Sagaing ramthen Kalaymyo ih um U Sein Lin cu ralhrang ralkap lamtangin dalan hna a tuan ruangah Kalay PDF pawlkom pakhat UGF cun Juy 11, sun nazi 12 hrangah an nupa in lakphak an inlai lakphak dawr ah an kap that.
Ralhrang ralkap in rampi thuneihnak an lak veten U Sein Lin cun ralhrang pawl a rak ttan cih ih, Kalaymyo ah lamzawh duhphorhnak neitu pawl ralhrang hnenah a hek ringring. SN thuthang ih hnatuan a si tikah mihek a cak ngaingai ih, a miheknak ruangah ralhrang pawl cun mipi tampi an kai.
Cumi ruangah U Sein Lin cu Kalay dohthlengnak pawlkom pawl cun Kalaymyo sungah um an siang nawn lo ih, khawleng ah an rak dawisuak. Asinan, reilote hnuah ralhrang pawlin an kokir sal ih, kalaymyo ih a um theisal hnuah nasa sin in ralhrang a dinpi.
2022, April 22 ahcun Facebook ah live a thlah ih Kalay PDF pawl a ngiar “PDF pawl ka lo tih dingah nan ruat mawsi? Nan ngam asile nan duh tiktikah in ra that thei ding. Ka umnak cu kalaymyo Aung Mingala vengah a si. Bulpak ka duhhrilnak in ralhrang ka dinpimi cu nan buai ding a um mawsi? Ziangruangah nan buai? Ralkap ka dinpi ruangah in that ding asile ziangtik caan khalah in that thei, nan thei maw? Ka hmin Sein Lin a si ih, ralkap ka dinpi ruangah in that ding asile in ra that thei. Ralhrag ka dinpi ruangah ziangsi nan buainak? Nannih ektum PDF pawl kha ka lo tih lamlam lo, ziangah ka lo tih ding?Ka kuthnuai pahnih an thihnak san cu thluak an neih lo ruangah a si. Ra uh nan ngam le ra uh. Ziangtik khalah na ra thei tin PDF pawl a rak hro ih,a ngiar.
Hivekin mipi hrang tih a nungih, mipi ralkap pawl a ngiar ruangah Kalay ralkap UGF cun July 11 ah an kap that. Kalay ralkap cun “Mipi hnaihnok zawngin a um ih, mipi hrang tihnung a si. CDM tuah pawl siseh PDF tlunah mipi hrang tiang tih a nung. Cumi ruangah kan kap that lawlaw. An thi lo ding kan phangih, vei 7 kan kap. Hmailam khalah ralhrang dinpitu pohpoh kan thianfai vivo dingih, ralhrang dinpitu nan theihmi cu in simthei hram uh,” tin mipi an sawm.
Matupi Ah Ralhrang 4 An Thi – Chin ramkulh Matupi peng Saung Hte khua kaingah CDF Matupi cun July 11 ah ralhrang ralkap pawl an do ih, ralhrang 4 an thi tin thu an suah.
CDF matupi cun “July 11, zinglam nazi 9:50 hrawngah Saung Htee khua le Lungdung khua karlak ah kannih CDF Matupi le ralhrang ralkap pawl kan do aw ih, doawknak ah ralhrang 4 an thi. Ralhrang pahnih hriamhma ngah an umih, kannih lam cu kan him a si,” tin thu an suah.
Sagaing ramthen kalaymyo thlanglam Hakhalay khua kiangih doawknak ahcun mipi ralkap komkhawm in CNDF miraltha pakhat a thi ih, CNDF 3 le Ranger KDF 1 khal hriamhma an ngah. Kalaymyo thlanglam Hakhalay kiang ahcun July 11 ah doaw an si. Doawknak ruangah thi CNDF sungtel cu kum 37 mi fate 4 ih pa a si. Hriamhma ngah Ranger KDF pakhat cu a kawng le poimawh hmun bomb in a peh ngah ruangah a bese zet tin an sim.
Chin ramkulh Falam peng sung khalah ralhrang ralkap le Chin ralkap komkhawm pawl an do aw peh ih, July 11 sun an doawknak ah Chin ralkap lamin Matupi CDF sungtel pakhat a thi.
July 11 ahcun ralhrang ralkap le Chin ralkap komkawm pawl cu Ramthlo khua le Dokthek khua karlak ah do aw an si. Doawknak ah ralhrang lam thi an tam tin an sim nan, a zat an fiah thei hrih lo. Hakha le Falam karlak ahcun ralhrang ralkap pawl cu CJDC hmin an do ih, CNA, CNDF, CDF Hakha, CDF Thantlang le CDF matupi pawl an tangtlang.
Mizoram Ah Chin Raltlan Nam In An Sat – India ram Mizoram state, Thaizawl khua raltlan hmunih um Chin raltlan pakhat cu midang hmunram sung a luh ruangah lo neitu in nam in a sat.
Chin raltlan pate cu Matupi peng doawknak ruangah Mizoram Thai Zawl ah tlan a si ih, an umnak ding hrang hramlak ah rua sat digin feh a si. Rua a sah tummi cu midang hmundamg ta a si ih, annih in a theih lo ruangah sat dingin hmuansung a lut.
Asinan, hmuan neitu in a rak kham ih, Chin raltlan pate khal rua sat ngah lo cun inn lamah a tlung. Cumi hnuah lo neitu thinheng dai thei lo cu khua ah a tlungih Chin raltlan umnak ih um Chin tlangval pate cu an inn sung rori ah nam in a va sat. Chin raltlan pate cun a kutin a rak kham ih, a kutzung pali 4 tluk bul zik ko hriamhma a ngah. Lo neitu cun Chin raltlan pate ih nu khal a hmaiah a beng.
Raltlan pakhat cun “Tleirawl a si tikah zianghman a thei lo. Kannih lam ahcun rua tivek neitu an um dah lo ih, hramlak ta cu kan sat hluahhlo men. Cuvek dingah a ruatih neitu a rak um. Neitu in a kawk ruangah rua sat loin a tlungsal ko nan, inn a thlen hnuah lo neitu in a ra dawi ih, nam in a sat. A kutin a rak kham ruangah a him phah a si,” tin a sim.
Mizoram palik lamin lo neitu an kai maw? thuhla an sut maw timi cu felfai in theih a silo ih, Chin raltlan pate sawn cu Lunglei sizung ah tuamhlawm rero lai a si.
Tamu Ah Ralhrang In Nunau Pakhat An Kai – Sagaing ramthen Tamu khawpi, Sawbua vengah ralhrang ralkap cun nunau pakhat an kai ih, PDF pawl than pehparawknak nan nei tin ual an puh.
Ralhrang ih kaihmi nunau cu Win Win Aye timi a si ih,a kut ah Speaker 21 le Keypad phone 10 an kai ih , PDF pawl hmanrua rori a si tin ralhrang lam cun an sim.
Tamu ih um pakhat cun “Sawbua veng cu ralhrang ralkap dinpitu Pyu Saw Htee pawl umnak veng a si ih, venglal khal ralhrang ruatmi an si. Cutikah vengsung mipi lakin anmai thuthlun lo cu duhduh in an kai ih, duhduh in sual an puh men a si,” tin a sim.
Palik In Khummi Fala A Tlanpi – Mandalay ramthen, Meikthila District, Mahlaing khua myomah palik sakhan ih an khummi fala pakhat cu July 10 ah palik pakhat in a tlanpi tin palik cun thu an suah.
Mandalay palik cun “Ralhrang a dokalh ruangah pukmah 50 in thubuai an tuahsak ih an kaih hnuah palik sakhan ahcun an khum.Khummi fala Ma Ein Thandar Aung timi cu July 10 ah sakhan lengah an suah duak.
“Cumi sungte ah palik Soe Paing timi cun kaihmi fala cu a ru ih an tlansuahpi. Kaihmi fala cu tawh bawrpi thawn a tlanpi. A rutu palik cu Mahlaing khuami a si ih ralthuam keng loin a tlanpi. A hlan ihsin timtuahnak an neicia dingin a lang. Cucu, kan hmuhdan a si,” tin an sim.
Palik in bang zo pakhat cun “Nunau kaihmi hrimhrim cu a kiltu ah palik nunau ret an si theu. Tu ah palik mipa an kilter timi hrimhrim cu ukawk daan mumal lo ruangah a si. Palik sakhan ih palik bawi pawl khalin an pahnih ih pehtlaihawk dan cu rak theithiam ding an sinan,tlaksamnak an nei hrimhrim. A hlankhan in rak thei hai sehla hivek a thleng lo ding a si,” tin a sim.
Tuvekin kaihmi nunau pakhat an khum hnuah palik in a tlanpi timi cu palik thuanthu ah a hmaisabik a siko ding tin palik hrekkhat pawl cun an sim. Mandalay ramthen palik pawl cun palik siseh a tlanpimi fala khal a rangthei bikin kai ngah dingin an hawl. Anmah palik sung khalah ziangtin palik mipa in nunau khummi a tlansuahpi thei timi zingzoinak an nei ciamco ve.
KNU Lamah Ralhrang 5 An Lut – Karen ramkulh Myawaddy myone Wawlay hmunram sungih sakhan cuhawknak ah ralhrang dang bawm dingih feh ralhrang mino tete 5 pawl cu KNU do paih loin ralhrang sinak an tlansan ih, KNU kutah an pe aw.
Ralhrang mino 5 pawl cu July 11 ah KNU ralkap KNLA hnenah pe aw an si ih, KNU lamin tha zetin an rak tuamhlawm. Ei ding rawl thawzet an timtuahnak sak hnuah an ei puarter hai ih, cumi hnuah thuhla simfiangnak an nei bet.
Ralhrang tlan mino 5 lakin pakhat Zaw Htet Aung cun “Ralhrang ah caan reizet sung paih lo cingin kan rak um. An fehdan le mipi an tuah dan ah kan lungkimlonak a rei zo. Ralhrang pawl ih rapthlakzia kan theih tikah suah dan ding lawng kan buaipi ih, tuitum ah a takin kan tlansuak thei a si,” tin a sim.
Ralhrang mino 5 pawl cu doawknak hmunih hriamhma ngah ralhrang pawl BGF sakhan ih kuat dingin an fehnak lamzin ah thuten KNU lam an bia ih, cutin tlansuak an si. Mipi lamtang ralhrang mino 5 pawl cu Zaw Htet Aung, Aung Kyaw Hto, Aung Nyin Chan, Aung Aung le Ye Myint Myat pawl an si.
Mipi In Sri lanka President Innpi An Suahsan Hrih Lo – Sri Lanka ram tlansiatnak ruangah mipi lungawi lo cun rampi huapin duhphorhnak an nei ih, an president innpi tiang an luhcilh.
An president tei sungkua cu innpi in an tlaksuak zo ih, an relh. Prime Minister inn khal mipi in an luhcilh thotho. Mipi cun July 9 in an ram president Innpi le Prime Minister innpi an rak luhcilh.
Hivekin mipi in an president innpi le Prime Minister innpi an luhcilh hnuah president le Prime Minister cun an hna ihsin an ban ding thu an suah zo nan, an bangfel timi a um thei hrih lo. President sawn cun July 13 ah a banfel ding thu a sim.
Mipi cun president le Prime Minister tei pahnih in an sinak an bansan fel hnu lawngah president innpi le Prime Minister tei innpi kan suahsan fang ding a si tin thu an suah.
President innpi sung ahcun mipi pawl duhtawk in an um. Rawl an suang, dai an bual, an lek, an cawlh hahdam khawm. Tu ah party komkhawm cun an president le Prime Minister tei pahnih bangfel dingin an rak nor rero ve ih, party zate komkhawm rampi hrilawknak nei tum an si.
Leave a Reply