Hakha Ah Ralhrang 6 An Thi – Chin ramkulh Hakha peng sungah ralhrang ralkap le mipi ralkap an do aw peh hrih ih, ni 3 sung an doawknak ah ralhrang 6 an thi tin Hakha dothlengnak pawlkom cun mipi theihternak an nei.
Hakha dothlengnak pawlkom cun “August 6 ah ralhrang pawl an suak ngam lo ih, an umhmun ah an buaipi aw. Cumi laifang ah kannih mipi ralkap lamin Drone in bomb 3 kan thlak ih, ralhrang pawl hriamhma ngah an tam. Kan Sniper kapthiam pawlin ralhrang pakhat an kap that.
“August 7 ah ralhrang lamin vei hnih in nor ih,ralthuampi in vei 15 tluk in kap. Doawknak a sosang tukih ,ralhrang 3 an thih tlunah kan sniper kapthiam pawlin ralhrang 2 an kap that. August 8 ah Hakha ih palik sakhan kan kap ih, ralhrang pahnih hriamhma an ngah. Doawknak ah kannih mipi ralkap lam kan him a si,” tin thu an suah.
Dawm Dip 1 Ah 125000 A Kai – Myanmar ram a buai hnuah thilri man a kai ciamco ih, cumi lakah lo hnatuan pawlih tul tukmi dawp khal dip 1 ah ting 1 le thawng 25 a thleng tin dawm zuartu pawl cun an sim.
July thla ahcun Dawp dip 1 ah ting 1 le thawng 5 a sinan, August 8 ihsin dawp dip 1 ah ting 1 le thawng 25 a thleng. Dawm phunphun a um ve ih, Minpian dawm cu ting 1 le thawng 5 in an lei thei lai. Dawm man lawng a kai lo ih, pangangsii man tiang a kai tikah lo hnatuan pawl an buai tuk.
Dawm zuartu pakhat cun “Buaithlak bik cu dawm cah kan harsat tuk zo. Tufang ahtla cun kan neih cia kan zuar hrih. Dawm cah dingin Thailand le China ah an ngenkung tukih, kan neih ciami khal a khungih kan zuar a tul ve. Dawr tinkim ah dawm man a kai thluh ih, laknak man a kai tuk ruangah a si,” tin a sim.
Lo hnatuan pakhat cun “A ngaihnak khal kan thei nawn lo. Dawm pek kan man laiah ruah a sur lo ih, ruah a sur tikah dawm man a kai ciamco ve. Tuih dawm dip 1 man cu a hlan vek asile dawm dip 4 a lei thei. Tu ahcun dawm man a khun tuk ruangah lo hnatuan thei lo khal tampi a um. Thenkhat cu dawm pek thei lo ruangah lo ih thlai an cinmi pawl tha thei lo khal a tampi a si,” tin a sim.
2020 ah pale dawm dip 1 ah thawng 24 man a si ih, 2021 ah thawng 6 lawngin dawm man a kai. 2022 ahcun dawp dip 1 ah ting 1 le thawng 25 a kai thlangih, hmun hrekkhat ahcun ting 1 le thawng 30 ih zuar khal an um zo tin lo hnatuan pawl cun an sim.
Ralhrang Lawng 2 An Kap Fuh Ih ,20 An Thi – Sagaing ramthen Mungzua in Chindwin tiva tluanih feh ralhrang ralkap lawng 4 cu August 7 ah mipi ralkap komkhawm in an rak kap ih, ralhrang 20 hnakin mal lo an thi tin DRPA cun thu an suah.
DRPA cun “August 7 ah Mungzua in Chindwin tiva lamih feh ralhrang ralkap lawng pakhat le ralhrang thilri phur lawng 3 cu kannih mipi ralkap DRPA, KGF, IA, Black Shadow le Pah-kah-phah pawlin kan rak kap. Ralhrang lawng pahnih kan kap fuh ngah ih, ralhrang thi an tam. Kannih mipi ralkap komkhawm lam cu thi le hriamhma ngah kan um lo. Doawk thluh ah ralhrang pawl cun ralhrang thi pawl cu Kani peng Yin khua ah an urkang ih ,ralhrang 20 tlun an thi tiah thuhla felfai kan thei a si,” tin DRPA cun thu an suah.
Ralhrang ralkap lawng pawl cu August 4 ah Mungzua suahsan in Chindwin tipi tluan zawh an si ih,Sagaing ramthen tlunlam ih ralhrang pawl hrang ralthuam le ralhrang eiin an phurhsak. Cumi ruangah mipi ralkap komkhawm cun July thla ihsin Chindwin tiva tluanah nasaten ralhrang ralkap pawl an do zo ih, Chindwin tiva ahcun mipi khalin ralhrang thi ruang an hmu phah theu.
Thla 1 Sungah KNU le Ralhrang 259 An Do Aw – Karen ralkap KNU cun July thla thlakhat sungah ralhrang ralkap thawn vei 259 an doawk thu August 9 zingah mipi theihternak an nei ih, ralhrang lamah BGF an ttan bangin KNU lam khalah PDF an ttang ve.
Thlakhat sung doawknak ah ralhrang ralkap le BGF lam 386 an thi ih, hriamhma ngah 260 an um. KNU lamin miraltha 12 an thi ih, hriamhma ngah 26 an um. July thlasung doawknak ah KNU hmunram 5-nak ah an doaw tambik ih, doawknak ruangah ralhrang pawlin mipi kaihmi le hremmi an nei tin KNU cun thu an suah.
Ralhrang ralkap cun July thlasung ah KNU hmunram sungin mipi 19 an that ih, mipi hriamhma ngah 26 an um. Ralhrang ih ralthuampi kahmi ruangah mipi inn 44 le biakinn pakhat a siat phah. Ralhrang pawlin mipi 49 an kai ih,mipi tamtuk hmundang ah an tlan. Mipi thi 19 pawl cu ralhrang in an kah thatmi, ralhrang ralthuampi ih tlak thatmi le ralhrang kammi bomb palpuak ngah ih thi pawl an si.
Rakhine Ah AA le ALP Boruak A Sosang – Rakhine ralkap AA in Rakhine party ALP ralbawi pakhat an kaih ruangah ALP khalin AA sungtel pakhat kan kai ve tin thu an suah.
ALP party in ralbawi Khine Kyaw Soe cun “Thuhla felfai kan ngah ih, AA sungtel a si fel ruangah kan kai. Tuitum ih kan kaihmi cu AA in kan ralbawi Khine Pawlin an kaih caan ah AA rak bawmtu a si. Sun nazi 2 hrawngah a inn kan pan ih, kan kulh thluh. Ka kaih tummi cu a tlansuak ih, lamlak ah palpuakmi a nei. Cutikah mipi lam an thinphang ih, meithal kan puah tin an rel.
“Kannih cu NCA hminkhen ngan kan si ih, ralthuam kan hmang ve lo. A tul a si ahcun palik le ralkap lam kan sawm men. Ziangvek pawlkom an sikhalle kan sungtel an kaih cun kannih khal kan cangvaih a tul ve. Cuvek cu kan tuah dingmi awm hrimhrim khal an si. Kan sungtel an kai asile an sungtel kan kai ve ding, Cucu kan tuah thiangmi a si,” tin a sim.
Kan dung August 2 ah ALP party sungtel ralbawi Khine Pawlin cu AA lamin an rak kai ih, tutiang an thlah hrih lo ruangah ALP cun AA sungtel pakhat an kai ve. Curuangah AA le ALP karlak boruak a sosang deuhdeuh dingin a langih, Rakhine ramkulh sungah mah le mah buainak suak thei dinhmun ah an um.
AA cu politics le ralthuam hmangin zalennak hawltu an si. ALP khal ralkap an nei ve nan, annih cu politics lamin remnak tuah duhtu sawn an si. ALP cun NCA hminkhen an ngan tlunah remdaihnak thurel dingin ralhrang hotu Min Aung Hlaing khal an rak be zo.
Korea Ih Tilik Ah Mi 8 An Thi – South Korea ram khawpi Seoul ah ti a lik ih, tilik ruangah mi 8 an thi zo tin Cozah cun thu an suah.
Ruahcen ringring ruangah tilik a si ih, tikhong ih tidai pawl khawpi sungah an lut thluh. Tiva ah tidai a tlem nawn lo ih, tiva ih tidai liam pawl cu khawpi sung tilik ah an cang. Lihong le ruahti khal tilik suaktertu an si ve.
Tilik ruangah tutiang mi 8 an thi zo ih, mi tamzet umnak cin theih lomi khal an um. Tilian ruangah hriamhma ngah khal an um ih, mi tamzet cu an inn umnak a that lo ruangah hmundang ih tthawnmi khal an tampi. August 9 tiangah tilik a zia-um thei hrih lo.
Japan khalin tilian an rak tuar ve ih, India ram hmun hrekkat khalah tilian tuar an um ringring lai. Myanmar ram, Shan ramkulh Mandung , Tachiliek le Yetsauh myone pawl khalah ti a rak lik ve ih, mi tampi hmunhim ah tthawn an si ve.
Shan ramkulh ih tilik ruangah mithi zat felfai in theih a silo ih, inn tampi umnak tha lo an um. Asinan, August 9 ahcun Shan ramkulh sungih tilik pawl cu ti a kang vivo ih, inn hrekkhat an thianfai thei zo.
FBI In Donald Trump Innpi An Luhcilh – US president hlun Donald Trump ih innpi cu FBI pawlin zianghman simcianak um loin August 9 zingah an luhcilh ih, Trump ih bulpak himnak khal an onsak.
FBI cun 2020 Jauary 6 ih thilthleng thawn pehpar aw in Donald Trump ih innpi luhcilh an si thu an sim. 2020, January 6 ahcun Trump dinpitu pawlin US tlangsuak thurelnak innpi an rak luhcilh ih buainak an rak tuah. Cumi ruangah US President hlun Donald Trump cu rinhlelh a si ringring phah.
Trump in US tlangsuak thurelnak innpi luhcilh dingin a mipi pawl a fial, a nor hrim si ding tin an zum. President hrilfel a si tikah Biden sawn a tlingih, Trump in US president pawl umnak Whitehouse innpi a suahsan. Cumi ah Trump cun president a tuan lai ih ca poimawh pawl Whitehouse ah tan duh loin a bulpak inn ah a keng titiang in Trump cu an ringhlel.
Tu ah US cu 2024 US rampi hrilawknak hrang zoin president a cuh ding timi thuhla a leng thok rero ih, Trump khalin a cuhsal tum tivek tiangin thuhla a suah tikah tuih US uktu pawlin Trump tibuai an tumcia khal sithei titu khal an um ve. FBI in Trump inn ah ziangtal an hmu maw timi cu mipi theihternak an nei hrih lo ih, Trump khalin thu felfai a phuangsuak hrih ve lo.
Leave a Reply