Falam le Hakha Karlak Ah An Do Aw

Sagaing ramthen Kalaymyo in Chin ramkulh saklam ih lut ralhrang ralkap pawl cu Falam le Hakha karlak ah Chin ralkap komkhawm pawlin an do ih, ralhrang thi an tam tin doawknak ih tel siseh kiangkap mipi khalin an sim.

June 29 ah ralhrang ralkap mawtaw 28 cu kalaymyo in saklam Chinram an rak pan ih, July 6 ah Falam an thleng. July 7 ah ralhrang pawl cun Falam an suahsan ih, July 8 sun nazi 12 hrawngah Ralhrang pawl cu Chin ralkap komkhawm in Taal khua kiangah an rak kap.

CDF sungtel pakhat cun “Ralhrang pawl cu kannih in lamlak in kan rak bawh cia ih bomb kan puah hnuah kan kap. Anmah ralhrang lam khalin ralthuampi le bomb an hmang ve nan, a hmun theisawntu le tanhmun khuardan thiamsawntu kan si ih, kan dinhmun a tha. Kan hmuh dan vek asile bomb kan puahmi le meithal ih kan kahmi ah ralhrang 15 hrawng an thi men ding. Doaw rero lai kan si ruangah ralhrang thizat cekci rel a theih hrih lo ih, hruaitu pawlin thu an suah leh ding a si,” tin a sim.

Ralhrang ralkap pawl cu Falam in Hakha feh tum an si ih, Hakha ah ziang an tuah ding, Hakha in hmundang ah an feh bet pei maw timi thu felfai cu theih a si hrih lo. A then in lilawn tuah ding an si ih, a then in sakhan an dinthar tum khal a si thei tlunah a hlan bangin Hakha ih ralhrang pawl hrang eiin le ralthuam an phur khal sithei titu khal an um.