Ei Ding Nei Lo Ih Myanmar Mi 8 An Kai – Thailand ram hmun pakhat ah ei ding nei nawn lo carau ih um Myanmar mi 8 pawl cu October 12, zinglam nazi 1 hrawngah Thailand palik pawlin an kai ngah tin thu an suah.
Khua mipi pawl in Thailand palik hnenah thupten Malaysia feh tum an um,puaisa pawlih buaipimi an si tin an hek ih, Thailand palik pawl cun hramlak tupi sung an hawl tikah ei ding rak nei nawn lo,caurau ih um Myanmar mi 8 pawl an kai ngah.
Kaihmi Myanmar mi 8 pawl cu hramlak ei ding mumal nei loin ni 2 sung an rak um zo ih, an rawl ah banhla kung le kawlhra an rak ring. Kaihmi Myanmar mipawl cu Rakhine ramkulh in an si ih, mipa 7le nunau pakhat an si. Puaisa hnenah tangka tampi pein Malaysia feh tum an si ih, Thailand palik pawlin an kaih hnuah daan vekin an tlun thu an relcat ding thu an sim.
Min Aung Hlaing Thupten A Vaksuak – September 26 ah Pin Oo Lwin feh tum Min Aung HLaing cu lamzin a him lo tin a rak feh ngam lo ih, October 11 ah Min Aung Hlaing cu thupten Pin Oo Lwin a feh ih, midang ralbawi Pin Oo Lwin feh vekin thu an darhter.
Ralhrang ralkap cun Min Aung HLaing Pin Oo Lwin a thleng timi an thehdarh duh lo ih, ralbawipi pakhat Pin Oo Lwin a thleng tin lamzin an kil, hmun tinkim ah ralhrang an khat ih,Min Aung HLaing Pin Oo Lwin a feh thu an thupsak tum. Asinan, Min Aung HLaing Pin Oo Lwin a thleng timi an theisuak thotho.
Thuhla theitu cun “October 11 cu Pin Oo Lwin khawpi sungah ralhrang pawl an khat thluh ih, lamzin tluan an kil thepthep. Neta ah Min Aung Hlaing Pin Oo Lwin a thleng timi felfai zetin theih a si ih, ralhrang lam cun an thup nasa. Pin Oo Lwin a suahsan hnu lawngah anmah ralhrang lamin an thuthang ah an suah cih ko ding. Pwin Oo Lwin ah ralhrang hmunpi le ralhrang tlawng a um ih, ralhrang tlawngin mithar hrilnak ah amah Min Aung Hlaing rori ra in a hrilmi a si,” tin a sim.
Ralhrang in rampi thuneihnak an lak hnuah Min Aung Hlaing cun ralhrang hmunpi Pin Oo Lwin a tlawng leuhleuh ih,ralhrang tlawng ihsin mithar an hril tikah le sinak sang an kaiter ding tikah Min Aung Hlaing amah rori in a hril theu tin an sim.
NATO In Russia Ralrinnak An Pe – Russia le Ukraine buainak reizet a dai lawk nan, October 10 in ram pahnih karlak boruak a sosang ciamco salih Russia cun Ukraine khawpi lam tiang an kap ciamco sal.
Russia in Ukraine an rak do thokah Ukraine khawpi bik Kyiv tiang an rak kap ih, Ukraine hmunram zaten thianfai thluh an rak tum. Asinan, Russia lamin an tum vekin thil an fehpi theilo ruangah Ukraine khawpi lam cu kap duh nawn loin dung an sipsanih, Ukraine nisuahnak lam nasaten an do.
Ocotober thla thok ahcun Russia in Ukraine nisuahnak lam in hmunram 4 pawl cu Russia ram a si zo tin thu an suah. Cuveten , Russia in 2014 kum ih Ukraine ram an rak lonmi Crimea lilawnpi a puak ih ,lilawn a siat phah zet. Cucu, Ukraine lam cangvaihnak a si rori tin Russia cun Ukraine thungrulnak ah Ukraine khawpi lam an kap ciamco sal.
Russia in Ukraine khawpi lam an kah ciamco sal ruangah innpi tampi a siat phah salih, mipi khal an thih phah. Hivek cu NATO pawlkom in zohsal an tituk ih, Russia cu Ukraine khawpi lam kap nawn lo dingin ralrinnak an pe ih, Ukraine in Ukraine khawpi lam nan kap peh asile NATO ralkap pawl an cangvai ding tin an sim.
NATO lam an tongkam vekin an cangvai asile buainak a sosang deuhdeuh dingin a lang. Khatlam ah NATO ih ralrinnak peknak thlunin Russia in Ukraine khawpi lam an kap nawn lo khal a si thei. Cutilai in Russia cangvaih peh dan ding cu zohman ih relcia theih a silo ih, Ukraine ram an donak ah dungsip an tum hrih lo. Remawknak lam hnakin boruak a sosang deuhdeuh sal cu a si.
Leave a Reply