Karen Ralkap Veve An Kap Aw – Tanintharyi ramthen Myeik le Dawai karlak KNU hmunram 4 sungah karen ralthuamkai veve KNLA le Kawtholay army KTLA pawl an kap aw ih KTLA lamin mi 3 an thi ti’n BBC cun a tarlang.
Kawtholay Army KTLA sungtel cun “Mipum 50 hrawng kan si ih, kan ramri in ra nor ruangah kan rak kap. Meithal zun 5 le ralthuam dang kan laksak thei. Tu khalah kan boruak a sosang tuk a si,” ti’n BBC a sim.
KNU ralkap KNLA le Kawtholay Army KTLA pawl hi February 20 ah kap aw an si. Kawtholay Army KTLA hi KNU ralkap KNDO ihsin suak ralbawi Sawne Da’miah ih dinmi a si. KNDO a suahsan hnuah Saw Ner Da Miah cun Kawtholay Army TKLA a din cih.
KNDO ralbawi dinhmun ih Sawne Da’miah a umlai ah ralhrang cun mipi 25 thattu an puh. Saw Ner Dah Miah cun an thahmi mipum 25 pawl cu mipi an silo ih ralhrang kuthnuai thlingthlatu an si ti’n a sim ve. Ralhrang cun KNU hnenah an ralbawi Saw Ner Dah Miah hrem dingin ca an kuat. Cutikah KNU cun zingzoinak an nei ih an ralbawi Saw Ner Dah Miah cu an hna ihsin an rak bangter.
Saw Ner Dar Miah khal KNDO ralbawi sinak in an banter hnuah ralhrang uknak kan do vivo duh ti’n Kawthoolay Army a rak din ve. KNU cun Saw Ner Dah Miah in Kawtholay Army a din cu an pom lo thu a sim ih pawlkom panih an rem aw. A phunphun in an rak el aw zo ih, tuitum ahcun a takin an do aw thlang.
Karen ralthuamkai veve an doawk tikah Karen mipi in an tuar ih, Karen veve cu doaw lo dingin Karen pawlkom 46 cun dilnak ca an suah cih ve.
Karen pawlkom 46 cun “Kannih Tanintharyi ramthen sungih um Karen mipi pawl cun kan umak hmunah karen ralthuamkai veve do aw lo dingin February 7 ah thu kan rak suah zo. Asinan, February 15 ah Karen ralthuamkai veve nan do awsal. Hivekin mah le mah nan doawk tikah kannih mipi cu thinhar riahse le mangbang vansang in kan um.
“A tufang rampi buainak ah ralhrang do rero a si ih, cuvek caan ah karen ralthuamkai veve nan do aw men cu kan riahse tuk lawlaw. Remawknak um dingin KNU cun ralbawi an thlah ti kan thei ih, a rangthei bikin remawknak um dingah mipi cun kan duh. KTLA le KNLA hruaitu pawl khal zamrang zetin tongaw uhla remnak tuah uh. Buainak tuah hmang ralthuamkai, mipi tuar ding zawngih cangvai ralthuamkai le mah hamthatnak lawng zoh ih cangvai ralthuamkai tivek kan duh lo a si,” tin Karen pawlkom 46 cun thu an suah.
Taninthar ramthen Myeik le Dawei karlak ahcun February thla thok hrawngin Karen ralthuamkai veve KNLA le KTLA an rak buai thok zo. February 15 ih an doawk hnuah February 20 khalah doaw bet an si.
NUG In Meeting Thurelmi Mipi An Sim – NUG cozah sungtel pawl thlatin meeting an neihmi cu February 21 khalah meeting an nei ih, meeting ih an relmi pawl khal mipi theihternak an nei.
NUG cozah sungtel pawl cu February 21, zinglam nazi 10 ah meeting an nei ih, Meeting ahcun NUG lailak president Duwa Lashila , Prime Minister Man Win Khaing Than le vuanvi dang khal an telkim ti’n an tarlang.
NUG meeting ahcun lailak President Duwa Lashila cun hitin thusimnak a nei “Hmaisa bik ih kan sim duhmi cu EU in ralhrang hotu siseh ralhrang pawlkom pawl hremnak an pekmi ah ralhrang tlunzuang hrang datsi laluttu pawl an tel. Cucu kannih NUG hrang siseh mipi hrang khalah lungawiza ngaingai a si. Ralhrang hrang ralthuam leitu pawl khal an hrem tel. Curuangah EU parah kan lungawi ngaingai a si timi kan sim duh.
“Khatlam ah dothlengnak ih hmai in hruaitu tlangpar miphun le mipi pawl parah lungawi thu kan sim duh. An tuar theinak , an tumruhnak, an zuamnak le dothlengnak hrangih an pekmi pawl hi a ropi tuk lawlaw. Ralhrang uknak a hram in phong ko do kan tummi ah tlangpar miphun pawl hi thupi hleice le a hram pakhat an si. Tlangpar miphun pawlih tanpinak ruangah tuvek dinhmun thleng thei kan si ih dothlengnak kan tuah reromi hi nehnak hram a si zo.
“Ralhrang pawlih hmanrua pakhat cu mipi karlak le mipi ralkap karlak ah buainak um dingih tawtok a si. Curuangah ralhrang thang lakin mipi siseh mipi ralkap pawl khal kan fimkhur a tul nasa. Kan tanrual a tul, kan lungrual a tul. Curuangah kan rel rero zo bangin tlangpar ralthuamkai pawl thawn khalin a takih tuantlang sinsin dingin le remnak um dingin caan thupi a si. Tlangpar miphun pawl siseh tlangpar ralthuamkai pawlih rin ngammi Federal Democracy uknak thu khalah remnak felfai kan neih a cu tuk zo a si,” tin NUG lailak president cun a sim.
NUG meeting ah Prime Minister Mann Win Khaing Than khalin hitin thu a sim, “Tu caan ah ralhrang pawl an thazang a mal zetih kannih dothlengnak tuahtu pawl hmailam kan pan rero zo. Hivek dinhmun ah kannih dothlengnak tuahtu pawlkom lakah khat le khat rualremnak, khat le khat tuantlangnak, uknak felfai din dan ding tivek pawl a takin nei thlang ding kan si.
“khatlam ah ralhrang pawl hi mipi parah an sual deuhdeuh ih rapthlak deuhdeuh in an cangvai. Curuangah kannih khalin mipi humhim dan ding lamzin dang kan hawl vivo a tul ve. Ralhrang cu an uk theilonak hmunah Martial law an phuang ih cumi hmangin mipi dekcok vivo an tum. Curuangah ralhrang pawl cangvaihnak cipicar felfai zetin nei ding kan si ih, ralhrang pawl hrem an si theinak dingah theitawk zuam peh vivo ding kan si.
“Ramdang media ah ralhrang thuhla kan thehdarh sinsin a tul ih ramdang Court ah theitawk kan suah hrih ding. Ramsung ahcun theitawkin mipi uknak kan din vivo ih khawpi tamsin ah mipi uknak din vivo dingin kan zuam. Kan tumtahmi Federal Democracy uknak hrang khal reltlangnak kan nei rero ih, a dikmi uknak, mipi duhmi uknak din dingin kekar rero kan si,” ti’n NUG prime Minister in a sim.
Russia In Ukraine An Do Peh Ding – Russia President Putin cun February 21 ah Russia mipi thucahnak an nei ih, cumi ahcun Russia in Ukraine ram kan do bet vivo hrih ding, a san cu Ukraine ram in buainak hram an thok ruangah a si ti’n a sim.
Putin cun “Kan ramsung buainak hi thlianglam ram pawl cun leitlun buainak pi ah suah an tum. Thlanglam ram pawl ih thiltum hi kan theifiang tukih, curuangah a sidan ding vekin kan thungrul vivo ve ding. Buainak taktak hi thlanglam ram NATO sungtel le US pawl ruangah a si. Buainak suak dingin Ukraine taw an tokih buainak a suak. Buainak suak cu kannih ralthuam hmangin daihter kan tum rero men.
“Ukraine hrangah ralthuam an pe rero, rak thei haiseh. Ukraine hrangih ralthuam an pek tam poh le kannih khal kan hrang tihnung pawl thianfai dingin fimkhurten kan cangvai sinsin ding. Ukraine mipi le cozah tlunah an ram hruaitu pawl hi NATO le US in duhduh in an bum ih NATO le US kuthnuai ah an um thluh zo. Ukraine cozah khalin Ukraine mipi hrang tuahmi zianghman a nei lo a si,” ti’n PUtin cun a sim.
Tu ah Russia lamin doawknak bansan an tum lo thu an sim ih, Ukraine lam pekawk an tum ve lo tikah ram pahnih an do aw peh vivo hrih dingin a lang. Tutiang ahcun ram pahnih in kap aw lo dingin remawknak zianghman an nei lo.
Leave a Reply