Dubai Ih Myanmar Nunau Pawl Kut An Dawh

Dubai Ih Myanmar Nunau Pawl Kut An Dawh – Dubai ih thleng Mah Nwe cun “Kei cu pago in Dubai thleng ka si, rawl ka khop lo ruangah kan umnak hmaiah kut kan dawh theu. Lamzin ah kan umkhawm ih lamzin ih feh pawl tangka kan dil. Rawl dilnak hmun khal kan nei. Keimah lawng ka silo, Dubai ih thleng Myanmar mi 100 hrawng cu biaknak inn tivek le milian pawlih rawl zemnak tivek ah rawl an dil theu. Hna an hmuh hlan sung cu an puaisa pawlin Passport an lonsak tikah rawl an khop ih,an dil.

“Sun ahcun an biakinn ah kan feh ih,ka be ve men. Cutikah rawl in do theu. A caan le tangka tla in pe. Kan umnak ih tidai khal a tha lo ih, kan sung a dok ringring. Sivai leinak ding khal kan nei lo. Kut kan dawh ih kan ngahmi cu rualpiza in kan ei khawm theu. Kut kan dawh ringring ngam ve lo ih, a caante lawngah kan dawh theu.

“Tu ah kum 25 ka si ih, 2022 May 15 ah Dubai ka thleng. Inntek ka hnenah kut in thlak, in vel ringring ih ka tlansuak. Cutikah Passport nei loin ka um. Dubai kan thlen veten puaia pawlin kan passport in laksak ih, inntek kan hmuh hlan sung cu rawl kan khop lo. Inntek kan hmuh hnu khalah rawl kan khop cuang lo. Ka rualnu khal inntek tei an sual tuk ruangah a suak ih, Dubai cozah hnenah Passport a va dil nan an rak pe duh lo,” tin a sim.

Mah Phyu Phyu Hte cun “Rawl kan ei lo caan a tam, nikhat veikhat rawl kan ei caan a um ih, ni 5 sung rawl in pek lo caan khal a um. Cutikah thazang nei loin kan tlu zik theu. Thenkhat nunau cu kan harsat tuk ruangah an duh lomi tiang tuah phah an um ih, nunau hlothau phah thluh khal an tam. A caan ahcun milian bawmtu tivek kan nei theu. Nunau hmeltha deuh le taksa tha deuh tivek tla cu inntek mipa in sualpimi an tam. Puaisa hnenih an sim khalle san a um lo. Tuar cuahco men a siko,” tin a sim.

Mah Phyu Phyu Hte ih thurel a dik maw tin Yangon ih a puaisa a relmi cu media lamin an biak tikah “Passport a duh ih, kei cun Dubai puaisa hnenah dil aw, kei thawn a pehpar aw nawn lo tin ka sim. Myanmar a tlung duh taktak khal a silo, harsatnak a tong khal a silo, Passport a duh men a si,” tin Yangon puaisa cun Media a rak let.

Asinan, Dubai ih um harsa tuartu pawl cun puaisa pawl cu thuphan hlir an rel, an tangka sun ding an duh lo ih, inntek tha le tha lo khal an ngaihsak lo. Sumpai an ngah ding lawng an ruat ih a simmi zum ding aum lo tin an sim ve.

Dubai puaisa Mimi Zaw cun “Myanmar nan umlai ihsin simtheih cia thluh nan si. Dubai nan thlen tikah nikhat lawng phone pek nan si dingih, kum 2 hrang visa tuah nan si bangin kum 2 sung um tengteng ding nan si. KUm 2 kim hlanah inntek inn nan suak, puaisa inn in nan suak, damlo nan ti, a phunphun phuahhlam nan tuah asikhlle relcia bangin tingtel nan kuan ding. Nan kuan lo cun tlun theinak a um lo. Cucu, nan feh hlanin relcia thluh a si,” tin thu a rak thlah ve.

Myanmar nunau pawlkom cun “Dubai, Oman le Iraq ih hrantang Myanmar nunau pawl cu ralhrang cozah in buaipi an tum lo. Curuangah NUG talin an ngaihsak a tul. Curuangah, Dubai le Oman ih harsa tuar pawl cu NUG takin ngaihsak haiseh,” tin an sim.

Oman ih um Mah Suh Suh Win cun “Kan inntek tei an sual tukih, ka taksa ah hmasi um khopin in vel. Room ah in kalhkhum ih,ka hliamhma pawl cu sivai khal in hnihsak lo. Oman ka fehnak puaisa cu Si Tu Aung a si ih,kum 2 um kim loin Myanmar nan tlung duhsal asile ting 230 kyat nan kuan ding in ti. Si Tu Aung kutih feh lamin Dubai 16 le Oman ah 12 buainak nei kan um.

“Thenkhat cu inntek le puaisa ih velh ruangah bese zetzet khal an um. Thenkhat cu thlahlawh dil suak thei lo khal an um ih, rel cia vek silo thlahlawh mal tuk tivek khal an um. Thlahlawh thu ah Yangon ih puaisa pawl cun tuanvo kan lo laksak thei lo tin an sim men. Rawl kan khop lo kan ti tikah nan inn a silo, hnenum nan si in ti men. Buainak le harsatnak tong relsuaknak nei lo tampi khal an um a si,” tin a sim.

Ralhrang In CDM Saya Lu An Tan – Makui ramthen Pauh myone TaungMyint khua ih CDM Saya Saw Tun Moe cu Ocotber 17 ah ralhrang pawlin an kai ih, a lu an tansak hnuah tlawnginn phar ah a lu an tar.

Khuami pakhat cun “October 17 zingah ralhrang pawl cu Kan khua ah an lut. Tlawnginn ah an feh ih, CDM saya an kaih hnuah a lu a tansak. Cumen duhtawk loin a lu cu tlawnginn pharah an tar. A zunghruk le nazi cu ralhrang pawlin an laksak. A kut le ke pawl khal an tansak ih, tlawnginn khal ralhrang pawlin an urkang. Tlawnginn ahcun NUG kaihhruainak in tlawng phuan a si ih, CDM saya cun nauhak pawl ca a zirh ringring. Cucu, ralhrang pawlin an duh lo sibik,” tin a sim.

NUG cun “Ralhrang ralkap in zirhtu le nauhak an that ciamco tivek cu kannih NUG in kan mawhthluk tuk lawlaw. Zirhtu Saw Tun Moe cu CDM a tuah hnuah raltha zetin nauhak pawl cazirhtu a si ih, upatnak kan pek tlunah miraltha cazin ah ngankhum a si. Hitluk ih misual rapthlak ralhrang pawl kan donak ah kan zaten lungrual zetin kan teltlang a tul a si,” tin thu an suah.

Russia Vanzam Tla Ah Mi 15 An Thi – Russia ram Yeysk khawpi ih raldonak vanzam tla ah mi 15 an thi tin tuanvo neitu pawl cun an sim.

Russia raldonak vanzam mawngtu pahnih cu vanzam a ciangkuang lo timi an theih veten innpi parah an dawp man. Cumi hnu cun vanzam cu khawpi ah a tla ih kiangkap a hrut vivo. Vanzam tlaknak hmun an thianfai tikah ruang 13 an hmu hngal ih, a hnuah ruang 2 sar betin ruang 15 an hmu zo.

Vanzam tlaknak innpi dot 9 sang a kang vutvo cih nan mi 68 pawl cu innpi sungin thiarsuak man an si ih, mi 19 pawl cu sizung luhpi hngal an si.