Mipi Ralkap Veve An Buai – Makui ramthen Saw khawpi ah YDF cun dalan nan si tin’ August 21 zan nazi 8 hrawngah Khin Maung Lin tei sungkua an that ih, an thil hrekkhat khal an laksak. Sungkua 6 thi lakah nauhak 13 khal a tel. Yaw PDF pawl cangvai dan cu dothlengnak pawlkom 6 in an mawhthluk.
Dothlengnak Pawlkom 6 cun “Dalan thianfai timi hmangin YDF cun nauhak telin sungkua an that ih, an thilri khal an laksak tin’ kan thei. YDF cun thuhla an zingzoi fel hmaisa lo ih, inn rak um bawhlungsit zohtu tiang an that ngah phah. Hivek ih YDF an cangvaihnak ah kannih Saw hmunram sungih cangvai pawlkom 6 pawl kan tel ve lo timi khal kan tarlang duh.
“YDF cun dalan thianfainak timi hmangin August 21, zan nazi 8 hrawngah Khin Maung Lin tei sung an that ih, mi 6 an thih tlunah mi 2 hriamhma ngah an um. Mithi pawl cu Khin Maung Lin ( kum 61 ), a nupi Win Ngwe , A nau Zaw Hty ( kum 58 ), TV zoh men Aung Thein Win (Kum 52 ),an mo Khin Ma Thet ( kum 37 ), an tute Thet Aye Ngein ( kum 13 ) pawl an si. Hriamhma ngah pahnih cu Khin Aung Kyi le Myat Bung Khant Naing tei pahnih an si. Hizat mi an thah hnuah sui thilri, sumfai le mawtaw pahnih , phone le thilri dang pawl an laksak bet.
“Hivek a thlen ruangah kannih pawlkom 6 cun poi kan tituk. Ralhrang hotu Min Aung Hlaing le a kuthnuai pawl kan do rero laiah kum kim lo tiang thatin dothlengnak a saisual zawngih hmangtu pawl cu kannih pawlkom 6 in kan mawhthluk tukih, tuanvo neitu pawlin hremnak pe haisehla kan duh a si,” tin Saw mipi uktu, Laungsi PDF, Saw PDF, The Youth Force, Kyauk Htuh PDF le Korea Yaw pawlkom pawl cun thu an suah.
Yaw PDF cun “August 21, zan nazi 9:15 hrawngah Saw khua ih Pyu Saw Htee pawl meeting an nei tin’ thuhla kan thei ih, kannih YDF in fiah tumin kan pan tikah an rak kham aw ih, thihnak a thlen phah. Khin Maung Lin telin Pyu Saw Htee pawl cun vei tampi ralhrang hnenah thuhla an simthei ih, cumi ruangah mino tampi kaih an si zo. Pyu Saw Htee pawl cun duhtawk in mipi thilri an laksak ih, rittheihsi khal an zuar.
“Ralhrang in inn an urkang tikah an tel ih, ralhrang pawl khal sumpai an pe theu. Pyu Saw Htee pawl ih cangvaih dan cu mipi in kan hnenah vei 5 tlun in hek zo. Pyu Saw Htee pawl meeting an nei tikhal mipi hnenin kan theihmi a si. A hmun kan thlen tikah meeting ahcun Khin Maung Lin, Zaw Hty, Aung Hty Win, Aung Aung Lin , Yin NGwe, Khin Ma Thet pawl an rak um ih, sangka khar in thu an rel.
‘Kan va thlen tikah rittheihsi zuarnak ih an hmanmi a rak si. A sung kan luh tum tikah mi thenkhat an ra thlengih, in kham. Cutikah kannih YDF cun tlunlam ah meithal vei 4 kan hmetpuak. Cuvek khalah an dai duh cuang lo ih, inn sung um pawl khal nam kengin an suak ih, in sat. An lakah meithal keng khal an um.
“Lo theih loin kan kah ruangah Khin Maung Lin, Zaw Hty, Aung Thein Win, Yin NGwe, Khin ma Thet pawl an thi. Khin Maung Lin ih tunu te cun YDF pakhat ih meithal a laksak tum ruangah a hmet puak ngah ih a thi. Khin Maung Lin fapa cu a tlansuak ngah ih, ralhrang pawl a va ko. Ralhrang pawl an rat ruangah kannih YDF pawl khal kan tlansuak ve.
“Fiahnak hrang mawtaw 2, bike 2, phone 3 , tangka ting 3 le suithi pawl kan la ih, kan kol lai. Thuhla felfai kan zingzoi hnuah thilri pawl cu a neitu hnenah kan pe sal ding. A hnuah ralhrang pawl an thlengih duhtawk in meithal an kap ciamco. Kannih YDF lam cu kan him ih, nauhak a thih thu ah zingzoinak felfai sawn kan nei bet ding a si,” tin thu an suah ve.
US le S.Korea In Raldo Zirnak An Nei – USA le S.Korea cun thu an rak suah rero zo bangin raldo zirtlangnak a takin an nei ih, August 22 in an thok. Ram pahnih raldo zirtlangnak cu September 1 tiang nei ding an si.
S.Korea president Yoon Suk Yeol cun “Kan ram kilhim le him teih ret dingih kan tuanvo a si. Curuangah santhar raldo dan kan thiam a ttul ih, doawknak a um tikah a tuartu sisawn lo dingin kan zir. Cutilai in humhimnak thabik cu buainak tuah lo le hamdamten um thiam hi a si,” tin a sim.
N.Korea cun ram pahnih raldo zirtlangnak an neihmi cu tha an tilo tukih,kan ram N.Korea do in tum siko tin an sim. Cutilai in S.Korea lam cun midang do ding le midang tibuai zawngih raldo zir an silo thu, ram humhimnak hrang raldo zir an si thu an sim ve.
Leave a Reply