Chin ramkulh Falam khawpi ah ralhrang hnuai ih tlawngkai pawl tlawngkai nawn lo dingin theihter an si ih, tlawngkai thotho pawl cu thihnak tiang an ton thei thu ca an tar.
June 13 zan ah Falam khawpi Ah-Htah-Kah 2 tlawnginn kiangah bomb a puak ih, a hnu reilo ah ralhrang ralkap cun kiangkap an kap ciamco. June 14 zing ahcun tlawnginn kiangah catar a rak um.
Ca an tarmi pawl cu Falam in ngan a si ih, “Tlawngkai hlah, Falam hmin na seter, Nan fale pawl ruak nan hmuh duh asile tlawngkaiter uh,” timi a si.
Falam tlawnginn kiangih bomb a puak hnuin ralhrang ralkap cun zan nazi 8 hnu zokhal leng nan suak nawn lo ding tin June 14 thu an suah. Tlawnginn kiangih catarmi thawn pehpar aw in zoin ca a tar timi cu felfai in theih a si hrih lo.
CNDF hotu pakhat cun “Kannih lam cun Falam tlawnginn kiangih catarmi thuhla thawn pehpar aw in zianghman kan thei lo. Ralhrang lam an si thei bangin,mipi lam khal an si thei ko. Khat le khat puhawk le thangsiat duh ruangah tuah theihmi a si,” tin a sim.
Falam ih um pakhat cun “June 13 zan ah tlawnginn kiangin bomb puak awn le meithal puak awn kan thei ih, JUne 14 zing ahcun tlawnginn kiangah tlawngkai lo dingin ca an rak tar. Ziang pawlkom in ca an tar timi kan thei lo ih, catartu pawlkom hmin khal an ngan lo. Hivek catar an siar hnu cun nulepa pawlin an fate pawl an kirpi salih, neta ah an kaisal pei maw timi cu kan thei ve lo,” tin a sim.
Ralhrang ralkap cun June 2 in rampi huap tlawng an rak phuan. Chin ramkulh sung myone 9 lakah myone 7 ah tlawng an phuan thei ih, Thantlang le Kanpetlet lawngah tlawng an phuan thei lo. Hakha, Falam, Mindat, Tedim, Tonzang, Matupi le Paletwa pawl ahcun ralhrang ralkap in tlawng an phuan thluh.
Min Aung Hlaing In Tlangmi Pawl Biakawk A Sawmsal – Ralhrang ralkap hotu Min Aung Hlaing cun tlangpar miphun hotu pawl amah be dingin a sawm sal ih, remdaihnak tuah uhsi tin a sawm hai.
Ralhrang hotu Min Aung Hlaing cun kan dung thla ah tlangpar miphun hotu pawl amah tong dingin a rak sawm zo ih, pawlkom 10 cun hmin an pe. Tu ah Min Aung Hlaing cun amah tong dingin hminpe pawlkom 6 pawl a be zo ih, pawlkom 4 pawl a be peh vivo tum.
Ralhrang be dingin hminpe tlangmi pawlkom ah rinsanmi KNU, KIA, AA, TNLA, MNDAA le KA pawl an tel lo ih, Min Aung Hlaing a um nuam thei lo. Curuangah, Min Aung Hlaing cun a sawmnak ruat thasal dingin June 14 ah sawmnak an neisal.
Hmaiton in kan tongaw ding, kan be aw dingin remnak kan tuah ding. Tuhi caan tha a si ih, June 30 tiang ka lo hngak ding a si tin tlangpar ralthuamkai le tlangpar miphun pawlkom pawl sawmnak a nei.
Min Aung Hlaing cun amah tong dingin hminpe tlangpar ralthuamkai le pawlkom lakin pawlkom 6 pawl cu pakhat tetein thu a rak relpi zo ih, remdaihnak siloin thu a rak tiam men. Curuangah, tlangpar ralthuamkai le pawlkom dang cu Min Aung Hlaing an zum lo deuhdeuh ih, Min Aung Hlaing biak tumnak an nei lo.
Suh Kyi In Mipi Thu A Cah Nonsal – Ralhrang ih kaihmi Daw Suh Kyi cun Myamar mipi zaten khat le khat bawm aw ton dingin le rualrem ten um dingin a cah nonsal.
Daw Suh cu ralhrang in an kaih hnuah thubuai 6 hrang kum 11 sung thawngtla dingin hremnak an pe zo ih, thubuai 13 an nei lai. Daw Suh ih thubuai pawl cu rel rero lai an si ih, June 13 khalah Daw Suh cu Court ah hruai a si.
Cumi ahcun Daw Suh In sihni pawl hnenah “Myanmar mipi zaten lungrual zetih um dingin , khat le khat bawm aw ton dingin in rak simsak uh,” tin amah buaipitu danthiam pawl a cah.
Ralhrang ralkap cun Daw Suh an kaih hnuah khawiah an ret timi cu tutiang theih a si hrih lo. Ralhrang in Daw Suh an kaih hnuah Daw Suh cun a danthiam pawl hmangin mipi thu a rak cah tamzet dingih ,cumi ahcun mipi zaten lungrual zetih um dingin a cahtel ringring.
Pastor rittheih Sii phur an kai – Shan ramkulh saklam, Nan Kam khawpi luhnak ah Kachin Baptist Church ih pastor ih mawnmi bike cu June 5 ah an cek ih rittheih sii an hmu ruangah an kai.
Biaknak pastor U Bren Nu le a rualpi pahnih cu Muse in an ra ih Kone Sar khaw kiangah an rak kai.
Khuami pakhat cun “Anih hi pastor a si. Asinan kum khat cawlh a la. Ziangahtile nupi neih a duh ruangah sumpai hawl dingin cawlh a laknak a si. Cumi laiah an kai ih thin a nuam lo zet.
“Annih hi thilri peksawngawknak ah an hlawh aw. Tulai nunhar thawn hmuhmi pohpoh hnatuan vivo a si tikah nupi nei ding thawn sumpai a tulsam vanglai tak a rak si ve.,” tin a sim.
U Bren Nu cu Bike carry tuan in a hlawh aw ih, Thilri a phurhmi ah rittheih sii an hmu ih, an kai.
An kaihmi 3 hi kum 28 mi U Bren Nu, kum 42 mi Daw Min Than le kum 28 mi Magat timi pawl an si ih, Nam Kam palik sakhan ah an khum hai hrih. Pastor in midang ta rittheihsi a rak phurhhlawh maw,amai ta taktak a phur timi cu theih a silo.
KIA Le PDF In Ralhrang 9 An Rettha – Sagaing ramthen Kachin ramri Indaw ah KIA le Indaw PDF komkhawm cun nasa ten ralhrang ralkap an do ih, June 14 ih an doawnak ah ralhrang 9 an thi tin Indaw PDF cun mipi an theihter.
June 14, zinglam nazi 9 hrawngah ralhrang ralkap sawn in KIA le PDF pawl umnak hmun an pan ih, nasa ten an do aw. Ralhrang ralkap mipum 90 hrawng an si ih, nazi 4 sung nasa ten an kap aw. Doawknak ah ralhrang ralkap 9 an thi ih, anmah ralhrang pawlin an phur cih tin PDF lam cun an tarlang.
Indaw PDF hotu cun “Ralhrang an tam ngaingai nan, kannih mipi ralkap lam cu kan him. Ziangahtile, kan hmunram a si ih, tanhmun khuarnak kan thei. Annih ralhrang pawl cu hmunram theifiang lo an tam ih ,doawk tikah an tuar phah a si,” tin a sim.
Leave a Reply