Kachin Ah Tlawng Ap An Tam

Ralhrang ralkap cun June 2 in tui kum hrang tlawng an phuan ding thu mipi theihternak an nei zo ih, May 26 in tlawngta nauhak an cohlang thok.

Ramsung hmun tinkim in tlawng hminpe an um ih, mipi ralkap cahnak hmun Kachin khalah tlawng ap an tam. Covid 19 natnak le Myanmar ram buainak ruangah nauhak pawl kum 2 sung tlawngkai thei loin an um ih, tui kum cu fale pawl tlawngkaiter tum nulepa an tam. kachin ramkulh Myitkyina khawpi lawngah nikhat ah tlawng hminpe 600 tlun an um tin fimzirzung cun thu an suah.

Myintkyina ih um pakhat cun “Tui kum cu ka fa tlawngkaiter dingin tlawng ka va ap ih, buainak zianghman ka nei lo. Ziangkim a lak a si ih, tlawng ap man sumpai pek khal a tul lo. Ka fa cu KG kai zo a si ih, kum 2 a cawlh tikah tu ah phun 1 kai fang ding a si.

“Diktak te cun tu ah ka fa cu phun 3 kai ding a si thlang. A fim zirnak a tlai tuk ding ka phan ruangah tlawngkaiter ka si. Culo ziangdang hman a um lo,” tin BBC a simthei.

A fa tlawngkai dingih aptu inntek nu pakhat dang cun “Fimzirnak cu fimzirnak a si. Kum 2 sung tlawngkai loin ka fa ka cawlter zo ih, tui kum ah tlawng a kai lo asile ziangtikah tlawng a peh nawn ding? Ram buai hlanih an ca zirmi le tuih an ca zirmi cu a bangaw thluh, zianghman danglamnak a um lo. Dothlengnak hi fimzirnak le harhdamnak thawn hmunkhat ah kan ret asile a tuartu ding cu kanmah mipi le kan fale sawn an si,” tin Kachin thuthang a simthei ve.

Matupi Ah Ralhrang A Tlan – Chin ramkulh Matupi ih ralhrang hmunpi in ralkap pakhat cu May 23 ah ralhrang hmunpi a suahsan ih, a tlansuak tin khuami pawl cun an sim.

Matupi ralkap hmunpi in ralhrang tlansuak an um thei ngaingai ih, kan dung khalah ralhrang pahnih an rak tlansuak zo. Matupi myanmar sipuazi bank kiltu pahnih khal kan dungah ralthuam thawn an tlan suak ih, CDF kutah an rak pe aw.

Tuitum ih ralhrang pakhat tlan cu khawitawk ah a pe aw timi theih a si hrih lo ih, fawm hruh loin bike thawn a tlansuak lai mipi in an hmu. A hnuah ralhrang dang pawlin an hawl cih nan, an kaih thu theih a silo. Hivek ruangah Matupi ralkap hmunpi cun raltuampi an kap ciamco ih, zoman ralkap tlan cohlang lo dingin mipi an theihter.

Ralhrang In Chin Ramri An Hrut – Chin ramkulh Tedim peng Mualpi khua ih ttum ralhrang pawl cun Kalaymyo le Chin ramkulh ramri an hrut ih, May 27 zan ah Cicai tlang an thleng zo tin khuami pawl cun an sim.

Raltlang mawtaw 10 cu May 26 ah Tedim peng an lutih, mualpi khua kiangah an cawl. Mawtaw 10 cu phurhmi nei loin Kalaymyo lamah an kirsal ih, ralhrang an phurhmi pawl cu Mualpi khua kiangah an tthum. Cupawl cun Tedim peng le kalaymyo ramri an hrut ih, nga hawl mi 4 khal an kai.

Ralhrang in kalay peng Zichaung tlunah an hrut ruangah Cicai, Sadaw le Sekan khua pawl cu khua ah um ngam loin khawpi lamah an tlansal. Ralhrag pawl cun Chin ramkulh le Kalay karlak ih mipi ralkap pawl umhmun khuarnak an hawl in a lang.

Ralhrang In Paletwa Ah Suahvah Caan An Thleng – Chin ramkulh Paletwa peng sungih AA le ralhrang ralkap an doawk ruangah ralhrang cun Paletwa myone sungin tipar zin pawlah zan nazi 6 in zinglam nazi 6 karlak zohman feh lo dingin thu an suah.

Paletwa ih um pakhat cun “Ralhrang le AA an doawk ruangah ralhrang cun tipar zin feh caan an thleng. Zanlam nazi 6 in zinglam nazi 6 karlak zohman lawngin tipar feh an siang nawn lo. A hlanah zan sim hnu suahvah ngah lo tin thusuahmi an nei nan, tu ahcun thim veten lawng thawn suahvah an siang nawn lo.

“Kannih paletwa cu mawtaw zin a that lo ruangah tipar zin kan hmang tangkai nasa ih, lawng in kan tulsammi kan phur theu. Tu ahcun AA le ralhrang an doawk ruangah sun lawngah vah sian kan si ih, cuvek cing khalin mipi kan suak ngam tuk nawn lo a si,” tin a sim.

AA le ralkap karlak boruak a that lo hnuah AA le ralhrang cu Chin ramkulh Paletwa peng sungah vei hnih an kap aw zo. Kan dungah Paletwa peng sungih ralhrang Helicopter tum lai cu AA lamin an rak kap zo ih, tuitum ah ralhrang cun paletwa peng sungih AA umnak hmunih an ruahnak cu ralthuampi in an kap ve. Hmaisa sawn cu AA lam hramthok a si ih, neta sawn cu ralhrang lam hrom thok a si ve.

Ralhrang In Bata Sung Khungthu Ngahtu Damsung An Hrem – Yangon ramthen N.Dagon ih um Htet Myat Naing cu PDF pawl a bawm tin ralhrang ralkap in an kai ih, damsung thawngtla dingin may 18 ah hremnak an rak pe. Cucu, a sungte pawl hnenin theih a si.

Htet Myat Naing cu 2016 -2017 kum ah bata sung khungtu in phun 10 rak ong a si ih,Yangon phunsang tlawngah kum thumnak kai rero lai a si.

An sungte pakhat cun “Ca a thiam tukih,mi tlaitluang zet a si. May 2 ah ralhrang mipum tam tukin an inn an kulh thluh ih, an kai. An kaih lai khalah an kut hridai in an khit ih, PDF pawl a bawm timi men in an kai. Tu ahcun damsung thawngtla dingin hremnak an pe fel zo.

“Mifim , cathiam, mino hmailam eng zet hivek in hremnak an pe men cu an rapthlak tuk lawlaw. Rampi hrang sor tlak ding hivekin hremnak an pek rero tikah kan ram cu hmailam cu seherh um tuk a si,” tin a simthei.