Sagaing ramthen Kalaymyo ah tui kum hrang tlawngap zaten 8313 an um thu Kalaymyo fimzirzung cun thu an suah.
Ralhrang kuthnuai ih rampi huap fimzirzung cun May 26 in, June 1 tiang tlawnghmin pek caan an rak on ih, June 2 in tlawngap pawl tlawngkai thok ding tin thu an rak suah.
Kalaymyo sungin tlawngap zaten 8313 lakah suakthuan tlawng 11, suakthuan tlawng khuai 5 ah suakthuan tlawng kai dingin tlanap 772 an um ih, lailak tlawng 2 le lailak tlawng khuai 9 in lailak tlawng kai dingin tlawngap 2336 an um. Hramthok tlawng 9 in hramthok tlawngkai dingin hminpe 5241 an um ih, tlawng zaten 38 in tlawngap zaten 8313 an um.
Ralhrang ralkap cun tui kum hrang tlawngap tikah tlawng thilri ziangkim man nan la lo dingih, a lak hlir in nan pe ding tin thu an suah. Kalay peng sungah suakthuan tlawng 23 le suakthuan tlawng khuai 22 a um ih, ram buainak ruangah suakthuan tlawng 11 le suakthuan tlawng khuai 5 lawng an ong thei. Cutilai in bulpak tlawng hrekkhat khal tlawngta cohlang an um ve.
Ralhrang In An Kuthnuai Kum 5 Hremnak An Pe – Ralhrang ralkap cun an kuthnuai ih hnatuan pakhat cu a hna in bannak ca a dilmi online ih a thlah ruangah , kum 5 sung thawngtla dingin hremnak an pe.
Ralhrang ih hremnak pekmicu president hlun Win Myint le Daw Aung San Suh Kyi zingzoitu digih an dimi salungtung pawlkom ih tel a si. Salungtung pawlkom pawl cu ralhrang in rampi thuneihnak an lak hnuah Daw Suh le U Win Myint sual puh dingin dinmi pawl an si.
Curuangah, an hna a si vekin Daw Suh le Win Myint cu thuphunphun in thubuai an tuahsak ih, an thuphan phuahcopmi a darh tikah silungtung pawlkom ih ralhrang pawl cu an hna in ban an duh. Cumi ruangah mipum 20 hrawng cu ralhrang pawlkom dinmi Salungtung pawlkom in bannak ca an theh lutih, an lakin Daw Soe Sanda cu a bannak ca online ih a thlah ruangah ralhran in kum 5 sung thawngtla dingin hremnak an pe.
Ralhrang thuthup phuangtu cun “Mipum 20 hrawng cu bannak an thehlut ih, an lakah mino an tamsawn nan, ralbawi pakhat khal a tel. Ralbawi tel cu Kaya ramkulh ralhrang bawi sangtu a si. Daw Suh le Win Myint thuhla dik lo zetih an phuahmi a darh tikah bannak thehlut an si.
“Bannak thehlttu lakin pakhat cun Online ah bannak a thehlutmi a pholang ih, ralhrang ralkap lamin an theihtikah an thinheng tuk. An kai ih, kum 5 sung thawngtla dingin hremnak an pe zo a si,” tin a sim.
Karen Ah Ralhrang 71 An Thi – Karen ralkap KNU hmunram pakhatnak sungah ralhrang ralkap le KNU pawl may thla sungah vei 41 an do aw ih, doawknak ah ralhrang ralkap 71 an thi tin June 2 ah KNU cun thu an suah.
Doawknak ah KNU ralkap KNLA le KNDO sungin miraltha pahnih an thi. Ralhrang cun KNU hmunram pakhatnak sungih KNU ralkap pawl donak ah raldonak zamram vei 2 an hmang. Ralhrang in tlunsang in hnuailam an kah ciamco ruangah mipi 11 a kang.
May 1 sung, KNU hmunram pakhatnak ih doawknak ah KNU cun ralhrang mawtaw 5 kan siatsak thei tin an thusuahmi ahcun an tarlang. KNU le ralhrang doawknak ruangah mipi 2 an thi ih, ralhrang in mi 24 an kai.
Doawknak ruangah ralhrang lamin hriam ngah 53 an um ih, KNU lamin hriam ngah mi 11 hriam an ngah ve. Mipi lak khalin hriam ngah 3 an um. Tuitum ih KNU thusuahmi cu KNU hmunram pakhatnak sungih ralhrang thawn an doawknak thuhla a si ih, KNU in hmunram tampi an nei.
Leave a Reply