Dubai Ih Hranhrang Myanmar Rammi Pawl Myanmar An Thleng

Dubai Ih Hranhrang Myanmar Rammi Pawl Myanmar An Thleng – Dubai ih hrantang Myanmar nunau pawl cu September 9 ah Myanmar an thleng fel zo ih, anmah bumtu puaisa pawl khal kaih thluh an si.

Myanmar nunau pawl cu Dubai an thlen hnuah an puaisa in room pakhat ah a khum ih, nikhat ah veikhat lawng rawl a pe. Cukhal hmeh ciamco a um lo ih, pe tidai tam zetih suanmi lawng a pe. Umnak ding an hmuh thei lo ruangah an puaisa cun Iraq ram ah kuat an tumih, cuveten Myanmar nunau pawl cun Facebook ah live thlah in bomnak an dil. Cutin, an dinhmun le puaisa pawlih bum dan theih thluh a si ih, anmah runsuah an si hnuah an puaisa pawl khal kaih thluh an si.

Puaisa an kaihmi pawl cu Dubai ih khumtu Keti Myint, Min Min ( Keti Myint pasal ), Thiha ( Keti Myint ih tapa ) , Yangon ih puaisa Mimi (a hmin ngai Nawtawsi ) Hleh Hleh Win, Soe Soe Lwin le Shwe Shwe Myit pawl an si. Yangon ih puaisa pawlin Dubai ih puaisa pawl an biak hnuah hnatuan tlang an si.

Tu ahcun Dubai ih puaisa an kaihmi khal Myanmar ah kuat tlung an si ih, ziangtin hremnak an pe ding timi cu theih a si hrih lo. Hivek thu a suah hnuah Dubai ih inn hnatuan Myanmar rammi tamzet tlun an duh thu aupi bet rerotu khal an um.

US In $2billion In Ukraine An Bawm Bet Ding – Ukraine ram ih tlang US ramdang palai Blinken cun Russia ralkap pawl do rerotu Ukraine ralkap pawl hrang bomnak thilri le ralthuam phunphun $2billion man an pek ding thu an tiam ih, a rangthei bikin kan tawlrel cih ding tin Ukraine lam an theihter.

Russia le Ukraine doawknak ah Ukraine president Zelenskyi cun kan hloh zomi kan ram pawl kan la kirsal rero zo tin a sim ih, ziangtik hmanah beidong an tum lo thu a relsuak.

US cun a hlan khalah ralthuam le sumpai tampi in Ukraine an rak bawm rero zo ih, tu khalah Ukraine bomnak pek vivo an tum. Hivekin US in Ukraine bomnak an pek ding thu an suah tikah ram hrekkhat cun buainak luartertu men a si tin US an rak mawhthluk ve.

Asinan, Ukraine president Zelenskyi cun US hnenin bomnak an don ding cu lungawiza ngaingai a si tin a sim ve ih, Kharkiv ramthen sungin Russia ralka pawlih luahmi hmunram tampi khal US bomnak zarin kan la kirsal rero zo tin a rak sim ve.

Ram pahnih cu thla 7 sung an do aw thlangih, Russia in an tum vekin Ukraine rampi an lak thei lo tlunah Ukraine nisuahnak lam khal an lafel thei hrih lo. Ramdang bomnak in Ukraine lam an tangthei nasa ih, an do aw peh rero lai. Ram pahnih buainak ah remawknak zianghman an nei hrih lo.