Karen Budish army DKBA cun hmailam ah ralhrang thawn an tuantlang vivo ding thu mipi an theihter ih, biakawknak cu thiltha a si tin an tarlang.
Ralhrang ralkap hotu Min Aung Hlaing cun tlangpar ralthuamkai hotu pawl ka tong duh tin thu a rak suah ih, amah tong duhvetu pawl hminpe dingin a theihter. Cumi ah tlangpar ralthuamkai le pawlkom 10 cun hmin an pe ih, hminpe pawlkom 10 lakin pawlkom 9 cu Min Aung Hlaing in a tong zo ih, SSPP hotu pawl thawn an tongaw peh ding.
Ralhrang hotu Min Aung Hlaing cun Shan ralkap RCSSA, Mon Party NMSP, Karen remdaihnak KNLA PC, Rakhine Party ALP, Pa Oh ralthuamkai PNLO, Wah party UWSP, Kokang ralthuamkai NDAA le Karen budish ralkap DKBA hotu pawl cu a hran tetein thu a relpi thluh zo.
Min Aung Hlaing cun amah tongtu pawl cu mahte ukawknak le hmunram thansohnak a rak tiam hai ih, hmailam khalah remdaihnak hrang thureltlangnak kan nei vivo ding tin a rak sim thei hai. Cucu, Min Aung Hlaing betu tlangpar ralthuamkai le pawlkom hotu pawl cun an lung huaiho lala.
Kachin ralkap KIA, Chin ralkap CNA, Karen ralkap KNU, Rakhine ralkap AA, Palawng ralkap TNLA, Kokang ralkap MNDAA le Kaya ralkap KA pawl cun ralhrang hotu Min Aung Hlaing an biak lo ding thu mipi theihternak an nei rero zo.
Tu ah Min Aung Hlaing cun amah tong hrih lo tlangpar ralthuamkai le pawlkom pawl khal amah tong dingin a sawm nonsal ih,tutiang ahcun Min Aung Hlaing tongsal dingih hminpe thar zohman an um hrih lo.
Ralhrang Bawi An Kap That – Karen ramkulh Tantaung khua lanzung ah mipi sukso vak pawl cek rerotu ralhrang pawl senthum cu Tantuang PDF in Sniper in an kap ih a hmunah a thi tin thu an suah.
Lanzung ahcun ralhrang pawlin mipi sukvo vak ,khualtlawng vak le poimawh thu ih suak hrimhri an cek ih, mipi hrang caan heu in an hngah a tul theu. Ralhrang pawl ruangah mi tampi an tlai phah, an duhmi tuah ngam lo phah an tam ih, ralhrang pawl umdan cu buaihtlak an ti ngaingai.
A hmunih um pakhat cun “Lamzin ah duhtawk in mipi an cek ih, tong thiam tuk lo tivek cu an tibuai duh cuang. Hivek ruangah mipi khal an buai phah tuk. Curuangah mipi ralkap lamin an thianfai siko. Mipi ralkap in Sniper in an kap ih, ralhrang bawi senthum a thi tin thuhla kan thei ve. Hivek ruangah ralhrang pawl an tuarna tukih nasa ten kiangkap an cek, an buai ciamco ve,” tin a sim.
PDF 17 An Kom Aw – Sagaing ramthen sungih cangvai PDF 17 pawl cu ziangkim ah tuantlang dingin le bawm aw dingin lungrualnak hminkhen an ngan ih, an kom aw tin mipi an theihter.
Komkhawm aw 17 lakih tel Mungzua PDF hotu cun “Remnak kan tuahmi cu ralhrang ralkap uknak cemrel ko do ding ti a si ih,remnak tuahtu kan zaten a tul caan ah ralthuam in siseh mipum khalin bawm aw thluh ding kan si. Cumi lo thildang cu pawlkom pakhat le khat tlaksamnak theithiam aw tonin khat le khat bawm aw dingin le ralhrang uknak lungrual ten dotlang dingin timi pawl an tel.
“A thok ahcun umnak ciar ah ralhrang uknak kan do ih, duh vekin kan thazang cak lo tlunah kan hmunram a kau thei lo. Tu ahcun thazang tamsawn le ralthuam thasawn in ralhrang kan do vivo ih, kan hmunram kauh vivo kan tum a si,” tin mipi a simthei.
Sagaing ramthen sungih cangvai PDF kom aw 17 pawl cu People’s Defence Force – South Monywa၊ Black Dragon – Special Task Force၊ Anyar Defence Force (A.D.F)၊ God of Monywa People’s Defence Force၊ Red Eagle People’s Defence Force၊ Golden Eagle Force – Monywa၊ Monywa Fighter Group (MFG)၊ Excellent Flag Force၊ G.P.D.F People Revolution Army၊ Dragon Brother People Defence’s Force၊ Zayar-7 Sagaing-ARA၊ Black Wolf People Defence Force၊ Monywa Ranger Group Truth Army၊ Monywa Red Peacock၊ People’s Defence Force-Yar Za Than၊ Springs Dove le C.D.F & S.R.A pawl an si.
Leave a Reply