Ralhrang ralkap in Karen ramkulh ih AA sakhan bomb an puahmi ah AA ralkap 6 an rak thi ih, AA cun Rakhine ramkulh sungah ralhrang pawl phuba sam in, an do ve.
2022, July 18, zinglam nazi 9 hrawngah AA cun Rakhine ramkulh Maungtaw myone , Saung Pangia khua le Dung Kala khua kiangah hmun 2 in ralhrang ralkap an do ih, ralhrang thi an tam tlunah ralhrang 14 nungdam in kan kai ngah tin thu an suah.
AA thuphuangtu Khai Thukhah cun “Rakhine ramkulh sungah ralhrang thawn kan do aw timi cu a dik ko. Ziangruangah ralhrang thawn kan do aw ti asile doawknak um riai loin Karen ramkulh sungih kan sakhan pakhat cu ralhrang pawlin bomb in thlakih, kan ralkap 6 an rak thi. Cumi phuba laknak hrang tuitum ah ralhrang do kan si.
“Doawknak ahcun ralhrang le ramri kil pawl an tangtlang ih, AA miraltha rual pawlin an kap. Doawknak ah ralhrang thi an tam ih, ralhrang 14 pawl cu an ralthuam an ret hnuah kan hnenah an pe aw. Ralhrang Pistol 2 ,meithal zun 10 tlun le ralthuam dang neuhneuh khal kan laksak thei.
“Tu cun Rakhine ramkulh hmun tinkim ah doawknak suak thei ringring a si ih,mipi cu ralhrang ralkap umnak naivai ah um lo dingin kan lo theihter duh. Hramlakah caw le naa khal hrih hlah uh. Ziangahtile, doawknak kiangkap ah ralhrang pawlin bomb kammi an nei ringring. Ralhrang pawl cu mipi tuar ding zawngih canvai thei an si ruangah mipi lam kan ralrin ngaingai a tul ding.
“Tufang cu rampi huapin ralhrang do a si tikah ralhrang pawl an haidaih aw lo zetih raldonak vanzam le Helicopter an hmang tam. Curuangah,Rakhine ramkulh sung khalah ralhrang pawlin raldonak Helicopter le raldonak vanzam an hmang thei ih, mipi kan fimkhur ngaingai a tul a si,” tin a sim.
Doawknak ruangah ralhrang ralkap pawl cun duhtawk in kiangkap an kap ciamco ih, kiangkap ralhrang hmunpi pawl khalin ralthuampi an rak kap ciamco ve. Ralhrang lamin duhtawk in ralhtuampi an kah ciamco ruangah kiangkap khua in mipi tamzet cu khua ah um ngam loin an tlan phah thluh.
Khuami pakhat cun “An doawknak hmun cu kan khua thawn naite a si. Ke in kan feh asile minute 10 hrawng lawng a rei ding. Doawknak ruangah bomb puak ih meikhu khal kan hmu ban. Ralthuampi puak awn siseh meithal puak awn khal kan thei ban thluh. Doawknak ruangah khua mipi hrekkhat cu tlawnginn ah an relh ih, hrekkhat cu khuadang ih feh khal an um,” tin a sim.
Sri Lanka president Hrilnak An Fehpi – Sri Lanka ram president Rajapaksa cun president sinak in bannak ca a thehlut hnuah president thar hrang hrilawknak an fehpi thok.
Sri Lanka ram hlutdaw palai hotu cun “Hruaitu thar hrilawknak cu thate ih fehpi kan duh ih, a cangthei ding asile zarh khat sungah theh fel rori kan tum a si,” tin a sim.
Sri Lanka ram presdient thar an hril fel hlanah a hlanih Prime minister hna rak tuantu in president sinak a kai sung. Mipi cun Prime Minister khal president vekin bangseh tin an phut ve. Mipi cun president thar le Prime Minister thar neih rori an duh.
Leave a Reply