Daw Suh Kyi An Vuiliam

Ralhrang ralkap in rampi thuneihnak an lak hnuah ralhrang hotu Min Aung Hlaing cu mipi lamtang lamin duhduh in an tuah ih, vei tampi an rak thiter zo tlunah an vuiliam rero zo.

Ralhrang hotu Min Aung Hlaing zuk le taksa lem cu a phunphun in tuah a si theu. A cang le an dawi, a cang le an that ih, a cang le a thi tin an vuiliam. Hivek cu ralkap dinpitu pawlin zoh har an ti tukih ,tuitum ah Daw Suh Kyi an vuiliam ve.

June 19 cu Daw Suh Kyi kum 77 a kim ni a si ih, ramsung hmun tinkim le ramleng hmun tinkim ah Daw Suh Kyi kum 77 kim caan an lawm. Mandalay ramthen Patheinkyi myone ahcun ralhrang dinpitu pawlin June 19 zingah Daw Suh ih taksa lem khuag in an zawn ih, thlanmual ah an rak vuiliam ve.

Daw Suh Kyi ih ruang vuinak ahcun ralhrang dinpitu mipum 50 hrawng an tel ih, phungki 3 khal an tel ve. Cucu, ralhrang dinpitu pawl cun uangaw zetin social media lamah an tarsawng rero ve.

Tu ah rampi thuron Daw Aung San Suh Kyi cu a thi hrih lo ih, ralhrang in rampi thuneihnak an lak veten an rak kai. Ralhrang in khawiah Daw Suh Kyi an ret timi khal theih a silo ih, an kaih hnuah thubuai 19 lenglo an tuahsak zo. Thubuai 6 hrang kum 11 sung thawngtla dingin ralhrang cun Daw Suh Kyi cu hremnak an pe zo ih, thubuai 11 cu Court ah an rel peh rero lai.

KIA le PDF Tangtlang In Ralhrang 18 An That – Kachin ramkulh Myintsung kiangah KIA le PDF tangtlang cun June 18 ah ralhrang ralkap an do ih, doawknak ah ralhrang 18 an thi tin thu an suah.

Pata Oo lamin Myintsung lamih feh ralhrang pawl cu KIA le PDF tantlang in thuhla an theih cia bangin ralringten an rak bawhmi a si ih, ralring sawn le hmunram theisawn ih an do ruangah ralhrang thi an tam tin an sim.

PDF cun “Myintsung kiangah ralhrang mipum 100 tlun cu ke in an fehkhawm ih kannih cun bomb in kan rak puah. Cumi ah ralhrang 18 an thi ih, 37 hrawngin hriam an ngah. Cuveten ralhrang pawl cun ralthuampi an hmang ciamco cih hngal nan, kannih PDF le kan tuanpi KIA lam cu kan him.

“Ralhrang pawl Pato Oo in Myintsung an feh ding timi kan theih cia ruangah kanmah PDF sungin commando mithiam 5 le KIA lamin commando mithiam 2, kan zaten commando mi 7 lawng kan si. Hlaral in bomb puah kan si tlunah hlaral kahnak in kan kap ciamco ih, ralhrang lam cun mipum tamtuk ah in ruat. Cumi ruangah ralthuampi an hmang ciamco.

“Kannih cu ralhrang pawl an ra ding timi kan theih ruangah lamzin ah bomb kan rak kam ih, an thlen zawngah kan puah. Bomb kan puah hnuah cawl loin kan kap ciamco cih. Ralhrang lamin ralthuampi le vanzam an hman cin cun himdamten dung kan sip cih a si,” tin mipi a simthei.