Sagaing ramthen kalaymyo Indaikung vengih ahmat 9 vengih suakthuan tlawnginn sungih tlawng saya/mah pawl umnak inn cu June 2 ah mi pahnih in an nawkkang nan, kiangkap mipi in an mit man tin an sim.
Indaikung vengih um pakhat cun “Zan nazi 10 hrawngah a si ih, mi pahnih in tlawng sungih tlawngta zirhtu pawl umnak inn an nawkkang. Asinan, tlawnginn kiangkap ih um mipi pawl in a caan khel in kan mit man. Ziang pawlkom ih tuahmi a si ti cu kan thei lo. Tlawnginn cu veng mipi sumpai thawhkhawm ih kan sakmi a si,” tin a sim.
Ralhrang in tlawng an phuan hlan May 29 zan khalah Kalaymyo Sanmyo vengih ahmat 8 tlawnginn cu zoti theih lo pawl in an rak nawnkkang zo. NUG cozah cun tlawnginn siatsuah, tlawnginn bomb puak le tlawnginn nawkkang tivek an cohlan lo thu May 3 ah thu an suah ih, an kuthnuai PDF pawl khal tlawnginn siatsuah lo dingin an theihter.
Sagaing ramthen Kalaymyo sungah suakthuan tlawng 23 le suakthuan tlawng khuai 22 a um ih, ram buainak ruangah suakthuan tlawng 11 le suakthuan tlawng khuai 5 lawng an ong thei. Kalaymyo sungah suakthuan tlawng, lailak tlawng le hramthok tlawng 38 ah tlawngap tlawngta 8559 an um tin Kalay fimzirzung cun thu an suah.
Rihkhawdar Tlawnginn Ah Bomb A Puak – Chin ramkulh Falam peng Rihkhawdar ahmat 2 veng Ah-Htah-Kah – khuai tlawnginn kulhsung ah bomb a puak ih, mipi thinphang cu Mizoram lamah tlan an um.
June 3, zan nazi 8 hrawngah bomb puak a si ih, mipi tlan pawl cu June 4 ah kirsal an um. Bomb cu tlawnginn kulhsung ah puak a sinan, tlawnginn a siatsuah ngah lo tin khuami pawl cun an sim.
Rihkhawdar ah ralhrang ralkap in tlawng an phuan thei lo nan, mipi tangrual in tlawng an phuan ih, tlawngkai an um tin an sim. Rihkhawdar ahmat 2 vengih tlawnginn sung bomb puak ruangah ralhrang mipum 20 hrawng cun June 4 zingah ramri zohfelnak an nei ih, nazi 3 sung hrawng ramri ah ralhrang pawl an um tin khuami pawl cun an sim.
Tedim ahcun CDM tlawng saya pahnih cu an CDM ruangah June 3 ah ralhrang ralkap pawlin an kai ih,an hruai. Ralhrang pawl cu CDM tlawng saya pahnih tei inn ah an va feh ih, inn sung ihsin an hruaisuak. Ralhrang kaihmi CDM saya pakhat sawn cu hramthok tlawngta zirhtu a si ih, pakhat sawn cu lailak tlawng zirhtu a si.
Tedim ahcun Tedim ram sungih um ZRA pawlin tlawngkai khamtu pawl hremnak an pek ding thu a sim ih, NLD cozah san ih cazirmi thotho tlawngta pawlin an zir ding ruangah kum 2 sung tlawngkai thei lo tlawngta pawl hrang tlawngkai a thabik a si tin thu an suah.
PDF In China Thilri Phur Mawtaw An Kap – Sagaing ramthen Salingyi myone sungih China le ralhrang tuantlangnak Upaing company ih tuahmi darsen pawl cu hmundang ah kuat dingin an phurih, PDF pawl cun May 3 ah lamlak ah an rak kap.
MRA PDF hotu cun “Ralhrang le China tuantlangnak ih an tuahmi densen phurtu mawtaw cu zinglam nazi 11 hrawngah bomb kan puah ih,kan kap bet. Darsen phurtu mawtawpi cu ralhrang mawtaw 50 hrawngin an thlun. Darsen phurtu mawtaw dungah ralhrang mawtaw 4 an um ih, cumi lakin ralhrang to tambiknak mawtaw bomb kan puah. Cumi hnuah kan kap betih, ralhrang thi an um rori ding nan, a zat kan fiah thei lo,” tin a sim.
Ralhrang mawtaw cu Salingy ,Mungzua in mandalay lamzin ah feh vivo an si ih,Chuang Oo myone sungah an kap. Ralhrang mawtaw kaptu mipi ralkap pawl cu MRA le Revolution Force an si.
Ralhrang In Inn Thawng 20 Tlun An Nawkkang Zo – Myanmar ralhrang ralkap in rampi thuneihnak an lak hnuah mipi inn thawng 20 tlun an nawkkang zo tin hminsin tuahtu ISP Myanmar cun thu an suah.
Hminsin an tuahmi cu ralhrang in rampi thuneihnak an lak caan 2021, February 1 in May 26 tiang lawng a si hrih ih, May 26 in June 4 sungih ralhrang urkangmi inn pawl an tel hrih lo. Ralhrang ralkap cun may thla sung lawngah Myanmar rampi huapin inn 7662 tlun an nawkkang man.
Ralhrang ralkap cun rampi thuneihnak an lak hnu February 1 in may 26 tiangah rampi huap in mipi inn 22299 an nawkkang zo. Ralhrang ralkap cun Sagaing ramthen sungin inn 15530 an nawkkang zo ih, Makui ramthen sungin inn 4822 an nawkkang zo. Culo inn 1947 pawl cu Chin ramkulh, Kara ramkulh, Shan ramkulh, Mandalay ramthen, Tanintaryi ramthen, Pago ramthen pawlin an si.
ISP tuanvo neitu cun “Hivek in ralhrang in mipi inn an nawhkangmi pawl hminsin kan tuahnak san cu ralhrang pawl leitlun daan an pahbalmi pholangnak le ralhrang pawl sual tuahmi hminsinnak a si. Tuih hminsin kan tuahmi pawl cu ramsung rinsanmi media pawlih tarlangmi hmangin le mibawmtu pawlkom hnenih thuhla kan don dan in a si.
“Curuangah cazin kan suahmi hnakin innkang a tamsawn thei ih, a malsawn cu a si thei hrimhrim lo. Ralhrang in inn an urkangmi ah mipi inn, pawlkom inn, biaknak inn, tlawnginn le sizung le raltlan umnak inn tivek tiang a tel. Hivek cu leitlun ralkap lakah ralkap sualbik rori an si. Ralkap timi cu mipi humhimtu ding, ram humhimtu ding an sinan, tu ahcun mipi neihsiah le nunnak latu men an si,” tin a sim.
Ralhrang In Daw Suh Kyi Thubuai An Orhter Bet – Ralhrang ralkap cun Daw Aung San Suh Kyi cu 2020 rampi hrilawknak thawn pehpar aw in vote dik lo tuahtu ah a tel an ti ih, thubuai dang an orhter bet.
Ralhrang in thubuai an tuah thok ah Court in a cohlan ding le cohlan lo ding relnak an nei hmaisa ih, cumi ahcun Daw Suh Kyi in an puh bangin zianghman tuahsualmi a neih lo thu a sim. Asinan, Court cun thubuai cu an hek bangin relfel a si ding tin hektu pawl ih heknak a cohlang.
Thubuai thawn pehpar aw in theihpitu pawl cu June 10 ah thusuhnak an nei dingih, cumi caan ah Daw Suh Kyi ah Court feh dingin an theihter.
2020 rampi hrilawknak tuanvo neitu pawl cun diklonak zianghman a um lo tin ralhrang puhnak an let ih, ralhrang in kan zohfel ding an timi an rak duh lo. Cumi phuahhlam in ralhrang cun rampi thuneihnak an la ih, Daw Suh tlunah 2020 ih rampi hrilawknak tuanvo neitu pawl khal dik lo zetin hrilawknak tuah timi hmangin thubuai an tuahsak thluh.
Ralhrang cun rampi thuneihnak an lak hnuah Daw Suh Kyi cu thubuai 19 an orhter zo ih,thubuai 6 hrang kum 11 sung thawngtla dingin hremnak an pe zo. Tu ah thubuai dang 13 cu Court ah rel rero lai a si.
Turkey In Min Aung Hlaing An Zingzoi Thok – Ralhrang ralkap hotu Min Aung Hlaing siseh a kuthnuai pawl telin Myanmar ram sungih ralkap daan an pahbalmi le miphun cimit sual an tuahnak pawl Turkey in a zingzoi thok tin Myanmar Accountability Plan ( MAP ) pawlkom cun thu an suah.
MAP cun Myanmar ralkap pawl ih sualzia, rapthlakzia le mipi parih an cangvaihnak borhbah tuk pawl cu Turkey Court ah kan thlen ih, Turkey lamin a takin zingzoinak an nei thok tin MAP cun mipi an simthei.
MAP Director Chris Gunnes cun “Hivek thiltheng dah lo,Turley lamin zingzoinak an nei thok timi cu leitlun kilkip in an thlir thluh ih, ralhrang hotu le a kuthnuai pawl a takin thubuai tuahsak thei dingin lamzin tha tuk a si timi cu mipi kan lo theihter duh,” tin a sim.
Hivek cu ramdang ram pakhat in Myanmar ralhrang hotu siseh a kuthnuai pawl an tuahmi tha lo ruangah an zingzoi hmaisa bik caan a si ih, Rohingya thubuai hnuah Myanmar ram a buai betmi cu Turkey in Myanmar ram buainak an ngai thupi sinsin.
MAP pawlkom cun ralhrang hotu le a kuthnuai pawl ih ral daan pahbalmi , mipi parih ralthuam an hman dan pawl an neihmi zaten khal Turkey hnenah an kuat ding thu an sim ih, MAP cun leitlun palik hnen khalah Min Aung Hlaing kai dingin zual an ko peh vivo.
Ralhrang in rampi thuneihnak an lak hnuah duhtawk in mipi an that, mipi inn an nawkkang ih, daan an pahbalmi pawl cu NUG cozah in ICC Court, ICJ Court le Argentina Court pawl ah heknak an thehlut zo nan, NUG cozah ih heknak thehlutmi cu tutiang thu felfai letnak a um thei hrih lo.
Khatlam ah Turkey cun an ram hmin cu Sai-ar Turkey thawn leitlun in an hman polh ringring ruangah UN ah an ram hmin thleng dingin an dilnak cu UN in a cohlan sak zo ih, Turkey si nawn loin Turkiye a si thlang ding.
Mirang pawlin Thaks Giving Day an hman caan ih an ei uarbikmi cu Turkey arsa a si ih, leitlun cun Turkey arsa le Turkey ram cu pehparawknak nei dingah an ruat. A taktak ahcun zianghman pehparawknak a rak nei lo ih,cumi ruangah Turkey cun an ram hmin an thleng phah sawn.
Leave a Reply