Dr.Sasa In Ralthuam Thu Ah Mipi Thu A Tiam – NUG cozah in ramdang palai pakhat Dr.Sasa cun tuini tiang mipi ralkap lamin ramdang hnenin ralthuam an ngah lonak san simfiangnak a nei ih, Yangon lak thluh a si tikah ramdang hnenin ralthuam kan dong ciamco ding tin’ a sim.
Ralhrang in rampi thuneihnak an lak hnuah NUG cozah hmin in nasaten ramleng dawrtu Dr.Sasa cun “Ziangruangah ramleng in tuini tiang ralthuam in bawm hrih lo ti asile Yangon khawpi kan lakfel thei hnu lawngah ruah bangin ralthuam a sur thlang ding. Cucu, keimah in ka lo tiam a si,” tin TNV thuthang a simthei.
Kan dung zarh ah Yangon mipi ralkap komkhawm cun kum 1 sung tumtahnak nei in yangon lak an tum thu mipi theihternak an rak nei zo ve ih, cangvaih tumdan phun 3 an nei. A thok ahcun Yangon hmun tinkim ah bomb puah in ralhrang do an tum ih, pahnihnak ahcun bomb puah tlunah meithal kengin ralhrang do an tum. Pathumnak ahcun anmah Yangon mipi ralkap lawng si nawn loin tlangpar ralthuamkai pawl thawn tangtlang in Yangon ih ralhrang pawl kan do ding tin’ mipi an rak simthei.
Tu ah yangon mipi ralkap komkhawm pawl cu bomb puah cangvaihnak ah an umlai ih, pahnihnak dinhmun bomb puah le meithal hmangih ralhrang do hram an thok thei hrih lo. Bomb puah hnuah meithal hmangih ralhrang an do ciamco hnuah pathumnak hrang tlangpar ralthuamkai pawl thawn tangtlang in Yangon khawpi la tum an si.
Ziangtikah Yangon khawpi lak an tum timi khal a ni le caan cekci rel a theih hrih lo tin an sim ih, a malbik kum 1 lole kum 1 le hrek tal cu caan pek a tul ding tin an sim.
Paletwa Ah Fangfai Dip 1 Ting 1 A Thleng – Ralhrang ralkap pawlin Chin ramkulh Paletwa in hmundang ih fehnak tipar lamzin an phih ruangah Paletwa ah thil a thleng thei nawn lo ih, thilri man ziangkim a kai thluh tin mipi cun an sim.
Paletwa ih um pakhat cun “Tuih dinhmun ahcun fangfai tha cu dip 1 ah ting 1 a ngen. Fangfai thaw lo, se deuh pawl cu thawng 50 ngen khal an um. Fangfai dip 1 ting 1 an ngenmi khal thleng thar a um thei nawn lo. Datsi lei ding a har ih, a man a kai tuk lawlaw. Ralhrang pawlin Paletwa in khawpi lamih thilri phurhnak tipar lamzin an kharmi cu zarh 3 a kim thlang.
“Cutikah Paletwa khawpi ih dawr nei pawlin thilri an cah thei nawn lo ih, zuar ding an neih nawn lomi khal a tam thlang. AA le ralhrang an doawk ruangah ralhrang cun tipar lamzin an phit thluh. Tu khalah AA le ralhrang boruak a sosang zetih ralhrang pawlin raldonak vanzam an hmang pang ding kan phang tuk a si,” tin a sim.
Kalay Ah Ralhrang In Mino Pakhat An Kap That – Sagaing ramthen kalaymyo ah ralhrang ralkap cun an umhmun khuarnak kiangih vek men mino pakhat an kap that.
Kalamyo Sanmyo veng ahmat 8 tlawnginn sungih umhmun khuar ralhrang ralkap pawl cun tlawnginn kiangih bike mawng mi pahnih cu zan nazi 7 hrawngah an kap ih, Lin Lin Naing ( kum 21) sawn cu a hmunah a thi cih. Lin Lin Naing cu a rualpi tei inn ah riak dingin feh a si ih, ralhrang pawlin a bike an hmuh tikah an rak kap that.
Thuhla an theih veten a sungte pawl cun ruang lak an tum hngal nan, ralhrang pawl khuasung an hel lai caan a si ih, ralhrang tih ah an feh lohli thei lo. A hmun an thlen thei caan ah a ruang cu sizung ah an fehpi ih, inn an thlenpi tiang bike cangsual ih thi ah an ruat hrih. Asinan, a taksa an zohfel tikah a hngawng ah meithal ih kahnak a rak um.
Lin Lin Naing cu Kalaymyo in Yangon ah sammeh zirsuak a si ih, Yangon in Kalay a thlensalnak ni 5 fang lawng a si hrih. Kalaymyo ah sammehnak dawr ong dingin dawr a sang zo ih, thilri tulmi pawl khal a lei thluh zo. Asinan, a dawr ih a to man hlanah ralhrang pawlin an kap that.
2022, February 1 khalah ralhrang ralkap cun an umnak kiangih bike mawng CDM sayamah an rak kap that zo. CDM sayamah cu sun padir ah an kap that. Tuih mino an kah that caan khal zan nazi 7 lawng a si hrih.
Pyu Saw Htee Hotu An That – Mandalay ramthen Mattaya myone Zua-dtan khua ih Pyu Saw Hte hotu cu mipi ralkap komkhawm in an thianfai ih , kuttuah meithal le bomb an laksak.
Mattaya PDF hotu cun “Ralhrang tuanpi Pyu Saw Htee hotu a si ih, amah in meithal a kol bangin bomb tiang a rak nei. Asinan, a cangvaih man hlanah kan kap that ih, a meithal le bomb khal kan laksak.
“A hmin cu Thein Htun tin an ko. Ralthuam a neih tikah hro a suang ngaingai ih, Pyu Saw Htee hotu a sinak ah mipi hronak ah a hmang. Cutikah mipi lamin an tuar thei nawn lo ih, kan hnenah thuhla in simthei. Kannih khal mipi ralhrang cangvaitu kan si bangin ralhrang tuanpi le mipi hnaihnoktu cu a rangthei bikin kan thianfai cih. Pyu Saw Htee dang pawl khal ralhrang an tuanpi ih, mipi an hnaihnok vivo a si ahcun an phutawk hremnak an hmu rori ding a si,” tin a sim.
Mungzua Ih Ralhrang Sakhan An Kap – Sagaing ramthen Mungzua le Mandalay karlak lamzinpi ih ralhrang sakhan pakhat cu August 15 zingah mipi ralkap komkhawm in an kap ih, ralhrang 6 an thi tin thu an suah.
Chindwin Attack Force cun “Kannih Chindwin Attack Force le Mungzua The Boys hohanak in mipi ralkap komkhawm cun August 15, zinglam nazi 2 ah Mungzua lamzin ih ralhrang sakhan kan kap ih,minute 45 sung doawknak ah ralhrang 6 an thi. Ralhrang thi cu 6 hnakin an tam thei lai ih, zingzoinak kan nei peh rero lai hrih. Doawknak ah ralhrang pawlin ralthuampi an hmang ciamco ih, kannih mipi ralkap lam cu himdamten dung kan sip thei.
“Kannih mipi ralkap komkhawm pawl cu Chindwin Attack, Mungzua the Boys, Mungzua PDF, NPRF le Special Army pawl kan si,” tin thu an suah.
Biakinn Kang Mi 41 An Thi – Egypt ram, Giza khawpi ih biakinn ah mi 41 an thi ih, hriamhma ngah 45 tlun an um. Mithi lakah nauhak 10 an tel ih,hriamhma lakah bese tuktuk an um ve.
August 14, sunday sun an khawmlaiah meisa hri a puak ih, cutin biakinn sung a kang vutvo hngal. Biakinn kang ruangah mipum thawng 5 hrawng umkhawm cu suah an cuh aw ciamco. Suah an cuhawk ciamco tikah thazang nei lo pawl an tlu ih, an pal thatmi tivek an tam. Thenkhat cu suahnak ding um lo ih, biakinn parin dawp that tivek khal an um.
Himdamten luat thei pakhat cun “Biakinn sungah mipum thawng 5 hrawng kan khawm. Khawmlai ih meisa a thim ruangah meicet an nun. Meicat an nun hnuah meisa a ra ih, meitha tha pahnih an komawk tikah meisa tha a naa tukih meisa hri a puak. Cutikah mipi thinphang cu suah an cuh aw ciamco ih, mithi an tam phah.
“Mithi lakah biakinn tlunta sawn ih um an tam. Ziangahtile ttum an cuh aw ih, an pal aw ciamco. Hrekkhat cu ttumnak lilawn in tla that tivek an si. Kan biakinn hmin cu Abu Sihin Church a si ih, cozah lam cun tulsammi bomnak kan lo pe ding tin in sim. Cumi rualrualin ziangtin biakinn a kang timi khal zingzoinak felfai neih an tum a si,” tin a sim.
Leave a Reply