Karen Mipi In KNU Hotu Pawl Bang Dingin An Phut – Thailand le Myanmar ramri ih China hnatuannak pakhat ah KNU Central hotu pakhat a tel ti’n thu a suak hnuah Karen pawlkom 68 cun KNU Central hotu zaten bang dingin an phut ih ca an kuat.
China cun Shwe kukko khawpi thar kiangah Huangya timi khawpi din an duh ih KNU hnenah dilnak an nei. Cucu,Central KNU sungtel Pado Saw Roja Khin a rak sian tlunah khawpi thar dinnak hrang puai an tuahmi khal ah a telpi. China in ramri ih khawpi thar an din tummi cu lawngkasa tuahnak, minung zuarnak, online mibumnak, taksa zuarnak le rittheihsi thamnak hmunpi ding a si tin Karen pawlkom 68 cun an sim.
China in khawpi thar an din tumnak hmun cu Myanmar ramsung Karen ramkulh sung a si ih, ralhrang rem tinak an neih ding tlunah KNU ih rem tinak khal an ngah a tul. Tu ah China in khawpi thar din dingin timtuahnak an neih zo ruangah KNU le ralhrang lamin siannak an pe siko ti’n Karen pawlkom cun an tarlang bet.
Karen pawlkom 68 cun “Tui dinhmun KNU central hruaitu lakah ralhrang tuanpitu an um. Cumi ruangah tu vekin China in khawpi thar hrang kekar theinak an neih phah. Hivek milak tlak lo KNU hruaitu thenkhat pawl cu pawlkom dan thlun lo an si tlunah pawlkom le miphun hminsetertu an si.
“Hotu in thilsual an tuah cun an tuah bangin tuar ngam ding le tuanvo la ngam ding an si. An kekar dan ruangah Central KNU hotu pawl bang dingin kan phut ih, an hna in cawl haiseh. Hruaitu thar cu dik takin hril sisehla hruaitu thar hril an si hlan khalah tu ih mihlun pawl siloin lailak hruaitu ret thotho kan duh a si,” tin cakuat ahcun an telh.
Karen pawlkom 68 in KNU ca an kuat thu ah KNU lamin zianghman thu a suak hrih lo. KNU hi kum 2 ah veikhat hrilaw ding an si ih, kum 4 sung hrilaw thei loin an um zo. Hmaisa cu covid 19 natnak ruangah KNU hruaitu thar ding an rak hril thei lo ih, neta sawn cu Karen ramkulh sungih doawknak a sosang ruangah hrilawknak an tuah thei lo. Hrilawknak an tuah ding tikah hmun tin ih KNU hotu pawl hmunkhat ah an fehkhawm a tul ih, ral buai lai thawn a remcang thei lo ti’n an sim.
Min Aung Hlaing In NLD A Mawhthluk – February 23 ah ralhrang ralkap hotu Min Aung Hlaing le a kuthnuai pawl Naypidaw ah meeting an nei ih cumi ahcun Min Aung Hlaing in NLD mawhthluknak a nei.
Min Aung Hlaing cun “Tuih ramsung thilri man a kai ciamconak san cu ahlan cozah NLD ruangah a si. A hlan cozah san ah ramsung suak a tlaniam ih ramleng lawnglawng ah an rak kuat ciamco. Curuangah ramsung ih tuahsuaknak ah kan tlasam tukih ramleng thilri lawnglawng an rak ring. Tu ahcun cucu kan tuar ih thilri man a kai phah thluh a si,” ti’n a sim.
Min Aung HLaing ih tongmi cu NLD lamin an pom lo zetih anmah ralhrang in rampi thuneihnak an lak ruangah le rampi kaihruai dan an thiam lo ruangah ramsung thilri man kai thluh a si ti’n an sim ve.
Min Aung Hlaing cun rampi thuneihnak an lak san khalah NLD vote dik lo a rak puh zo ih, rampi thuneihnak an lakfel veten NLD hruaitu le NLD sungtel pawl a rak kai ciamco. Tu khalah NLD hotu bik Daw Aung San Suh Kyi cu kum 33 sung thawngtla dingin hremnak an pe zo ih President Win Myint khal kum 12 sung thawngtla dingin hremnak an pe.
UN Ah Russia Thu An Rel – Russia in Ukraine an do caan kum 1 a kim thlangih UN khalah Russia in Ukraine an do thu an rel. UN ih thurelnak ahcun ram tamsawn in Ukraine ih Russia ralkap pawl anmah an ram Russia ah tlung thlang dingin lungkimnak an nei.
UN sungtel ram 141 rori cun Russia ralkap pawl cu Ukraine ram suahsan in anmah Russia ah tlung hngal dingin an duh ih vote an pe. China cu khawilam hmanah vote pe loin an um ih Russia an dinpinak cikhat a siko titu an um. Belarus, N.Korea, Eritrea , Mali ,Nicaragua ,Cuba le Syria ram pawl cun Russia an dinpi. Ram 32 palai pawl cu khawilam khalah vote pe loin an ummen.
Tuitum an thurelmi cu tuah dingih an duhmi zalen zetin relnak men a si ih, an thusuah bangin Russia lamin an tuah lo asile hremnak pek ding tivek a um lo. Cutikah UN sungtel tamsawn ih duhdan vekin Russia lam an cangvaih hmel lo.
Russia president Putin khalin Ukraine an do peh vivo ding thu a rak sim zo sawn. Ukraine khalin an ram an humhim peh vivo ding thu an sim ve zo. Curuangah ram pahnih hi remawk lam hnakin doawk lamin an feh vivo hrih dingin a lang. US, NATO le Europe ram dangdang cun Ukraine an bawm peh rero ih, doawknak cawhter an tum lo. Russia khal dungsip an tum ve lo tikah an do aw vivo hrih dingin a lang.
Leave a Reply