Ralhrang In CDM Tlawng Saya Thihdan An Pe – Ayeyarwaddy ramthen Myan Aung myone Htik Puk khua ih hramthok tlawng saya Kaung Khant Kyaw cu December 30 ah ralhrang ralkap in thihdan an pe tin a sungte pawl cun an sim.
An sungte pakhat cun “Dalan a that tin thubuai an tuahsak ih an kai. Dalan a that le that lo hman felfaiten an theih lo ih, fiahnak zianghman an nei lo. Kiangkap ih um cu rinhlelh hmangin an kai ih,rinhlelh thubuai hmangin thih dan an pe. Ralhrang in rampi thuneihnak an lak veten CDM rak tuah cih a si ih, ralhrang hnuaiah ca a zirh paih lo. Cumi ruangah an puh hrim khal si thei. Rinhlelh menin thihdan an pe cu kan theithiam lo lawlaw a si,” tin a sim.
Tapikung khua ih dalan hminthang pakhat cu 2021, October thla ah thah a si ih,ralhrang cun tapikung khua ih CDM tlawng saya Kaung Khant Kyaw cu dalan thattu ah an puh ih, an rak kai. Thawnginn sungih kum 1 an khum hnuah 2022,December 30 ahcun thi dingin a tlun thu an relcat sak. CDM tlawng saya Kaung Khant Kyaw cu ralhrang in thihdan an pek hnuah Hintada thawnginn ihsin Pathein thawnginn ah an thawn cih hngal tin a sungte pawl cun an sim.
Tamu Ah Nupa An Kap – Sagaing ramthen Tamu khawpi Nanphalung vengih lakphak dawr neitu tei sung cu December 30, zan ah an kap ih, naute tiang a dihmun a tha lo tin khuami pawl cun an sim.
Tamu ih um pakhat cun “Zinglam ah Pyu Saw Htee le ralhrang pawl hro an suang ciamco ih, bike pakhat ah mi pahnih nan phur aw lo pei, zohman kor dum nan hruh lo pei tin thu an than ciamco. Khuathim zawng ahcun lakphak dawr tuah Chit San Maung tei sung cu meithal in an kap ih, an fate tiang dinhmun tha lo a um. Annih Chit San Maung tei sungin zianghman tuah sual an nei lo, duhduh in mipi an kap men.
“Ralthuamkai pawl cu bike 4 in an phur aw ih, Chit San Maung tei sung an va kap. Tu ah U Chit San Maung tei sung cu sizung ah tuamhlawm rero lai an si. Ralthuamkai pawl hi Pyu Saw Htee an si rori ding tin kan ruat. Ziangahtile, lakphak dawr umnak cu PYu Saw htee le ralhrang pawl umna veng a si,” tin a sim.
Ralhrang Lamtang 7 An Thianfai – Sagaing ramthen Tamu District Myotit myone ah Tamu PDF cun ralhrang lamtang 7 an thianfai thei thu December 31 ah mipi theihternak an nei.
Tamu PDF cun “December 28 ah hmunram thianfainak kan nei ih, ralhrang lamtang SNA le pyu Saw Htee pawl thawn lamlak ah kan tongaw ih kan kap aw. A hmunah ralhrang Maung Zaw, SNA sungtel Win Aung, SNA ralbawi Tet Soe Naing, Pyu Saw Htee hotu Ngein Mg Mg, Pyu Saw Htee Kyaw Htu, Myo Thu le a dang Pyu Saw Htee pakhat pawl kan thianfai thei ih, an ralthuam khal kan laksak.
“Meithal zun 5 ,bomb le cerek tlunah ralthuam dang neuhneuh kan laksak thei. Doawknak ah kannih lam kan him. Tuitum ah kannih Tamu PDF, KNA le KCNDF pawl thawn ralhrang lamtang pawl kap kan si. Hmailam khalah tangtlang in ralhrang ralkap siseh ralhrang lamtang pawl khal kan thianfai vivo ding a si,” tin mipi an theihter.
Ralhrang Thi Ruang 59 An Hmu – Kachin ramri Sagaing ramthen Inndaw myone ah ralhrang thi ruang 59 hmunhat ah an urkangmi hmuh a si ih, ralhrang pawl cu Indaw doawknak ih thi pawl an si tin Indaw PDF cun an sim.
Indaw ahcun December 26 le 27 ah Kachin ralkap KIA le PDF komkhawm in ralhrang pawl an rak kap ih, ralhrang 59 an thi tin mipi theihternak an nei zo. Ralhrang pawl an um nawn lo hnuah doawknak hmun zohfel a si ih, ralhrang thi ruang 59 cu anmah ralhrang pawlin phur paih loin hmunkhat ah an rak urkang men.
Indaw PDF tuanvo neitu cun “December 26, zinglam nazi 10 hrawngah Indaw myone Khayan sat khua kiangah ralhrang thawn kan kap aw ih, December 27 ahcun Ale sat khua kiangah ralhrang pawl thawn kan kap aw. Kannih PDF le Kachin ralkap KIA kan tangtlang ih ralhrang 60 hrang an thi.
“Ralhrang thi pawl cu ralhrang nungdamlai pawlin an phur paih lo ih, mipi innsung ih an urkangmi le hmunkhat ah cangbawl thawn an urmi a um. December 30 ah doawknak hmunhma pawl kan hal ih, cumi ahcun ralhrang thi hmunkhat ih an urkangmi pawl kan hmu. Mithi ruang pawl cu ralhrang rori an si timi kan fiah thei ih, ralhrang thi ruang kan hmuhmi cu 59 a si.
“Ralhrang mipum 100 hrawngin ramri nor’n in kap ih, ralhrang 59 an thih hnuah ralhrang 60 dang an rawn thlah bet. Ralhrang 60 dang cun ralhrang nungdamlai 40 pawl cu an tlunpi hai. Tu ahcun ralhrang pawl cu khawpi lamah an feh thluh zo. Doawknak ih hriamhma ngah ralhrang pawl cu an tanta lo ih khawpi lamah tuamhlawm dingin an phur. Doawknak ah ralhrang pawlin tlunzuang raldonak an hmangih, miraltha PDF pakhat cun ram le miphun hrang a nunnak a hlan. PDF dang pahnih in hriamhma an ngah,” tin a sim.
Danglamnak Langter Ding NUG – NUG ramdang vuanci Daw Zin Mar Aung cun kum thar ahcun danglamnak taktak a um ding tin mipi theihternak a nei ih, Daw Suh dinhmun khal a rel.
Daw Zin Mar Aung cun “Ralhrang in Daw Suh an hrem hnuah an ret thei dan cu a hlan bangin acechuk a innpi sungah suak thei lo dingin an khum pei maw? thawnginn hmundang an kuat pei maw? lole an thlah zalen sal pei maw timi thu 3 lawng a um. Min Aung Hlaing in Daw Suh Kyi a thlah zalen ngam taktak pei maw timi cu ruah ding a um. Cutilai in ramleng nornak a tam tuk tikah danglam zet an tuah ruairi khal a si thei.
“Dothlengnak ah kan dinhmun kan rel asile kan dinhmun a tha vivo tin sim a theih. UN Security Council in tuah dingih ralhrang thu an pekmi hi thusuah men le mawhthluk men a silo. Palai zate lungkim ih an relcatmi a si tikah ralhrang in an thlun lo asile thildang an tuah thlang ding. UN Security Council zatein lungrual zetin ralhrang thu an then timi hi kum 74 sungah veikhat lawng a thleng. Culawng siloin American khalin PDF hmin tiang an hlam thlang.
“Curuangah ralhrang in kum 2 zik rampi thuneihnak an lak sungah hmunram tamzet an hloh ih, hmunram tamzet ah thuneihnak an fehpi thei lo. Cumi ahcun kannih NUG in fimzirnak le harhdamnak pawl nasaten kan fehpi ve. PDF hi dankalh pawlkom kan silo ih rampi ralkap an sisawn. Daan vekin kan dinmi a si ih, daan hnuaiah an cangvai. Curuangah ,Daw Aung San Suh Kyi suak bangta khal sehla PDF a huatnak in kan hmu lo. Ziangahtile, ralhrang lakin mipi humhimtu an si.
“Ramdang thawn kan dinhmun cu MYamar cozah ah in pom tin thu an suah lo khalle NUG palai pawl in bia ih thu tampi in relpi. Mipi thawn kan tuantlangnak an zohhliam rero ih ram tamzet ah zung kan ong vivo thei. Curuangah ramdang thawn kan karlak khal hmailam kan pan vivo. Ralrhang iin ramleng tlonnak ah hrilawknak tuah an tum ih,cumi rak beiseitu pawlkom thenkhat pawl cu neta ah thildang nan hmu nawn lo ding tin kan sim duh hai.
“Tuikum sungah theitawkin kan cangvai ih kan tummi lakin tamsawn kan tuah theimi khal a um. Ralhrang in duhtawkin mipi inn an nawkkang rero nan, mipi khalin tutiang an tuar thei ih,mipi rori in ralhrang uknak an do. Kan duh lo khalle tuikum cu a cem thlang ding. Kum thar ahcun a dik lomi beiseinak mipi pek kan duh lo nan, danglamnak thlenter rori kan tum. Kum thar sungah ralhrang pawl kan nuai cimit thluh rori ding tilam siloin dothlengnak ah nehnek co dingin kum thupi, ralhrang neh rori dingih do kum a si thu sawn ka sim duh.
“Kum thar ih kan cangvaih dan ding khal kan ngan thluh zo ih, tuanpi pawl thawn nan relrem rero zo. Kum thar ah ziang a thleng ding timi cu a thlen hrih lo ruangah rel ciamco ka duh hrih lo. Asinan, dothlengnak theh kum si dingin kan zuam ding timi cu mipi kan theihter duh. Tutiang ralhrang in dopitu mipi nan zate parah kan lungawi tuk , hmailam khalah lungrualten ralhrang do vivo ding kan si ih, kum thar cu kan zate hrang nehnak co kum,lungawi kum si hramseh tin duhsaknak kan hlan a si,” tin a sim.
Myanmar Democracy Hrang US In $136m Hmang Ding – US in 2023 hrang ramdang kilhimnak dingih sumpai an hman dingmi ah Myanmar Democracy hrang $136m an hmang tel ding tin US President Biden cun December 29 ah hminkhen a ngan fel zo.
American Maryland ih Chin pawlkom hotu pakhat Zotung Hmung cun “American in ramdang hrang sumpai an hman dingmi ah Myanmar Democracy hrang $136m a tel ve ih, president Biden khalin hminkhen a ngan zo. Bomnak tangka cu minungpi duhdawt zangfahnak, ralhrang uknak donak hrang le thansohnak phunphun hrang hman a si ih kan lungkim tuk tlunah kan lungawi tuk lawlaw. American in Myanmar Democracy hrang bomnak tangka a pek ding hi kan lungawi tuk nan, Myanmar ram Democracy a ngah theinak dingah tulsammi sumpai zat cu a si hrih lo,” tin a sim.
Bomnak tangka le thilri pawl hi Thailand ram sungin lak luh a si dingih Myanmar ram Democracy a ngah theinak dingah zuam rerotu NUG, CRPH, tlangpar pawlkom,CDM tuah le tlawingai pawlkom pawl khalin an hmang ding tin an tarlang. American cun Myanmar Democracy uknak hrang zuam rerotu tlangpar ralthuamkai le PDF pawl khal ralthuam silo thiamnak le santhar thilri thawn kan bawm ding tin Biden cun December 23 ah hminkhen a rak ngan zo. US in Santhar thilri le thiamnak thawn PDF le tlangpar ralthuaikai pawl kan bawm ding an timi cu mipi theih cak zetmi pakhat a si.
Saudi Arabia Club In C.Ronaldo An lalut – Leitlun bawhlung sitthiam lakih thiam hleice an timi pakhat C.Ronaldo khal club nei loin thla 1 tlun a um hnuah Saudi Arabia club Al Nassr cun an hnenih lek dingin C.Ronaldo an lakluh thu December 31 zingah mipi theihternak an nei.
Al Nassr cun an player thar lakluhmi C.Ronaldo cu kum 1 a hlawh hrang Euro 200m an pe ding tin media pawl cun an tarlang. C.Ronaldo in kum 1 ah euro 200m a hlawh felfai asile thla khatah €16.67M, Kar khatah €3.888M, Ni khatah €555,555 ,nazi pakhat ah €23,150, Minute khatah €386 le Second khatah €6.5 a hlawh ding tinak a si.
C.Ronaldo hi 2022 FIFA World Cup thok zawngah a club hlun Man United thawn remawklonak a phunphun ruangah kaphnih lungrual in an rak the aw. Cumi ihsin C.Ronaldo khal club nei loin a um ih, club phunphun thawn rel a hlawh. Club nei lo ih C.Ronaldo a um veten Saudi Arabia club All Nassr an lang hngal nan, C.Ronaldo an luk luh thei taktak zum a si rak silo.
Asinan, 2022, December 31 ahcun Al Nassr club cun an hnenih lek dingin C.Ronaldo an lak luh thu mipi theihternak an nei ih, 2025 tiang an hnenah um dingin C.Ronaldo cu remnak an tuahpi. Al Nassr club hi Saudi Arabia league ah vei 9 rak champion zo an si ih, tui dinhmun Table ah pahnihnak an si.
Al Nassr club cun “Kan hnenah C.Ronaldo lek dingin kan la lut thei hi kan club hlawhtlinnak ding lawng a silo ih, Saudi Arabia league, Saudi Arabia ram hrang hlawknak le thansohnak tam tuk pe theitu ding a si,” tin an sim. Al Nassr in C.Ronaldo an lak luh thu an phuan hnu ahcun soical ah thluntu Million nei tling lo khal Million thluntu an nei phah thlang.
C.Ronaldo cun “Ramthar le league thar ah ka lek ding hi ka phur tuk thlang. Al Nassr in an tumtahnak in simmi cun ka thinlung in neh tukih, an hrang lek ding kan phur tuk zo. Club ropi le hlawhtling an si theinak dingah bawmtu tha si dingin theitawk ka zuam ding a si,” tin a sim.
Hitin C.Ronaldo cu European Bawhlung sit zuamawknak, Champions League, Premier League tivek ah kan hmu thei nawn lo dingih , an club thar dinhmun ih zir in Asea Champions league tivek ah kan hmu thei thung.
Man United in tui season sung Champions league an lek thei lo ding ruangah C.Ronaldo cun Champions league lek thei club ah tthawn a duh tin thuhla a rak um hmaisabik. Club a thawn felfai man hlanah palyer leiawk caan a cem ih, cutin, C.Ronaldo le Man United a se vivo. Season thok hlan timtuahnak ah C.Ronaldo cu Man United ah a thleng thei lo. Season thok a si tikah Man United coach cun C.Ronaldo cu timtuahnak a neimal tin thelhbawh ah a toter theu. Cutikah C.Ronaldo khal a lungawi ve lo ih puai cem hlan tivek ah bualrawn a suahsan. Cutin, Man United le C.Ronaldo karlak boruak a se deuhdeuh.
World Cup thok hlanah C.Ronaldo cun interview picang a nei ih, cumi ahcun Man United par ih a lungawi lo thu, Man United coach parih a lungawi lo thu pawl a relsuak. Cumi hnuah Man United le C.Ronaldo an be aw ih,kaphnih lungkimnak in an then aw. Man United le C.Ronaldo an thenawk hnuah C.Ronaldo hi PSG ,Chelsea le club dangdang thawn thuhla a nei lawk nan, netabik ahcun Saudi Arabia club Al Nassr thawn remawknak an nei thei.
C.Ronaldo hin an ram Portugal thawn Euro Cup le Natioan Cup a cawi zo ih,club thawn laksawng lakmi tampi a nei zo. Bulpak in Ballon dO’r sui bawhlung vei 5 , Golden boots sui boot vei 4 le laksawng dang phunphun a ngah zo a si.
Leave a Reply