Innpi Cuhawknak Ah Daw Suh Kyi A Sung – Ralhrang ralkap in rampi thuneihnak an lak hnuah Daw Aung San Suh Kyi cu an kai ih, thubuai 19 an tuahsak hnuah Naypidaw thawnginn sungah an khum.
Hivekin Daw Suh a buai laiah US ih um Daw Suh Kyi ih Upa Aung San Oo cun Yangon ih Daw Aung San Suh Kyi ih inn cu daan vekin a cuhsal ih,ka nui’ ro a si ruangah then aw ding kan si tin’ Court ah a dil. A hlan khalah Aung San Oo cun Yangon ih Daw Suh Inn a rak cuh rero zo nan, Court ah a sung. Tuitum ahcun ralhrang Court in Aung San Oo nehnak an pe.
Daw Suh danthiam pakhat cun “A hlanah a rak cuh zo nan, a sung ih, thu a rel zo. Asinan, tu ah a cuhsal ih, ralhrang Court cun nehnak an pe. Ziangtin nehnak an pe, ziangtin ro an thensak timi cu ralhrang Court casuahmi kan siar thluh hrih lo ruangah felfai in kan rel thei hrih lo a si,” tin a sim.
Aung San Oo cun Yangon ih kan nui’ innpi cu Suh Kyi lawngin a co theinak san a um lo, kan zuar dingih a man zem aw ding kan si tin’ 2000 kum ah daan vekin Court ah a dil. NLD in nehnak an co hnu 2016 kum ah Aung San oo ih thubuai thehlutmi cu Court ah rel a si ih, Innpi le hmuan zuarr loin innpi le hmuan then aw sawn ding an si tin’ Court cun thu an rak suah.
Cucu, Aung San Oo in a duh lo ih,sumfai rori a duh ruangah Court phunphun a rak feh bet nan, a hlawhsam. Kum 6 a kim hnuah Aung San Oo cun innpi zuar ih aman then aw dingin Court ah a thehlut salih, tu ahcun ralhrang Court in Aung San Oo dilnak vekin rem an tisak zo.
Daw Suh Kyi cun a nui’ ro a si ruangah innpi zuar a siang lo, a duh lo lawlaw. Asinan, tu ahcun a upa Aung San Oo ih sumpai duhtuknak ruangah Court in Innpi zuar theinak a pe zo. Innpi an zuar fel tikah sumpai in then aw ding an si.
Mandalay Lamzinpi Ah Mi 2 An Kap That – Mandalay khawpi Grand mandalay sizung kiangah ralthuamkai hrekkhat in lamzin ih feh mi pahnih an kap that ih, a thok ah CID palik bawi tin’ an rel lawk nan, thuhla zingzoi fel a si tikah nupate an rak si ih, an pa sawn thilzuar le an nu sawn hotel ih hnatuan a si.
Zoin nupate an kap that timi cu felfai in theih a silo nan, Mandalay UG cun mithi cu CID palik bawi Soe Ko Ko a si tin an sim. Asinan, a hnuah mipi in felfai zetin zingzoinak an nei ih, mithi mipa sawn cu thuamhnaw zuar Sithu Ko Ko sawn a si ih, nunau sawn cu a nupi Hnin Win Hlaing a si.
CID palik bawi Soe Ko Ko cu ralhrang in mandalay PDF pawl an kaih theinak dingah theitawk rak zuam rerotu a si ih, amah ruangah Mandalay PDF kaihmi an tam zo tin’ an sim.
Ruang buaipitu pakhat cun “Mithi mipa sawn cu CID Soe KoKo a silo, thuamhnaw zuar Sithu Ko Ko sawn a si, nunau khal a nupi Hnin Win Hlaing a si ih, hotel hntuan a si,” tin a sim.
Ralhrang In KNU Donak Ah Vanzam An Hmang – Karen ramkulh myawaddy le Wawlay lamzin tlunah ralhrang ralkap le KNU pawl an doawnak a rei thlangih, August 23, zinglam nazi 10 hrawng ahcun ralhrang in KNU donak ah vanzam an hmang.
A hmunih um pakhat cun “Zinglam nazi 10 hrawngah ralhrang ralkap in raldonak vanzam 3 an hmang. Ralhrang raldonak vanzam cun Maywaddy le Wawlay karlak an kap ciamco ih, bomb an thlak. Khatlam ah ralhrang hmunpi pawlin ralthuampi an rak kap suak ve. Hnuailam ah ralhrang pawl hmun 4 in an then aw ih, KNU pawl an nor. Doawknak ah ralhrang lamtang BGF pawl khal an tel ve ih, doawknak a sosang tuk lawlaw. A hlan ahcun ralhrang in raldonak vanzam an hmang khalle pakhat hnih hrawng fang a si ih, tuitum cu raldonak vanzam 3 an hmang. Hnuailam ah ralhrang an tam ngaingai a si,” tin a sim.
Myawady le Wawlay lamzin ahcun ralhrang ralkap le KNU pawl thla 1 lenglo an do aw zo ih, ralhrang pawl thi an tam. Cutikah ralhrang ralkap pawl cun KNU donak ah vanzam 3 rori an hmang. Ralhrang in vanzam an hman ruangah mipi inn ziangtluk a siat, mi paziat an thih phah timi cu felfai in theih a silo.
Leave a Reply