawhthluk nan, PNO ralkap rualah SAC ralhraang lamṭang khal an um ve. Cupawl kha ralkap ah lutter sawn ding an si nan…..” ti`n khawmi pakhat cun a rel.

Kum 18 ihsin 35 karlak Pa’O mino pawl cu PNO ralkap ah lut tengteng dingin thu an phut hlei ah cuhnak ih upa cin cu khawsung humhimnak tuanvo la dingin hnaṭuan an ko.

An thusuah thlun duhlotu cu kyat 45,000 cawhkuan phut mi tla an um ti`n khawmi pakhat in a rel ve.

“Tuhrih tiang cu ralkap lut tengteng dingih hringhroawknak a um le umlo ka thei hran lo. Ralkap lutter dingin khawkhat ah mino 3 hrang camcawhfung an zukter. Ralkap lut ding cazin ih telmi pacangno ṭhenkhat cu naupai lai innsangnu pawl in lutter hram lo dingin ṭap phah in zangfah an dil nan a theih cuang lo. PNO lamṭang miṭhenkhat khal ralkap lutmi an um ve” tiah amahcun a ti.

Pa-O National Organisation in an ramsung khawte 4-5 hrawngah kan dungbai ihsin khawkhat mi 3 ralkap lutter an si ding thu, thuthannak an rak tuah zo tiah theih a si.

Russia In Ukraine Nisuahnak Lam Nasa Ten An Do – Russia in Ukraine nisuahnak lam Donetsk le Luhansk ramkulh sungin khawpi 40 lenglo may thla sung ah nasa ten an do ih, lak an tum tin Ukraine lam cun thu an suah.

Russia in nasa ten Ukraine nisuahnak lam an do ruangah Ukraine mipi 5 an thih phah zo ih, mi 12 hriam ngah an um. Innpi 47 rori Russia ralkap pawl cun an kap siat zo. Donbas ramthen sungin Russia ralkap cun Severodonetsk le Lysychansk khawpi pahnih cu nasa ten an kap rero zo.

Hivek in Russia ralkap in nasa ten Ukraine nisuahnak lam an do tikah Ukraine ralkap pawlin theitawk in Russia ralkap pawl an rak do ve ih, Nisuahnak lamih an doawknak ah Russia ralkap 62 an thi zo tin Ukraine cun thu an suah.

Russia cun thla 3 sung Uraine an do hnuah Ukraine khawpi bik Kyiv lak an tum nawn lo ih, Uraine ram sungin nisuahnak lam Donbas ramthen sung cu nasa ten an do. Donbas ramthen sungin Luhansk le Donetsk cu Russia president Putin in zalennak a rak pek zomi a si ih, Russia ralkap pawl cun a takin zalenter an tum.