Ralhrang In Tayakung Khua In Inn 52 An Urkang – Ralhrang ralkap cun Sagaing ramthen Kalay peng thlanglam Tayakung khua in inn 52 rori an urkang ih, mipi tamzet cu inn nei lo mangbang vansang in an um.
Khuami pakhat cun “Tuini tiangih cazin kan tuah dan vek asile tuitum doawknak ruangah ralhrang ralkap cun Tayakung khua sungin inn 52 an urkang. Inn hrekkhat an bauhsiat ih thilri an lakmi khal a tam. Tu ahcun ralhrang pawl an um nawn lo ih, kannih khuami pawl khal khua ah kirsal in hmunram thianfainak kan nei rero lai a si,” RFA tin a sim.
August thla thokin Tayakung khuasung le a kiangkap ah doawknak a soasng tukih, ralhrang ralkap pawl cun Tayakung khua an luhcilh hnuah Tayakung khua sungah reizet an rak caam. Tayakung khua ah inn 300 tlun an um ih, mipum 1400 tlun an si.
2021 lamin Tayakung khua le a kiangkap ah doawknak a rak sosang tuk zo ih, Tayakung khua mipi pawl cu vei tampi an tlan rero zo. Khua mipi lakin inn nei nawn lo ruangah tlunnak ding nei lo, umnak ding nei lo tampi an um. Hrekkhat cu umnak ding an neih hrih lo ruangah hmundang a remnak hmunih beu hrih khal an umlai tin khuami pawl cun an sim.
Kalaymyo Ah Puak Awn Phunphun An Thei – Kalay mipi cun August 10 zan nazi 9 hrawngah kalaymyo Nipidaw veng vuanhtan inn kiangah puak awn phunphun an thei ih, mipi ralkap in ralhrang pawl an kap siko ding tin an sim.
Kalaymyo Nipidaw vengih vuanthan inn ah ralhrang pawl umhmun an khuar ve ih, a hlan khalah kalay mipi ralkap cun vuanhtan innpi an rak kap rero zo. Tuitum khal vuanhtan innpi ih um ralhrang pawl cu Kalay mipi ralkap in an kap siko ding tiah mipi cun an sim.
A kiangih um pakhat cun “Kannih sung tla cu kan rak it man zo ih, itthat thenkhat kan um zo. Asinan , a puak ring tuk lawmmam ih kan harh thluh. Vuanhtan innpi cu mipi ralkap pawlin bomb an puah tam thlang. Ralhrang lam thi an ummen ding nan, kannih cun a hmunah kan va fiah thei lo a si,” tin a sim.
Puak awn phunphun ruangah thi an um maw, hriamhma ngah an um maw tivek cu Kalay mipi ralkap lamin thusuah an nei hrih lo ih, felfai in theih a silo.
Tachileik Tilian Ah Palik Senkhat A Thi – August 8 ih , Shan ramkulh Tachiliek tilian ah palik senkhat a mawtaw thawn tiva ah a fen ih a thi. Palik senkhat Maung Aye ih ruang cu August 8 zan nazi 7 hrawngah an hmu cih ih, August 10 ah vuinak an nei.
Buaipitu pakhat cun “A thok ahcun tidai ah mawtaw pakhat a fen tilawng in kan thei ih, palik senkhat a si ding tikhal kan ruat lo. Mipi lakin pakhat khat a siko ding tin ka rak ruat. Asinan, ruang hawl a si tikah mawtaw sungih to cu palik senkhat a rak si. A ruang cu a zan ah kan hmu cih ih, tu ahcun kan vuifel zo a si,” tin a sim.
Tachiliek tilian ahcun inn tampi umnak tha loin ti a rak lik phah nan, tu ahcun tilian a kang thluhsal zo ih, inn thianfainak an nei rero lai tin buaipitu pawl cun an sim bet.
KNDF In Ralhrang 15 An That – Kaya ramkulh Demoso myone sungih ralhrang thilri phur mawtaw pawl cu KNDF in August 1 in 10 tiang an do ih, doawknak ah ralhrang 15 an thi tin KNDF cun thu an suah.
KNDF cun “Demoso myone sungih um ralhrang sakhan pawl hrang eiin le ralthuam phur ralhrang pawl cu kannih KNDF in August 1 in 10 tiang kan do. Doawknak ah ralhrang lam an tamzet nan, kannih cun mipi sumpai hmangih leimi kan ralthuam pawl kan hmang tangkai tukih doawknak ah ralhrang ralkap 15 hnakin mal lo an thi. Doawknak ah ralhrang hriamhma ngah tampi an um ih, kannih lamin mi 3 hriamhma an ngah ve nan, an bese lo. Doawk thluh hnuah hmunram thianfainak kan nei ih, ralthuam hrekkhat kan sar a si,” tin thu an suah.
KNDF thuphuangtu cun “Tu ah ralhrang pawl Demoso myone Daw-ngankha veng kungtar le Ti’sule ah umhmun an khuar hrih ih, doawknak a um vivo thei. Curuangah mipi pawl cu ralhrang naivai ah um lo dingin kan theihter duh. Kannih cun ralhrang uknak a cemral hlanhlo theitawk suah in ralhrang kan do vivo ding a si,” tin a sim.
NUG In Vanzam Khamnak An Hmang Thok – NUG cozah cun Project Dragonfly cangvaihnak an hlawhtlin thok thu August 9 ah casuah in mipi theihternak an nei ih, Project Dragonfly ahcun ralhrang in raldonak vanzam an hman khalle kham theinak a um tin an sim.
NUG cozah cun ralhrang in raldonak vanzam an hmang asikhalle kham theinak ralthuam kan nei zo tin thu an suah nan, ziangvek ralthuam a si, khawitawk ah an hmang thok ,zopawlin tuanvo an la tivek cipciar pawl cu an thusuahmi ah an tarlang tel lo.
NUG ih thusuahmi ahcun vanzam kahnak khal a si thei ih, ralhrang in raldonak vanzam an hman tikah khamawknak khal a si thei in a lang. NUG cun ralhrang in raldonak vanzam an hman tikah khamawknak ih tulsammi thilri kan cahmi hrekkhat a thleng zo ih, hmun hrekkhat ah an hmang thok zo. Ttulsammi ralthuam dang khal ngah bet dingin le tangkai zetih hmang thei dingin ttansuah tlang cio uhsi,” tin thu an suah.
Depayin PDF hotu cun “Vanzam kahnak ralthuam kan tulnak a rei tuk zo. Vanzam kahnak ralthuam kan neih ahcun tampi in bawm ding. Tu ahcun ralhrang mawtaw le ke ih feh ralhrang pawl lawng duhtawk in kan kap thei, ralhrang pawlin vanzam an hman tikah dung kan sip ringring. Ralhrang pawl cun tlunsang in an duhduh an kap men ih, mipi in an tuar khalle a poi lo tizawngin an cangvai. Cutikah mipi pawl ruah an hartuk a si,” tin BBC a simthei.
France Ram Feh Dingih Dil An Tam – Ralhrang ralkap in rampi thuneihnak an lak tikah Myanmar mipi tamzet cu ramleng suahnak ding an hawl cio ih, tu khalah France ram ih feh dingin dil an tam tuk tin’ France Embassy cun thu an suah.
France ram ih feh dil pawl cu caan reilote sung dil an um bangin, caan reipi sung hrang feh dil khal an um. France ram ih feh diltu pawl cu a hlan an bikhiah hnakin an tamtuk ruangah caan rei a ttul ding tikhalin an tarlang.
Kan dung khalah Japan feh theinak camibuai phitnak ding cahnah lak an rak cuh aw ciamco zo. Singapore, malaysia, Thailand ,Dubai le ram dangdang khalah feh ding an tam. Asinan , France ram cu Myanmar mipi hrang feh tukmi ram a si lo tikah feh diltu an tam ciamco cu Embassy lam an mangbang ve ih, diltu an tam tuk ruangah caan a rei ding thu mipi an theihter.
Franch Embassy cun “Yangon ih kan embassy ah Franch ram feh dingih diltu an tam tuk. Hivek ih tam cu kan ton dah lomi a si. Curuangah visa diltu zaten a caan ka lo bikhiah hnakin a reisawn thei timi khal kan lo theihter duh. Khatlam ah Franch ram ih kan um tumzat felfai zetin dilnak thehlut dingah kan lo sawm. Remcang lo ruangah a ni tthawntu pawl khal nan hmin a umsal maw timi rak cek ringring dingin ka lo theihter duh a si,” tin thu an suah.
Sri Lanka Mipi Pawl Duhphorhak An Neihsal– Sri lanka ram buainak khal a thlatel a si thlang nan, a reh thei hrih lo ih, mipi cun hrilawknak thar tuahsal dingin le kaihmi pawl thlah thluh dingin duhphorhnak an nei thoksal.
Sri Lanka ram buainak ah president bik ramdang a tlanih, hlutdaw cun president thar ah Prime Minister Ranil an hril. Ranil cu Prime Minister a silai khalah mipi in an duh lo ciami a si ih, president ih an hril thar veten lamzawh duhphorhnak nei pawl kai dingin thu a suah cih.
Hivek ruangah mipi cun felfai zetin hrilawknak thar kan duh, ram buainak ruangih kaihmi pawl thlah zalen thluh uh tin August 9 ah duhphorhnak an nei thasal ih, an dilmi an ngah hlanlo duhphorhnak neih vivo an tum. Sri lanka ram a tlaksiat tluk ruangah mipi cun duhphorhnak an rak nei ih, an ram sung thilri man a kai tlunah lei ding um lo tiangin ramleng thilri a lut thei zo. Cutin, Sri Lanka ram cu rak buai thok an si.
Leave a Reply