Doawknak Ruangah Ralhrang In Natchuang Khua An Nawkkang Bet

Sagaing ramthen Kalaymyo thlanglam Natchuang kiangkap ah ralhrang ralkap le mipi ralkap komkhawm pawl an do aw ih, doawknak ruangah ralhrang ralkap cun Natchuang khua an nawkkang bet tin Kalay PDF cun thu an suah.

Kalay PDF cun “A liam zomi ni 4 sungih Kalaymyo kiangkap doawknak thuhla cu a hnuailam bangin kan tarlang duh. May 28 ah Ralhrang ralkap mipum 50 hrawngin Kalaymyo thlanglam Yankyi Aung khua lam an luhcilh ih, zinglam nazi 9 in sun nazi 12 tiang kannih Kalay PDF, CNDF le CDF KKG pawl thawn kan do aw. Doawknak ah ralhrang 3 hrawng an thi.

“Khatlam ah ralhrang ralkap cun Htuak Kyan khua lamih PDF tatyin pahnihnak sakhan cu mipum 200 hrawngin an luhcilhi ih , PDF pawl ih bomb kammi puak ruangah ralhrang thi an tam ding. PDF pawl cun sakhan cu an rak suahsan fel zo ih, ralhrang pawl bomb an puah.

“May 29 ah kalay PDF tatyin pahnihnak pawl ih suahsanmi sakhan cu ralhrang ralkap pawlin an suasam ih, ralhrang ralkap pawl cun Zawlpi khua in inn 3 an nawkkang phah. Inndang hrekkhat khal an bauh vivo ih, midang lo pakhat an that. Hivek ruangah Thung-ing suh khua kiangah ralhrang ralkap pawl bomb kan puah ih, ralhrang thi an tam.

“May 30 ah ralhrang ralkap pawl cun Tung-ing suh khua in inn pawl an nawkkang ih , Li-ing suh lam an fehzawng ah kannih Kalay PDF cun bomb kan puah. Bomb puak cun ralhrang mipum 20 hrawng a ngah ih,ralhrang pawl cu Myohla lamah an feh vivo. Nikhat lawngah ralhrang mipum 200 hrawng cu Kalay thlanglam ah ral an tho ih Htauh Kyan ah an riak.

“May 31 ah Htuak Kyan ih riak ralhrang pawl cu Natmyiang lamah an feh vivo ih, kannih Kalay PDF cun bomb kan puah bet. Sun nazi 2 hrawngah ralhrang pawl cun Natmyiang khua le Natchuang khua an luhcilh ih, kannih Kalay PDF, CNDF, CDF KKG le pumpe aw pawl cun minute 30 tluk ralhrang kan do. Doawknak ah ralhrang 1 a thi. Ralhrang lamin ralthuampi an kap ciamco ih Natmyiang khua in inn hrekkhat a kangih, phungki tlawngih um nauhak kum 5 mi telin raltlan mipi 4 in hriam an ngah phah. Ralhrang ralkap pawl cu Natchuang khua suakthuan tlawng le phungki tlawng ah umhmun an khuar ih, khawmaw rualin Natchuang khua an nawnkang bet a si,” tin thu an suah.