Tamu ih India rammi pahnih thah an si tlunah India lamih an ruang an kuat lo ruangah Mohre ih India mipi pawl an lungawi lo tukih ramri ih um ralhrang Check gate cu July 6, sun nazi 2 hrawngah India mipi pawlin an urkang.
India ramsung Mohre ih um India rammi pahnih cu tungbing mawng an si ih, July 5 sun nazi 1 hrawngah thilri hrekkhat phur in Tamu ah an va feh. Cucu, Tamu tlawnginn kiangih um ralhrang kuthnuai Pyu Saw Htee pawlin an rak dingter ih, tong an theih lo maw si ding India rammi pahnih cu cawl loin an feh lan.
Cutikah Pyu Saw Htee pawlin an dum cih ih, an kap that. An sungte pawlin thuhla an theih tikah an ruang ngah thei dingin India palik hnenah an dil ih, ralhrang le India palik biakawk dan vek asile July 6, zinglam nazi 8 hrawngah ruang kan lo pe ding tin ralhrang lam cun India palik pawl an simthei.
Asinan, July 6, sun nazi 12 tiangah India lamin ruang an ngah thei hrih lo ih, mipi thinheng pungkhawm cun ramri ih ralhrang Check Gate an urkang. Ramri ih um Myanmar lamih lakphak dawr khalah India mipi lam cun lungto in an deng ciamco ih, Myanmar lamin hriam ngah an um.
Tu ahcun India palik pawl cu ramri ah an umthluh zo ih, Mohre mipi pawl daiten umhrih dingin an dil ih, an kil. Hivek a si ruangah Mohre ih um Myanmar raltlan pawl khal leng an suak ngam lo ih, India mipi pawl tuahmawh phangin an relh rero ve.
Cun, Tamu in Mohre lamih thilri zuar Myanmar mipi pawl khal July 6 ahcun zohman Mohre lamah an feh ngam lo. Hivek a si tikah Tamu lamih Myanmar mipi tamzet cu Mohre lamah sum tuah ngam nawn loin a um ih, Pyu Saw Htee pawl ruangah Myanmar mipi tamzetih eiin hawlnak a buai phah thluh.
Matupi ih Doawknak Ah Ralhrang 3 An Thi – Chin ramkulh Matupi peng Lailenpi in Matupi lamih feh ralhrang pawl cu July 6, zinglam nazi 9 in CDF matupi cun lamlak ah an rak do thokih, doawknak ah ralhrang 3 an thi tin thu an suah.
CDF matupi cun “June 28 ah Lailenpi khua ih ralhrang pawl cu ke in Matupi lam an rak pan. Cucu, kannih Matupi CDF pawlin july 6, zinglam nazi 9 in nazi 10 tiang kan do ih, doawknak ah ralhrang 3 an thi. Ralhrang 2 khal hriamhma natuk an ngah ih,kannih Matupi CDF lam cu kan him. Ralhrang ralkap pawl cun dung an sip rual in lamlak ih mipi inn 3 an urkang phah a si,” tin thu an suah.
A tufang Chin ramkulh sungin Falam ah ralhrang mawtaw 28 an thlengih, Hakha lam an feh peh vivo tumin a lang. Hakha feh ding ralhrang pawl cu Falam le Hakha karlak ah mipi ralkap pawlin an do tlangpi ih, tuitum ahteh mipi ralkap pawlin ralhrang pawl an do pei maw ti cu theih a si hrih lo.
Mindat lamah ralhrang pawlin raldonak vanzam an hman hnuin mipi ralkap lam an relh hrih ih, doawknak thuthar theih ding a um hrih lo. Kanpetlet lam khal doawknak ciamco theih ding a um lo.
Mindat Ah Ralhrang Ih Bomb Thlakmi An Sar – Chin ramkulh Mindat peng sung khua pakhat ah Mindat CDF cun ralhrang ih thlakmi bomb puak hrih lo pakhat an sar ih, an phelh thluh.
Ralhrang ralkap cun July 2 zingah Mindat peng sungin khua pahnih cu raldonak vanzam pahnih in bomb an rak thlak ih, khuami 2 an thih tlunah inn , tlawnginn le biakinn pawl a siat phah ih, mi tampi hriamhma ngah an um. Ralhrang in bomb an thlakmi khua pahnih cu July 6 ah Mindat CDF lamin thianfainak an nei ih, ralhrang thlakmi bomb puak hrih lo an sar hnuah mipi hrang tihnung lo dingin an phelh fel.
CDF Mindat thuphuangtu Salai Yaw Mang cun “Ralhrang in mipi umnak khua bomb an thlakmi cu a rapthlak tuk lawlaw. Doawknak um loin mipi umnak rori ah khavek bomb tihnung an thlak ngam cu ramsa thinlung rori an pu siko. Bomb a puak hlanah kan phelh fel thluh ih, bomb dang a umlai maw tin kan hawl peh vivo hrih ding a si,” tin a sim.
Ralhrang In PDF Sakhan Pahnih An la – Makui ramthen Htelin myone ih PDF sakhan pakhat cu ralhrang ralkap pawlin an luhcilh hnuah an lafel tin anmah PDF cun mipi theihternak an nei.
Htilin PDF thuphuangtu cun “June 29 ah CDF Mindat le ralhrang ralkap pawl ramri nasaten an do aw. CDF Mindat le ralhrang doawknak ah ralhrang lam thi le hriamhma ngah an tamih, Htilin lamah dung an sip. Kannih khal hmunrawn lamah ralhrang kan rak do lai caan a si ih, Kan sakhan ah mitam an um lo.
“Ralhrang dungsip pawl cun kan sakhan an hrut phah ih, mipum le ralthuam thlauawk tuk ruangah sakhan ih umpawl cu an himnak hrang an tlan. Cutin, ralhrang pawl cun kan sakhan sungih bike, solar le kan hmanrua phunphun tlunah kan umnak inn pawl khal an urkang thluh.
“Kan sakhan pakhat kan hloh nan, beidong in kan um lo. Mipi sumpai thawn kan sakmi a si tikah kan riahse ko. Asinan, beidong ih ummen a ngah lo tikah tuah tulmi pawl kan tuah cih hngal a tul. Sakhan kan sak sal dingih, ralhrang khal kan do peh vivo ding a si,” tin a sim.
Mandalay ramthen Nua-to-gyi myone khalah ralhrang ralkap pawlin PDF sakhan an luhcilh ih ,rawl suangtu an kaih tlunah ralthuam hrekkhat khal an laksak thei ih, sakhan an urkang sak thluh tin PDF cun thu an suah.
Nautokyi PDF thuphuangtu cun “July 3 zingah ralhrang mipum tamtuk cun kan sakhan in ra pan ih, in kulh hnuah in kap ciamco. Cuveten kan himnak hrang kan tlanih kan rawlsuangtu pakhat cu a tlannak lamzin ah ralhrang pawl an um ih an rak kai ngah. Kan ralthuam hrekkhat khal ralhrang pawlin in laksak ngah ih, in leihtu mipi pawl kan hmaisong tuk a si,” tin a sim.
Tlawngta Pawl An Sual Aw ih,Pakhat A Thi – Naypidaw ih ralhrang tlawng phuanmi pakhat ah phun 9 kai lai tlawngta nauhak pawl an sual aw ciamco ih, pakhat a thi tin Naypidaw ih umpawl cun thuhla felfai an sim.
Naypidaw Ah-htah-kah 19 ih tlawngta pawl cu a bur in an sual aw ih, an lakih pakhat in hriamhrei a rak ken thup ruangah amah sualtu pawl lakin pakhat a dawt ih, a thi. Thuhla theitu kiangkap mipi pawl cun tlawnginn an kulh thluh ih, mithattu kuthlak an tum nan, zirhtu pawlin mawtaw in an suahpi.
Tlawnginn kiangih um pakhat cun “Tlawnginn sung cazirnak ah sual aw an si. A hlan ihsin an rak buai cia maw timi cu ka thei lo. Tlawngta pakhat cun Screw Driver a rak kengih, cumi cun amah sualtu vei 5 a dawt. A bumah vei 3 a dawt ngah ih, a dunglam zaangah vei 2 a dawt ngah.
“A thitu tlawngta sawn in amah thattu kut a thlak hmaisa sawn tin an sim. A bur in sual aw an si tikah an hmin khal felfai in kan thei lo. Mithattu tlawngta cu zan nazi 10 lawngah mawtaw in an phursuak. Zan nazi 10 tiang mipi in lenglam in an rak hngak ih, an mawtaw hmanmi khal lungto in an deng ciamco. Thubuai ziangtin an fehpi timi cu kan thei ban lo a si,” tin a sim.
Leave a Reply