Kalay Ah Ralhrang 35 An Thi – Sagaing ramthen Kalaymyo thlanglam le saklam ah doawknak a sosang tukih, August 3 le 4 ih doawknak ah ralhrang 35 an thi tin Kalay PDF cun August 4 zan ah thu an suah. Ralhrang 15 cu kalaymyo thlanglam Tayakung khua sungih doawknak ah thi an si ih, ralhrang 20 cu Kalay le Tamu karlak ih thi an si tin Kalay PDF cun an tarlang.
Kalay PDF cun “August 2 in Kalaymyo thlanglam Tayakung khua ih umhmun khuar ralhrang ralkap pawl cu kannih Kalay PDF, CNDF, CDF KKG le RKDF pawlin August 3 zanlam nazi 5:30 hrawngah kan kap ih zan nazi 8:30 tiang doawknak a sosang. Ralhrang ralkap lamin ralthuampi an hman ciamco ruangah kannih mipi ralkap komkhawm cu dung kan sipsal.
“August 4, zinglam nazi 9 hrawngin Tayakung khua kiangkap ah kannih mipi ralkap komkhawm le ralhrang ralkap pawl kan do aw bet. Kalay thiamthil zirnak phunsang tlawngih um ralhrang pawl le Kalaymyo ralhrang hmunpi ih um ralhrang pawl cun ralthuampi thawn in rak kap ciamco ve ih, kannih khalin ralthuampi thawn ralhrang pawl kan kap ve. August 3 le August 4 ih ralhrang ralkap thawn kan doawknak ah ralhrang 15 an thi ih, hriamhma ngah tampi an um.
“Doawknak ah Kannih mipi ralkap komkhawm lamin Kalay PDF sungtel pakhat le pah-kah-phah sungtel 2, an zaten mipi ralkap pathum cun ram le miphun hrang an nunnak an hlan. Kalay PDF sungtel 10, CNDF sungtel 2, Pah-kah-phah sungtel 4, RKDF sungtel 1, kan zaten mipi ralkap 17 cun hriamhma kan ngah ve. Ralhrang ralkap cun August 4, zanlam ah Tayakung khua in inn hrekkhat an urkang.
“Kalaymyo thlanglam ih doawknak a sosang tuk laiah Tamu in Kalaymyo lamih feh ralhrang ralkap mawtaw 14 sungih to ralhrang mipum 60 hrawng cu lamzin tluanih bomb thianfainak nei tumin ke in an feh ih, zinglam nazi 11 hrawngah kalay PDF pawlin bomb 12 in an rak puah ih, ralhrang 20 hrawng an thih tlunah ralhrang hriamhma ngah tampi an um.
“Thi le hriamhma ngah an tam tuk ruangah ralhrang pawl cun Kalay le Tamu karlak peng 55 khua an luhcilh ih, khua mipi thenkhat an kai. Ralhrang ralkap pawl cun zanlam nazi 6 hrawngah Yazagyo khua cu ralthuampi in an kap ciamco. Zayagyo khua ahcun Kalay PDF le ralhrang ralkap kan do aw ih, zan sim hnu tiang doawknak thuhla cipciar cu felfai in kan thei hrih lo a si,” tin Kalay PDF cun thu an suah.
Tonzang CDF cun “Tamu in Kalaymyo lamih ra ralhrang ralkap mawtaw 10 cu peng 55-nak ah kannih CDF Tonzang, KPDF, PDF Zaygyo komkhawm pawlin bomb 30 in kan rak puah ih, ralhrang 50 hrawng an thih tlunah ralhrang 10 hrawng hriamhma ngah an um. Zanlam nazi 1:30 hrawngah Kalaymyo in damlo phur mawtaw an suak ih ralhrang thi le hriamhma ngah pawl kalay lamah an phurtlung ciamco timi thuhla felfai kan thei a si,” tin thu an rak suah ve.
Dalan Picang An Kap That – Ralhrang in dothlengnak ruangih an kaihmi mi 4 pawl an thlaithat hnuah ralhrang dinpitu hrekkhat pawl cu thlaithatmi pawl ih inn ah an feh ih, lungto in an inn pawl an deng. Cumi lakih tel dalan picang pakhat cu August 4 ah Yangon Liberation Force in an kap that tin thu an suah.
Yangon Liberation Force cun “Venglal Myo Gyat Aung cu dalan picang a si ih, thlaithatmi pawl ih inn dengtu ah a tel. Amah ruangah mino tampi kaihmi khal an um ih, ralhrang tuanpitu pakhat a si. Cumi ruangah a inn kan pan ih, August 4, sun nazi 12 hrawngah inn hmai tokham ih a tolai ah kan kap.
“Zamrang tukin inn sungah a lutih, inn sungah vei 6 ka va kap bet. A awm ah veikhat, a cal ah veikhat, a hna kiangah veikhat in kan kap fuh tukih a hmun rori ah a thi cih. A hlanah vei 2 rori ralrinnak kan pe zo nan, ralrin pekmi a thlun lo tlunah ralhrang lamtang pawl hotatu a si ih, kan thianfai lawlaw a si,” tin thu an suah.
Venglal a thih hnuah ralhrang ralkap pawl an thleng cih ih, kiangkap mino thenkhat kaihmi an nei tin veng mipi cun an sim.
SSPP Palai Le Min Aung Hlaing An Tongaw – Ralhrang ralkap hotu Min Aung Hlaing tong dingih hminpe tlangpar ralthuamkai pawlkom 10 lakin ralhrang hotu Min Aung Hlaing tong hrih lo SSPP cun August 4 ah Min Aung Hlaing an tong ve ih, thureltlangnak an nei.
SSPP lam siseh ralhrang lam khalin tonawknak ah ziang thu an rel, ziangvek remawknak an nei timi cu mipi theihternak an nei lo ih, remdaihnak hrang thu kan rel timi lawng mipi an theihter.
SSPP cu Shan ralkap pakhat an si ih, ralhrang ralkap thawn an boruak a siat laiah ralhrang hotu Min Aung Hlaing an tong. Kan dungah SSPP sawmmi Model Thin Zar Wint Kyaw cu ralhrang lamin an rak kaihsak tlunah SSPP sakhan pathum khal hmundang ah tthawn dingin ralhrang cun thu an rak pe.
Hivek ruangah SSPP le ralhrang ralkap karlak boruak a se tukih kap aw zik tiatia in an um. Asinan, tu ahcun SSPP palai pawlin Naypidaw ah Min Aung Hlaing an tong ih, an buainak a reh pei maw? remawknak felfai an nei pei maw timi cu caan in lai a rel cih mai dingah ruah si.
Shan ralkap pawlkom pahnih an um ih, SSPP le RCSS an si. RCSS khalin ralhrang hotu Min Aung Hlaing an rak tong zo ih, tuitum ah SSPP khalin ralhrang hotu Min Aung Hlaing an tong ve. Hitin Shan ralkap pawl cun Min Aung Hlaing remnak tuahpi an tumih, tutiang cu remnak felfai tuahmi an nei thei lo.
Ralhrang ralkap hotu Min Aung Hlaing cun tlangpar ralthuamkai pawlkom 10 ka ton zo bangin ka ton hrih lomi tlangpar ralthuamkai dang pawl khal tong dingin ka zuam dingih, ka ton zomi pawl khal thu ka relpi vivo ding a si tin mipi a simthei.
Ralhrang Cu A Takin Tuarter An Ttul Titu US Tlangsuak Upa – Ralhrang ralkap in rampi thuneihnak an lak veten Myanmar mipi dinpi ih ,theitawk in ralhrang pawl hremnak pe rerotu ram pakhat cu US an si.
Tu khalah US tlangsuak upa pakhat Connell cun ralhrang ralkap pawl cu tongkam lawngin sim an theih nawn lo ih, a takin hremnak pek ding rori kan si. Cumi ruangah ralhrang thu nan rel tikah hmuar nei sawn in rel uh tin US ramdang vuanci a cah.
US ramdang vuanci Blinken cu ASEAN ramdang vuanci meeting ah mikhual dinhmun in tel ve a si ih, ASEAN in Myanmar thuhla an relnak ah hmuar nei sawn ih rel dingin thu a keng.
US tlangsuak upa pakhat Connell cun “Ralhrang ralkap in duhtawk in mipi an that ih, duhtawk in mipi an hrem rero. Cucu ASEAN pawlkom in Myanmar mipi pawl nan bawm thei lo, nan humhim thei lo asile US cozah in Congress thupek vekin thuneihnak hmangih ralhrang ralkap a takin kan hrem a ttul. Ralhrang ih sumlu yinan le gas an tuannak MOGE khal hremnak pek ding an si,” tin a sim.
Malaysia In NUG Biak An Duh – A Tufang ASEAN sungtel ramdang vuanci pawl meeting an nei rero lai ih, Myanmar thuhla hleice zetin an relmi ah Malaysia cun ralhrang pawl an lungruh peh vivo asile NUG cozah sawn naih zetin be ding kan si tin thu an thehlut ve.
Singapore cun ralhrang pawl umdan le cangvaih dan zoh tikah ASEAN pawlkom ziangah in siar lo ih, ASEAN palai khal ziangah an ruat lo. Curuangah Ralhrang pawl kan ngaihsak reronak ding san a um lo tin thu an rak thehlut hmaisa zo.
Ralhrang in ASEAN thawn remnak an tuahpi 5 lakin pakhat hman an pitlin thei lo tikah ASEAN sungtel pawl an thintawp rero thangih ralhrang mizia diktak an thei thok rero thlang. Cumi ruangah ASEAN sungtel hrekkhat cun ralhrang siloin NUG sawn pehtlaih an duhsawn thlang. Asinan, ASEAN sungtel lakin ralhrang rak dinpi hrih khal an um ve.
Malaysia ramdang vuanci cun “Ralhrang thawn remnak kan neihmi 5 cu a takin fehpi thlang ding kan si. Pitlin dingin theitawk kan suah a ttul. Myanmar ram buainak ah ralhrang duhdan lawng siloin mipi duhdan vekin hrilawknak a um theinak dingah ttan kan suah a ttul. Curuangah ralhrang pawl lawng siloin NUG,tlangpar ralthuamkai le remdaihnak pawlkom pawl khal naih zetin kan biak a ttul thlang a si,” tin ASEAN ramdang vuanci meeting ah relsuak.
Tu ah ASEAN ramdang vuanci pawl cu meeting nei rero lai an si ih, thunet zinaghman an tuah hrih lo. Ramdang palai cio cun Myanmar thuhla an hmuh dan an sim cio ih ,ziangtin thunet an tuah timi cu meeting an theh tikah felfai sawn in mipi an theihter dingah ruah a si.
China In Taiwan Ramri Sung An Puah – Taiwan ttan tuktu US House Speaker Nancy in Taiwan a tlawng ruangah thinheng sosang ih ,cangvai ciamco China cun Taiwan ramri sungah bomb zamthei an kap lutih, raldo zirnak kan nei tin thu an suah.
US House Speaker Nancy in Taiwan a tlawn ruangah China cu an thinheng tukih a phunphun in an tongsuak. Nancy in Taiwan a suahsan fel zo nan, China lam an dai thei hrih lo ih, Taiwan ramri ah hro an suang ciamco.
August 4 ahcun China in Taiwan ramri ah raldo zirnak an nei ih, bomb zamthei hrekkhat cu Taiwan hmunram sungah an kap. Asinan, Taiwan mipi umak ah a tla lo ih, Taiwan tipi kap le tupi kiangkap ah China ih kahsuakmi bomb zamthei pawl cu an tla.
Hivek ruangah Taiwan cun khuatlawng lawng siseh vanzam hrekkhat khal zam theih lo dingin thu an suah phah. Thenkhat cun China in Taiwan an kap thok titiang thu rak suahtu an um nan, China in Taiwan khawpi an kap cu a si hrih lo ih, Taiwan hmunram sungah China cerek hrekkhat cu a tla rori. Asinan, Taiwan lam daiten an um hrih.
US House Speaker Nancy ruangah China le Taiwan karlak boruak cu a se deuhdeuh ih, China thinhengnak a dai thei hrih lo. China cun Taiwan lawng hro rero loin US khal an hro phah. Taiwan ramri ih raldo zirnak an neihmi khal an bansan duh hrih lo ih, cerek ngai tiang an hmang. Hivek a si vivo ahcun Taiwan lam an supawk thei lole buainak picang suak thei dinhmun vek cu an si.
Leave a Reply