Kalay Le Tamu Karlak Zan Zawh An Kham

Kalay Le Tamu Karlak Zan Zawh An Kham – Sagaing ramthen kalaymyo le Tamu fehnak lamzinpi cu zan nazi 9 in zinglam nazi 5 tiang zohman zawh lo dingin Kalay PDF cun thu an suah ih mipi an theihter.

Kalay PDF cun “A tufang Kalaymyo ih ral dinhmun ruangah kalay le Tamu karlak lamzinpi cu zan nazi 9 in zinglam nazi 5 tiang zohman zawh lo dingin mipi kan lo dil duh. Ralrinnak kan lo pe rero cingin a zawh thotho nan um asile buainak nan ton tikah kan lo theihpi lo ding a si,” tin thu an suah.

Ralhrang ralkap in thihdan an pekmi mi 4 a takin an thlaithat hnuah Myanmar ramsung hmun tinkim ah mipi ralkap pawl cun caksawn in ralhrang an do ding thu mipi theihternak an nei ih, ramsung mipi hrang vah sukso tikah fimkhur a tul zet dingin a lang.

Palik 3 An Tlansuak Ih, 2 An Kaisal – Ayeyarwaddy ramthen Ma Oo Pin myomah palik sakhan ih palik 3 pawl cu palik tuan paih nawn loin July thla thokah an rak tlanih, tlansuak palik 3 lakin palik 2 an kai ngahsal tin palik lam cun thu an suah.

Palik tlansuak pawl cu Myo Ko Ko, Lamin le Thet Naing Oo pawl an si ih, cawlh an dil hnuah an tlansuak. An tlansuah hnuin hmunhim lam an panlai ah palik pahnih an kai ngahsal ih, Ma Oo Pin thawnginn sungah an khum cih.

Ma Oo Pin palik zung cun “Sakhan in palik 3 an tlansuak ih,hmunhim lam pan an tum. Culaifang ah palik pahnih cu lamlak ah kan kai ngahsal ih, palik pakhat cu a tlansuak lanta thei. Kaihmi palik 2 cu palik sakhan ah kan khum men lo ih, thawnginn sungah kan kuat cih a si,” tin a sim.

CDM palik pakhat cun “Palik le ralkap dinhmun ihsin tlansuah hi a ol lo ngaingai. Tlansuah ding cun nulepa sungte pawl hmunhim ih an rak um ve a tul. Ahleice in nupi nei zo hrangah palik a tlan asile a nufa an him lo. Nulepa le sungkhat dang tivek cu an tuamhlawh tuk lo.

“Palik sinak ih tlan men in a cem hrih lo, hmunhim pan a tul hrih. Hmunhim kan timi cu ramdang lole tlangpar ralthuamkai pawl umnak hmun a sibik. Sakhan kan suahsan hnuah hmunhim kan thlen hlan sung cu kan him lo. Hmunhim thlen hnu lawngah hna a ngamfang. Tlansuak palik le ralkap hrimhrim cu zung lamin an theirang thei tuk, cucu buainak pakhat a si,” tin a sim.

Chindwin Tiva Ah Ralhrang Lawng An Kap Siat – Sagaing ramthen Mungzua myone Chindwin tiva tluanah mipi ralkap komkhawm cun ralhrang ralkap an do ih, ralhrang thi an tam tin mipi an theihter.

Mipi ralkap komkhawm Special Force cun “Kani lamin ra ralhrang ralkap lawng 8 cu kannih mipi ralkap komkhawm in kan rak do. Ralhrang ralkap pawl khalin in rak kap ve ih, minute 50 sung tipar ah kan kap aw ciamco. Kannih cun hlaral deuh in Sniper thawn ralhrang ralkap pawl kan kap ih, annih ralhrang ralkap pawl cu ralthuampi tiang an hmang.

“Asinan, ralhrang pawl ih kahsuakmi ralthuampi cerek cu tipar ah a puak thei lo. kannih cun ralhrang lawng 8 lakin lawng pahnih kan kap siat ih khu a suak luihlo. Doawknak ahcun kannih mipi ralkap komkhawm lamah nunau Commandoo pawl khal an tel ve.

“Doawknak a um timi thei in mipi ralkap dang cun lenglam in ralhrang pawl an rak kap ve ih, ralhrang pawl cu hmainor thei loin an um. Ralhrang ralkap pawl an tlannak lam khalah mipi ralkap dang pawlin an rak kap bet tin thuhla kan thei. Doawknak ah ralhrang thi an um rori ding nan, a zat kan fiah thei lo a si,” tin mipi an theihter.

Ruang An Phut – Ralhrang ralkap in thihdan an pek hnuah an thlaithatmi mi 4 lakih tel Hla Myo Aung le Aung Thura Zaw ih sungte pawl cun ruang an hmuh hlan sung cu an fate thi an pom thei hrih lo thu mipi an simthei.

Ralhrang ralkap cun thihdan kan pekmi mi 4 pawl cu thihdan kan pek bangin kan thlaithat zo tin thu an suah ih, simfiangnak dang kan nei lo ding, thuthang ih kan suah bangin thihdan pekmi mi 4 pawl cu retthat thluh zo an si tin an sim.

Thu umdan le ralhrang thusuah dan zoh tikah ralhrang in an thlaithat rori dingin a lang nan, thlaithatmi sungte pawl cun thlaithatmi pawl ih ruang tal an hmuh lo ahcun an zum thei lo thu an sim ve. Asinan, ralhrang lam cun thlaithatmi pawl cu ruang pek an sidah lo ih, ruang kan lo pe thei lo tin an rak sim zo.

Hla Myo Aung ih sungte pakhat cun “Kannih cun an thi zo tin kan pom duh hrih lo,ziangahtile an ruang tal kan beisei hrih. An ruang in hmuh thei lo asile ziangtik ni le caan ah an thlaithat, khawitawk hmunah timi khal in simthei ding an si. Tu ah an thi tin kan cohlang men asile ralhrang lamin thu cipciar in sim duh nawn lo ding. Curuangah a ni le caan , a hmun tal in simthei dingin kan dil rero lai a si,” tin a sim.

ASEAN Le UN In Ralhrang An Mawhthluk – Ralhrang ralkap in thihdan an pekmi mi 4 an thlaithat thu ah ASEAN le UN an țongsuak ve ih, an riahsiat tuk thu mipi an simtheih tlunah, ralhrang cangvaih dan an mawhthluk thu khal an tarlang.

ASEAN Chairman Hun Sen cun “Myanmar ram buainak ah remdaihnak um dingin theitawk kan zuam rero ih, kan be aw rero lai hrih. Hivek caan ah ralhrang pawlin mi 4 an thlaithat men cu riahsiat thlakza ngaingai a si ih, an cangvaih dan a atthlak tuk.

“Ziangtin Myanmar ram buainak ah remnak a um thei ding tin theitawk kan suah rero laiah ralhrang ralkap cun theitawk kan suahmi ziangsiar loin thu an suah men ih, kan zuamnak cu zianghman lo ah an suah. Remnak 5 kan neihmi khal an thlun duh lo tinak a si ih, ralhrang pawl cangvaih dan cu kan mawhthluk tuk rori a si,” tin a sim.

UN sungtuan Guterres cun “Ralhrang ralkap in Democracy duh ih cangvaitu pawl an kaih tlunah thihdan an pe ih, a takin an thlaithat men. Cucu kannih UN in kan mawhthluk tuk lawlaw. Hivek ih cangvaih duhnak an neih ruangah President U Win Myint, Daw Aung San Suh Kyi le ram buainak ruangih an kaihmi zaten thlah zalen thluh dingin kan dil a si,” tin a sim.

Phuba Laknak Ah Ralhrang 15 An That – Sagaing ramthen Minmoe myone Minmoe khuapi in suak ralhrang ralkap pawl cu Mimoe PDF komkhawm in an do ih, ralhrang 15 an thi tin mipi theihternak ca an suah.

MinMoe PDF cun “July 25, zinglam nazi 6:21 hrawngah Mimoe khawpi in ralhrang hrekkhat an suak ih ,lamzin tluanih kammi bomb thianfai an tum. Ralhrang pawl bomb hawl ih an vah laiah kannih mipi ralkap komkhawm 5 cun bomb kan puah ih, ralhrang 15 an thi. Ralhrang 20 hrawng an si ih, hinah bomb kan hmu tin lungawi zetin a au. Bomb an hmuhmi thianfai an tum laifang ah kannih cun Paditar bomb 10 in kan puah ih ,kan kap bet.

“Paditar bomb kan puahmi ahcun ralhrang 13 an thi ih, ralhrang 7 hriamhma an ngah. Zinglam nazi 8:30 hrawngah lamzin ih ralhrang umhmun khuarnak kan kap betih, ralhrang 5 um lakah ralhrang 2 an thi. Ralhrang dang 3 dang cu tih le khur phah in an tlansuak man. Kannih mipi ralkap komkhawm lam cu kan him thluh a si,” tin thu an suah.

Minmoe PDF thuphuangtu cun “Ralhrang pawl rapthlakzia kan thei thluh zo ih, daten ummen a theih nawn lo. Tuitum khal dothlengnak ih nunnak hlantu pawl hrang phuba la in ralhrang kan that. Hmailam khalah caksawn in ralhrang kan do vivo ding a si,” tin a sim.

China In US Dilnak An Nei – A Tufang leitlun ih sibik cuh aw rero US le China cu an rem aw taktak thei lo ih, sipuazi le ral dinhmun ah an el aw ringring.

Tukhalah China cun US cu saklam ram pawl ah hmunram kauh vivo lo dingin le ramdang buainak ah hrolh aw vivo lo dingin an theihter. Kan dungah US cun ASEA hmunpi sungin ram tampi an rak tlawng kual ih, tuanpi tum dan an relpi hai tlunah China thuhnuai ih um lo dingin sawmnak an nei vivo.

US cun China kuthnuai ih ramdang pawl an um ding duh lo tukah Asia lamtiang tuanpi ding hawlin khual an tlawng rero. Hivek cu China in zohhar a rak ti tukih US hnenah ramdang buainak ih tel lo dingin le saklam ram pawl ah hmunram kauh vivo lo dingin an simthei. Tutiang cu US lamin China ih thusuak an let hrih lo.