Daw Suh In Ralhrang Tummi A Theicia Thluh

Daw Suh In Ralhrang Tummi A Theicia Thluh – Ralhrang ralkap in rampi thuneihnak an lak ding timi cu a takin ralhrang pawl an cangvaih hlanah Daw Suh Kyi in a rak theicia thluh tin a tlansuah hnuah hmunhim ih thleng Daw Suh naivai ih hnatuantu U Naing Ko Ko in a relsuak.

U Naing Ko Ko cun “NLD cozah ah hlutdaw pawl caksawn ih an cangvaih theinak dingah theitawk in hna rak tuantu kan si ih, rampi hrilawknak hrang NLD ih thehlarnak ca pawl khal keimai rak ngan an si. NLD cozah sungah ramsung sumpai diklo dotu pawlkom hrang thuronpetu dinhmun khalin ka rak tel. Tu ah ralhrang lakin kan tlansuak ih, hmunhim ah ka thleng fel zo.

“Ka hmuhdan ka rel asile ralhrang in rampi thuneihnak an lak ding hi Daw Aung San Suh Kyi in a rak theicia thluh. Ziangahtile, 2018 lam ihsin ralhrang in rampi thuneihnak an lasal ding timi thu a rak suak zo. Daw Suh Vietnam ram ih a tlawn ttumah ralhrang in rampi thuneihnak an lasal asile ziangtin na tuah ding tin an rak sut ih, Daw Suh cun rampi thuneihnak la tumtu pawl sawn sut uh tin a rak let.

“Cumi hnu ihsin Yangon le Mandalay ahcun ralhrang in rampi thuneihnak an lasal ding timi a lar tuk zo. 2018 lai ihsin ralhrang in rampi thuneihnak an lasal ding timi thu a suak zo ih, a relsuaktu pawl khal an hmin ka rel thei thluh. Asinan, an hmin relsuak cu a mawi lo ding. 2018 kum ihsin mi 4 hrawng cun ralhrang in rampi thuneihnak an lasal ding tin an rak aupi rero zo. Daw Suh cun rampi thuneihnak an lasal asile an tuahmi parah mawh an phur ding tin a rak sim hai.

“Thu an suhmi kan rel asile rampi thuneihnak latu cun ziangkim mawh a phur dingih, kei cu rampi thuneihnak latu ding ka silo tin a rak let. Tu ah ka rel sal dingih ralhrang in rampi thuneihnak an lasal ding tin rel hmaisabiktu cu Yangon Stock Exchange of the Union of Myanmar ih hotu U Mya Tan a si. Rampi thuneihnak la dingin tawlreltu cu ralhrang bochukkyi Soe Thein a si. Hivekin ralhrang cangvaihnak thup pawl cu Daw Suh Kyi in a rak theicia thluh. Curuangah a tuahtu pawlin mawh an phur ding tin a rak let men.

“Ralhrang in rampi thuneihnak an lakmi ah ralbawi Soe Thein hi zatekin 80% tluk a tel ding. Ralhrang in rampi thuneihnak an laksaknak san ih lang cu an rothil pawl an hloh duh lo ih, sumpai hlawknak an duh. Tuih an rothil le hlawknak pawl hi an tulefa roh vivo an duh in a lang. Min Aung Hlaing siseh, Soe Thein le Shweman pawl khal Than Shwe thuron hmaisa loin cangvai ngam lo an si. Myanmar ah bochukkyi 10 hrawng an um ih, an zaten Than Shwe tih tuk hlir an si.

“U Ne Win in rampi thuneihnak an rak fehsan tikah a tawpnak lamzin a tha lo. Than Shwe in rampi thuneihnak a laksal tikah tutiang hahdamten a umlai. Cumi cu tuih bochukkyi pawlin an zoh ih, Than Shwe dung an thlun duh sawn in rampi thuneihnak an la in a lang.

“Tui dinhmun ahcun Myanmar mipi zatein ralhrang an huat thluk tikah ralhrang thurel ngam ding khal a si nawn lo. Daw Suh rori khal ralhrang thurelpi sehla Myanmar mipi in an hua thluh ding. Ramleng dinhmun kan zoh asile Russia, China le India ram pawlin ralhrang an dinpi tikah kan ram boruak cu a se vivo dingin a lang. Curuangah ziangkim a thar in kan fehpi a tul ih, dinthar kan tul. Uknak thar ahcun ziangkim ralkap khal mipi hrilmi an si thluh ding cu mipi duhmi a si. Mipi in nehnak kan co a si ahcun ralhrang hrang hmunram a um nawn lo a si,” tin a sim.

Ralhrang In Russia Card An Hmang Tum – Ralhrang ralkap cun Russia thawn sipuazi ih an tuannak ah ram pahnih hrang lamzin olsam dingin Russia tangka le Myanmar kyat hmantlang theinak dingah Myanmar ah Russia MIR card hman a si ding tin thu an suah.

Ralhrang thuphuangtu Zaw Min Tun cun “Russia ram thawn sipuazi lamih kan tuantlangnak ah ram pahnih ih Central Bank pawl khal an relkhawm rero zo. An relmi cu ram pahnih tuantlangnak ah ram pahnih tangka hmang tlang thei ding timi a tel. Curuangah, Russia ram ih MIR Card khal Myanmar ah hmang thei dingin theitawk kan zuam rero lai.

“Tuitum November thla ah Russia thawn kan tuantlangnak hrang tonawkkhawmnak kan nei ding. Cumi hlanah Russia MIR card Myanmar ram sungih hman theih dingin ziangkim buaipi fel kan tum. Cumi kan theh ahcun Russia Ruble le Myanmar Kyat duhtawk in kan hmang thlang ding a si,” tin September 20 ah media pawl a simthei.

Iran Ih Buaihak Ah Mi 5 An Thi – Iran ram Kurdish ah palik pawl cun nunau pakhat ceiawk dan ding kan tuahmi daan na thlun lo tin an kai ih, an kaihmi nunau cu palik kutah a thi.

Cumi ruangah mipi tamzet lungawilonak langter in lamzawh duhphrohnak an nei ih, Iran ralkap pawlin meithal an hmet puak tikah mi 5 an thi zo. Falam kum 22 mi Amini cu palik in an kaih hnuah palik kutah thi a si ih, mipi cu palik parah an lungawi lo.

Khawpi pakhat lawngah duhphorhnak an tuah lo ih, Iran khawpi hmun tinkim ah palik kutih nunau a thih ruangah duhphorhnak an tuah ciamco. Iran ralkap pawl cun lamzawh duhphorhnak neitu mipi lakin Saqes khawpi ah mi pahnih, Divardarreh khawpi ah mi pahnih le Dehgolan khawpi ah mi pakhat tin mi 5 an kap that zo.

Iran ram ahcun nunau in a ceiawk dan ding cozah thusuak a um ih, an hmai an khuh thluh ding an ti tlunah leitlun ramdang nunau pawlih hruhmi nunau thuamhnaw tivek khal hruh an kham. Fala Amini khala ceidan ruangah palik pawlin an kai ih, an hrem thatmi a si.