Insein Thawnginn A Puak….

Insein Thawnginn A Puak – Yangon ramthen Insein myone ih Insein thawnginnpi cu October 19, zinglam nazi 9:33 hranwgah a puak ih, thawnginn sungih hnatuan mi 3 le parcel phurtu nunau 5 an thi ih hriamhma ngah 10 an um tin ralhrang sung thu a suak.

Bomb cu thawngtla, thawnginn kiltu le hnatuan pawl hrang thilri kuatnak innte sungah puak a si ih thawnginn sungih um hrang thilri an kuatmi sungah bomb an rak retih , cutin a puak in a lang. Bomb puak ruangah ralhrang pawl cun Insein thawnginn kiangkap an kap ciamco ih, tuini cu Insein thawnginn kiangkap feh lo a him ding tin an sim. Insein thawnginn hi ralhrang in ram buainak ruangaih an kaihmi pawl an retnak le an hremnak hmunpi pakhat a si ih, milar thawngtla tamzet an retnak hmun khal a si.

Insein Thawnginn kiangih um pakhat cun “Insein thawnginn luhnak ih cek gate ah bomb vei 2 a puak. Bomb puaknak hmun cu Insein thawnginn sungih um pawl hrang thilri an kuatmi retnak hmunah a si. Mithi lakah Thawnginn kiltu le thawnginn sungih hnatuan an tel bangin thawngtla thilri kuattu lenglam mipi khal an tel. Mi 8 an thi ih a thi cazin cu ralhrang kutah a um a si,” tin a sim.

CDF Mara In Mara Army Thilri An Pholang – CDF Mara le Mara Army khal remawknak felfai an nei hrih loin a langih CDF Mara cun October 19 zingah Mara Army pawlih tlansakmi bike le thilri an laksakmi pawl an pholang.

CDF Mara cun October 9 ih Mara Army thawn an doawknak thuhla cu October 11 ah thusuah in mipi theihternak an rak nei. Cumi ahcun CDF Mara in Mara Army pawlih tlansanmi bike 4, Cerek bawm 7, Bomb 7, Laptop pakhat, Air Gun le cabu pawl kan laksak tin thu an rak suah. CDF mara cun thu an suah hmaisami ahcun Mara Army pawlih thilri an laksakmi pawl an rak pholang lo. Cutikah Mara Army dinpitu pawl cun Mara Army thilri nan laksak taktak thei asile zuk pholang uhla tin an rak ngiar.

Cucu, tuitum ah CDF Mara lamin Mara Army pawlih tlansanmi bike le ralthuam an laksakmi pawl pholang an si. Hivekin khat le khat an buai hrih ruangah remawknak felfai an nei hrih loin a lang.

Bike Mawng Nunau Suithi An Dirhsak – Mandalay ramthen Aungmi Tharsan myone lamzin 14 ah bike mawngih phur aw nunau pahnih cu lamzin ah an dungih feh cun an suithi a dirhsak ih, hliamhma an ngah phah. October 18, sun nazi 1 hrawngah a si ih,an hngawng ih suithi dirhsak an si tikah bike ih phur aw nunau pahnih cu an tlu cih ih, pakhat sawn a lu a khawngaw na.

Buaipitu pakhat cun “Rukru cu kan kai ngah lo0, a tlanlan cih. A tufang Kannih Mandalay cu kan him lo lawlaw. Ram buainak le covid 19 natnak ruangah harsa an tam tukih, rukru le suamhmang an tam tuk lawlaw. Rukru le suamhmang ih an thahmi khal an tam thlang.

“Lamzin lawngah siloin inn sungih an suammi tivek khal an um. Curuangah mipi kan cah duhmi cu fimkhur a tul ngaingai. Ziangahtile , kan thil neihmi ruangah kan tuar phah theu. Ahleicein suithi tivek tla cu lamzin ah langter tuk lo sehla kan himnak a si,” tin a sim.

CDM Saya A Inn Ah An That – Ayeyarwaddy ramthen Zalwin khua ih CDM tlawng saya pakhat cu a inn ah thi cia in a ruang sar a si ih, thahmi a si tin ruang buaipitu pawl cun an sim. A taksa ah kaihci ih dawhnak hmun 26 hrawng a um.

Ruang buaipitu cun “Inn ah amahten um a si ih, amahten a umlai ah an that. Thil umdan kan zoh tikah CDM a tuah ruangah an that siloin a thilri le neihsiah an duh ruangah an that in a lang. A thattu pawl cun a phone le tangka tivek an laksak.

“A hmin cu Sawye Tiha a si ih, ralhrang in rampi thuneihnak an lak hnuah CDM ah a rak lut cih ve. CDM a tuah hnuah a tlan lemlo ih, inn ah a um peh. Online ih dinmi tlawng ah ca a zirh. Amah thattu ih rinhlelh pahnih cu an kai zo,” tin a sim.

Min Aung Hlaing Kiltu An Kap That – Mon ramkulh Mawlamaing khawpi lamih feh Min Aung Hlaing hrang lamzin tluanih kilhim hnatuantu ralhrang pawl cu Bilin’ ah kNLA pawlin an rak kap ih, ralbawi thenkhat an thi tin an sim.

Mawlamiang ih Min Aung Hlaing a feh ruangah Bilin ralhrang le ralkap pawl cun Mawlamaing le Yangon karlak an kil ih, Min Aung HLaing siatsuah a silonak dingah tuanvo an la. Lamzin tluanmah Min Aung Hlaing kiltu an si. Lamzin tluan ahcun KNLA in vei hnih bomb an rak puah. Bomb an puah hnuah RPG le meithal in an kap ciamco bet tin KNLA lam cun an sim.

Min Aung Hlaing kiltu pawl bomb an puahmi ahcun ralhrang palik bawi telin ralhrang 9 an thi ih, hriamhma ngah an tam tin thu an suah.

KNLA sungtel cun “Lamzin tluanah Min Aung Hlaing kiltu ralhrang mawtaw 7 an fehkhawm. Cumi ahcun mawtaw pahnih bomb kan puah fuh. Mizan zan nazi 9:40 hrawngah veikhat bomb kan rak puah. Hmaisa ah mawtaw 3 kan fehter ih neta mawtaw 4 bomb kan rak puah. Cumi hnuah RPG le meithal in kan kap ciamco bet. Ralhrang thi lakah ralbawi an tel hnuaihni. Ralhrang bawi thi lakah Bohmu, Bokyi , CID le palik bawi Aung Mya Soe pawl an tel,” tin a sim.

NUG humhimnak vuanci zung khalin Min Aung Hlaing lamzin tluanih duty le Min Aung HLaing kiltu mawtaw pawl kah an si ih, ralbawi thenkhat an thi tin thu an rak suah ve.

Min Aung Hlaing In Mon Mipi A Tlon – Mon ramkulh Mawlamyiang khawpi ih tlawng Min Aung HLaing cun Mon a um sungah Mon ramkulhsungih milian sumdawng pawl hmaiton in a kom ih, lawng cawlhnak le International Airport a sak ding thu in a tiam.

Min Aung HLaing cun “Kannih thawn nan tuantlang asile mipi hamthatnak le hlawknak kan ruat vivo ding. Tu khalah Mawlamyaing khawpi ah lawng cawlhnak hmunpi le Airport sak dingin kan lungkim zo. Hivek cu Mon miphun in leitlun nan hip theinak le nan thansohnak ding pakhat a si.

“Dat le yinan pawl ramdang ih kan laksaka ringring tikah ramdang sumpai kan hmanmi a tam. Curuangah meitha tha ihsin thokin ramdang ring lo ih kanmahten todelh aw tum ding kan si. Meisa tha mawtaw le tlangleng khal a rang thei bikin tuahsuak kan tumih, caan cu a duh lai ding nan, nasaten kan zuam ding a si,” tin a sim.

Australia In Jerusalem An Pom Nawn Lo – Ausutralia cozah thar cun a hlan cozah in Israel khawpi ih Jerusalem a rak pommi cu an hlitsal ih, Israel khawpi cu Tel Aviv a si tin thu an suah.

Australia ramdang palai Penny Wong cun “Jeruslem thuhla cu anmah Israel le Palestine ih relfel dingmi a si. Ram pahnih in ramri an cuhawk rero laiah kannih cun kan rak pomsam men thei lo. Thuhla a fel tikah le an remawk tikah rel leh fang ding kan si. Curuangah kannih Australia cun Tel Aviv ah kan palai zung kan ret hrih. Hitin kan feh vivo hrih ding a si,” tin a sim.

Jerusalem hi Israel le Palestine ih cuhawk ringringmi a si hrih ih , thlanglam le saklam tin Palestine lam cun thenawk an duh. Asinan, Israel lam cun a pumpi in Israel ram a si ih Israel khawpi a si kumkhua ding an ti ve.

Israel Prime Minister Lapid cun “Australia ih thusuah tuahmi cu a mak danglam nasa. Neta ahcun fimkhur zetin thu an ruat thlang dingah kan ruat. Jerusalem hi Israel khawpi a si ih, a si kumkhua ding a si,” tin a sim cih.

Palestine lam cu Australia ih thusuah ruangah an rak lungawi ve ih, hmunram then aw fel rori ding kan si an rak ti ve. US president hlun Donald Trump cun 2017 kum ah Israel khawpi cu Jerusalem a si tin thu a rak suah ih, US palai zung khal Tel Aviv ihsin Jerusalem ah an rak thawn cih. Trump thusak thlunin Australia khalin Israel khawpi ah Jerusalem an rak pom cih ve nan, tu ih Australia cozah thar cun Israel khawpi ah Jerusalem an pom duh lo.

Australia hi a hlan ahcun Christian ram pakhat ih rel a rak sinan, tu ahcun biaknak neilo an tam deuhdeuh ih, an ram sungah Christian ti aw an mal deuhdeuh tin an sim.