A tufang Kalay thlanglam ah ralhrang ralkap le mipi ralkap pawl nasa ten an do aw ih, May 31 le June 1 ih doawknak ah ralhrang 7 an thi tin CNDF cun thu an suah.
CNDF cun “Kalaymyo thlanglam Natchuang khua ah ralhrang ralkap le kannih mipi ralkap komkhawm CNDF, Kalay PDF le pumpe pawl cun may 31 ah nasa ten kan do aw. June 1 khalah ralhrang ralkap le kannih mipi ralkap komkhawm pawl cu nasa ten kan do aw peh. Ni 2 sung ralhrang ralkap thawn kan doawknak ah ralhrang 7 an thi. Kannih mipi ralkap komkhawm lam khalin Kalay PDF miraltha pakhat cu ralhang kahmi ralthuampi in a ngah ih thi. CNDF in pakhat le Kalay PDF in pakhat khal hriam an ngah. Ralhrang ralkap cun Natchuang khua an nawkkang bet a si,” tin thu an suah.
Kalay PDF khalin doawknak thuhla hitin thu an suah ve, “Kalaymyo thlanglam Natchuang khua suakthuan tlawng le phungki tlawngih umhmun khuar ralhrang ralkap pawl cu kannih Kalay PDF, CNDF, RKDF le pumpe aw pawlin June 1, zinglam nazi 8 in kan do thokih, sunvu ten kan do aw. June 1 ih doawknak ah ralhrang 3 an thi ih, kannih Kalay PDF lamin pakhat bomb cangsualnak ruangah a thi ve. Culo, midang 2 hriam ngah kan um.
“Ralhrang ralkap pawl cun June 1 khalah Natchuang khua sungin inn hrekkhat an nawnkang bet. Mani khalah ralhrang ralkap pawl ih kahsuakmi ralthuampi in Natmyiang phungki tlawngih um raltlan mi 7 a ngah ih, mi 2 cu an nunnak hrang seherh umtuk an si,” tin Kalay PDF cun thu an suah.
March ni 21, 2022 ah kumkhat a kimzomi CDF-Hakha cun avei khatnak CDF-Hakha Council, EC le OC meeting cu palai 400 lenglo telin Hakha peng hmunhma pakhat ah May 26 ihsin 30 tiang an tuah.
CDF-Hakha Council cu MiE, Senthang, Zokhua peng le Hakha khuapi sung hmunhma pawl huap thluhin dothlengnak tuah rerotu a si ruangah Hakha peng ahcun CDF-Hakha Council lawng hi theihpimi dothlengnakbu a si tiah mipi theihternak an nei.
Dothlennak caan sungah CDF-Hakha Council hmunhma pawl ih kilhimnak, humhimnak, dantuahnak, ukawknak le thuthennak pawl cu CNF/A thawn tuantlangin CDF- Hakha Council in tuanvo a la ding tin CDF- Hakha Council cun thu an suah.
Ralhrang Anmah Le Mah An Kap That Aw – Pabo khua ah ralhrang ralkap kuthnuai palik hrekkhat le ralhrang ralkap hrekkhat pawl cun lamzin ceknak an nei ih, palik bawi pakhat cu a mawntaw a dingter duh lo tin an kap that.
June 1, zanlam nazi 5 hrawngah Yangon le Mandalay lamzin hlun Pago phunsang tlawng kiangah ralhrang ralkap le palik pawl cun lamzin ceknak an nei. Cuti lamzin feh mawtaw pawl an cek rero lai ahcun mipi tomi mawtaw vek to ralhrang palik bawi pakhat cu a mawtaw cawlter loin mawtawpi phen ah a feh peh.
Cuveten, palik pakhat cun a pan cih ih, sangka a onter hnuah a kap that. A hnuah palik ih kah thatmi cu a hnuah palik bawi a si timi an theifang.
Palik bawi Tiha Soe cu Pin Oo Lwin ah palik tuan in a um ih, a suahsemnak ram Pago ah tlung duak zik a rak si. Lamzin ah mipi mawtaw a mawngih , palik bawm a hruh lo tikah ralhrang palik in a rak kap that ngah.
Pago ih um pakhat cun “Tiha Soe cu Pago khawpi ih suak a si ih, Pin Oo Lwin lamah palik a tuan. Pin Oo Lwin in Pago ra tlung duak a sinan, lamzin ah an rak kap that. A ruang cu Pago sizung ah an kuat cih a si,” tin a sim.
An Phutawk Hremnak Kan Pe Titu Zaw Min Tun – Ralhrang ralkap aiawh ih thuphuangtu Zaw Min Tun cun June 1 ah media pawl komnak a nei ih, an thusuhmi pawl a let.
Media pawl in thihdan nan pekmi pawl nan that taktak pei aw ti ih an suh tikah Zaw Min Tun cun “PDF hminbun in dankalh pawlkom pawl cu khawpi sungah duhtawk in mipi an that. A bur ih thahmi khal an nei. Cuvek cu kan mithmuh rori ih thilthleng a si. An cangvaih dan cu tumtah nei in cangvai an si. Hivek pawl hremnak kan pekmi ah kan rel theimi cu an suahnak vekin phutawk hremnak pe thei dingin kan zuam reromi a si,” tin a sim.
Ralhrang ralkap in rampi thuneihnak an lak hnuah thihdan a pekmi mipum 114 an um zo ih, a tamsawn cu CRPH, NUG le PDf sungtel an si tlunah dothlengnak ih ralhrang hotu pawl an si.
Hramlak Ah NLD Palai A Thi – Kachin ramkulh pituh hlutdaw palai U ChinPhilin cu ralhrang in rampi thuneihnak an lak hnuah mipi ralkap lamtang in hramlak ah um ve a si ih, tu ahcun a caan khel ih tuamhlawm a silo ruangah hramlak ah a thi.
Kachin NLD cun “June 1, zinglam nazi 3 hrawngah NLD palai U ChinPhilin a thi. Natnak phunphun nei a si ih, duh vekin a tuamhlawm thei lo ruangah a thi. Ralhrang in rampi thuneihnak an lak hnuah ralhrang dotu pakhat a si ih, hramlak ah a um ve.
“Tu ahcun hramlak ih a umnak ah damlonak in a thi. Thisen sang, zunthlum le kaileng natnak nei cia a si. 2015 in 2020 tiang Kachin ramkulh Mansi myone ah pituh hlutdaw dinhmun in mipi a rak rian. Uknak tha duhtu a si ih, mipi hrang a takin pumpe aw a si,” tin thu an suah.
Leave a Reply