India In Ralhrang Hnenah Ralthuam An Zuar Peh

India In Ralhrang Hnenah Ralthuam An Zuar Peh – Ralhrang in rampi thuneihnak an lak hlanah India cun Myanmar ralkap hnenah ralthuam an rak zuar theu ih, ralhrang in ramip thuneihnak an lak hnu khalah India cun ralhrang hnenah ralthuam an zuar peh thotho ti’n zingzoitu Justice For Myanmar cun thu an suah.

India cozah neihmi ralthuam tuahnak Yantra india Limited Companay cun 2022, October thla khalah ralhrang pawl hnenah ralthuampi an rak zuar. American, UK, EU le UK pawlin ralhrang pawl ralthuampi lei thei lo dingin hremnak an rak pe laiah India cun hlawknak an rak hawl ih ralhrang hnenah ralthuampi an rak zawrh.

“India in ralhrang hnenah ralthuam a zuar peh timi cu fiahnak thawn felfai zetin kan nei. Democracy ram picang pakhat an si vekin India in democracy duhtu Myanmar mpi dinpi haiseh. Thuneihnak latu ralhrang dinpi loin mipi sawn dinpi dingin India cozah kan sawm duh a si,” ti’n Justice For Myanmar thuphuangtu Yatanar Maung cun a sim.

Yantra India Limited comapay cun ralthuampi an zuarmi cu ralhrang ralthuam palai KYaw Kyaw Htun Companay hnenah an zuar ih, Kyaw KYaw Htun in ralhrang kutah a rak hlansawng ve ding. A tufang ramsung buainak ah ralhrang cun tlunzuang raldonak le ralthuampi kahnak an hmang nasa ih, India tuah ralthuampi kahnak khal an rak lei bet.

Ralhrang cun India tuah ralthuampi kahnak cu Kachin ramkulh sungah an hmang rero zo ih,an hmannak cu phokan myone sungah a si ih, 2022, December 6 le December 13 ah an rak hmang. Ralhrang in rampi thuneihnak a lak hnuah India cun Myanmar mipi dinpi loin ralhrang sawn an tuanpi ih, UN tiangah ralhrang humtu, ralhrang donak hrimhrim ah vote pe dah lotu an si ve.

Matupi Ah Dawr Thilri Lei Ding A Har – Chin ramkulh matupi khawpi sungih ralhrang pawl cun thla 3 sung rori Mantupi ah zianghman lut thei lo dingin an khar ruangah Matupi ah dawr thilri lei ding a har tuk zo ih, mipi an buai zet ti’n an sim.

Matupi ih um pakhat cun “Hmundang ihsin matupi khawpi sungah fangfai a luhlonak a rei zo. Curuangah, Matupi ahcun tangka nei khal sehla dawr ah fangfai lei ding a um nawn lo. Matupi peng sung suak fangfai khal duhtawkin lei ding a um cuang lo. Khuate ih um pawlin a caancaan ah matupi khawpi sungah fangfai an ra zuar theu. Matupi lenglam ih lut ding fangfai le dawr thilri pawl cu khua pawnih um ralhrang pawlin an rak kham ih an laksak ringring. Ralhrang pawl cangvaih dan cu zokhal an tawpter thei hrih lo,” ti’n a sim.

Ralhrang in Chin ramkulh sungin myone 8 ah martial lawn an rak phuang ih, cumi ahcun Matupi peng sung khal a tel. Matupi ahcun thla 2 lenglo ralhrang in phone line khal an phih sak zo ih, mipi pawl cu ralhrang hnenah tangka pe in landline an hmang theu. Tu ahcun phone line tha lo lawng siloin dawr thilri khal duhduh in lei ding an nei nawn lo.

Yangon Ih Cetzung Pahnih A Tawp – UK Primark tacik telnak yangon ih cetzung companay pahnih a tawp ruangah Myanmar mipi 2000 hrawng hna nei loin an um phah.

UK in ralhrang hotu siseh ralhrang tuanpi Companay pawl hremna a pek tikah Primark khalin Yangon an suahsan phah a tul ih, cumi ruangah Yangon ih thuamhnaw cetzung pahnih an khar phah. Cetzung kharmi pahnih cu Shwepitar ih um GTIG le Gysan cetzung an si.

Cetzung pahnih hi China rammi ih companay a sinan tacik an hmanmi hi UK tacik Primark a si thung. Cumi ruangah a neitu China milian pahnih in cetzung ong bet duh hman sehla tacik neitu Primark lamin rem an tilo ahcun anmai thuten an ong thei ve lo.

Cetzung ih hnatuan pawl cu cetzung an khar ding ruangah hna nei loin an um thlangih an hrang hna hmuh hngal ding a harsat ding thu an sim. Ralhrang in rampi thuneihnak an lak hnuah ramdang cetzung tamzet cun Myanmar an rak suahsan rero zo ih cumi ruangah Myanmar mipi tamzet hna nei lo an tam deuhdeuh.

Hnatuantu pawl buaipitu pakhat cun “Cetzung cu an khar zo. Cetzung an khar hlanah hnatuan pawl hlawh an pe thluh. Ziangtikah an khar ding, an ongsal pei maw timi cu theih a silo. An ongsal asile hnatuan pawl kosal dingin remnak an tuahpi. Tu ahcun mipum 2000 hrawng hnatuan nei loin an um ih anmah tlunah an sungte pawl tiang seherh umzet an si,” ti’n a sim.

Iran In Missile An Kapsuak – Iran cun an ram humhimnak hrang Missile an tuah tharmi zohsinnak an nei ih thazetin kan kap suak thei ti’n thu an suah.

Kan dungah Iran in peng 1025 tiang kap thei Missile an tuahsuak ti’n thu a rak suah zo. Iran in hitluk kap hla thei Missile an neih tikah a kiangkap ram pawl cu an um a nuam lo phah zet. Ziangahtile, Iran hi Russia, China le N.KOrea pawl thawn tantlang le rualpi tha an si ih ralthuam tha an neih ding cu leitlun in an duh lo.

Ukraine le Russia buainak khalah Iran cun Russia ralkap pawlih hman ding Drone an rak pe ti’n thu a suahnak a rei zo. Iran hin Missile thar an tuahsuak tlunah Nuclear ralthuam neih rori an tum ih Nuclear ralthuam an buaipimi khal a tamsawn an theh zo ti’n thu a suak.