Kawl Zum Lo AA – A tufang Rakhine ramkulh sungih doawknak ah AA cun kan tumtahmi a takin kan thlen theinak ding ahcun ral khal kan hrial lo a tulih, lamzin um dandan in kan tumtahmi thlen rori kan tum tin AA thuphuangtu Khai Thukah cun BBC a simthei.
Khai Thukkah cun “Kannih AA cu zalennak hrang kekar kan si. Ka tumtahmi zalennak ngah dingin lamzin phunphun kan hawl ding. Zohman in ral an duh lo ih, kannih khalin kan duh lo. Asinan, lamzin dang a um ruangah do aw kan si ih,ral a um phah. Nautat hmuhsuamnak a um tikah politics vekin suahnak lamzin a um fawn lo,cumi ruangah ralthuamkai kan si.
“A kum tlunah buma uknak le bama miphun ih hmuhsuam le nautat kan tuar ih, ralthuam hmangin thuneihnak an fehpi. Cumi ruangah kan zalennak hrang le kan covo hrang do rero kan si. Thazang hmangin nautat le hmuhsuam kan si ruangah kan duh lo ih, kan do. Cumi ruangah ral a suak. Ral kan duh lo, kan do paih lo zet nan, do loin kan ummen tikah kan covo kan hloh rero siko.
“Kan ram dinhmun kan zoh rero asile a relten rel ih, remnak tuah ding lamzin a um lo. Ziangahtile ralhrang pawl hi mulemal lo nei nawn loin an cangvai. Tu khalah Ralhrang pawl cun Rakhine ramkulh sungah zianghman an lutter duh lo ih, an phit. Hivek in nautat kan tong peh vivo ding ruangah daiten ummen thei kan silo ih ralhrang kan do. Kan zalennak hrang do.
“:Kannih AA hrang ahcun NLD le ralhrang i danglamnak an nei lo. Kan hmuhdan diktak kan rel asile kawl le kawl in thuneihnak an cuh aw ih, cumi hrang tlangpar miphun pawl lamtang ah in sawm. Cule, an duhmi an ngah hnu ahcun lamtang ih an sawmmi tlangpar miphun pawl khal an thlauthla ih zianghmanah an ruat nawn lo. Remnak an rak tuahpimi khal thuneihnak le lal duh ruangah tlangparmi an hmuhsuam an hremmen. Hivek cu Myanmar ram sungih kawl pawl politics fehpi dan le um rero zo a si ih,kannih cun kawl hrimhirm kan zum lo.
“Ralhrang in thuneihnak an lak lo caan khalah party in lakknak an ngah ih, cozah an din ko. Asinan ralhrang le lalnak ngah party pawl cu tuantlang thotho an si ih remaw zetin an feh. An remawk nawn lo hnuin an buai ih lamtang an hawl ciamco. Cuvek cu kan ram umdan a si. Curuagah kannih AA cun khawilam kan ttang tivek khal kan nei lo. Khawilam khalah kan ttang lo. Tuitum cu fimkhurten kan cangvai. Diknak le zalennak cu kan duhmi a si ih, lamtang ah kan buai lo.
“NUG thawn thureltlangnak kan neihmi khal ralhrang uknak an domi theihpinak hrang men a si ih, an dothlengnak ah kan tel tinak a silo. Kannih cu tuitum dothlengnak a suah hlanpi in ralhrang kan rak do rero zo. Ralhrang kan do hnuih suak pawlkom ah kan va telnak ding san a um lo. Curuangah kannih ka tummi lamzin hrang kekar kan si. Asinan, NUG siseh pawlkom dang khal ralhrang dotu pohpoh cu tuanpi le rualpi ah kan kai. Kan lungrualnak ah kan tuantlang dingih, lungruallonak ah kan duhmi veve kan tuah mai ding.
“Ralhrang tongih thurelin ziangpipa hman a thlen lo timi cu NCA hminkhen ngan pawlih sinak zoh mai uh. Ralhrang in an duhnak lawng an rel digih, ziangtin remawknak a um thei cuang ding. Than SHwe san lai khalah thureltlangnak an nei rero nan, remawknak a um thei lo. Curuangah ralhrang ih sawmnak ah kan tel lo. In sawmtu ziangvek a si, a dik maw tivek ah tampi a tthum aw.
“Tu ah ralhrang thurelpitu pawl zoh uhla kaa cun remnak kan nei nan, hlutdaw a din tikah kan relfel ding an ti. Hivek si ralhrang pawl cangvaih dan le an tuanthu. Thurelpi rero khal sehla a takin an tuah dah cuang lo. Kannih AA duhmi cu thu in relpi ding asile thurelpi caan a cem veten kan relpi a takih fehpi hngal, a takih thlenter hngal. Cuvek lawng kan cohlang ding a si,” tin a sim.
Daan Hrampi Rem Tum Ralhrang – Ralhrang ralkap hotu Min Aung Hlaing cun NCA an rak din ni October 15 zingah tlangpar mipi pawl zawnruahnak ruangah Daan hrampi rem kan tum a si tin a simthei hai.
Ralhrang ralkap le Tlangpar ralthuamkai pawlkom 10 pawl cun 2015 kum, October 15 ah khat le khat kap aw lo dingin le a relten rel ih remawknak tuah dingin NCA hminkhen an rak ngan. NCA hminkhen ngan tlangpar ralthuamkai pawlkom 10 pawl cu ABSDF, ALP, CNF, DKBA, KNU, KNLA PC, LDU, NMSP, PNLA le RCSS pawl an si.
Ralhrang in Myanmar rampi thuneihnak an lak hnuah KNU, CNA le ABSDF pawl cun NCA hminkhen ngan in umzia a nei nawn lo , NCA hminkhen nganmi kan bal tin thu an rak suah ih, ralhrang thawn thureltlangnak an nei nawn lo. Asinan, NCA hminkhen ngan lakin ALP, DKBA, KNLA PC, LDU, NMPT, PNLA, le RSCC pawl cun raltlang thu an relpi peh ih, Min Aung HLaing khal vei hnih ciar an tong zo.
2008 daan hrampi ahcun Myanmar ramsungah mahte ukawnknak Federal pek sian a silo timi a um ih, 2008 daan hrampi a nun sung cu ziangtluk in tum khal sehla ralhrang tuahmi daan vekin mahte ukawknak pek le hmunram bikhiah tivek a siang lo. 2008 daan hrampi vek cun ralkap in hlutdaw ah covo covo 25 an nei cia ringring. Hivek a si tikah 2008 daan hrampi vekin cu ralhrang hlon a rak ol lo.
2022, October 15 ahcun ralhrang le tlangpar ralthuamkai pawl khal in lungkimnak hminkhen an rak nganmi NCA khal kum 7 a kim thlang. NCA kum 7 kim zing ah Min Aung Hlaing cun tlangpar ralthuamkai pawl cu thu a tiamsalmi a si.
Min Aung Hlaing cun “Kannih Myanmar ahcun pituh hlutdaw le amyota hlutdaw tin kan nei. Tlangpar miphun pawlih covo thatnak amyota hlutdaw ih dilmi cu pituh hlutdaw lamih balsiatmi a tam. Curuangah, Federal Democracy din kan tum a si ahcun tlangpar miphun pawl hrang kan ruahsak a tul. Curuangah, tlangpar ralthuakai pawlih covo thatnak ding lam khal kan ngaihtuah a tul.
“Pituh hlutdaw in ziangtluk a tuah thei, amyota hlutdaw in ziangtluk a tuah thei? rampi hlutaw in ziangtluk a tuah thei tivek pawl tivek tuah tha dingin dinglai daan hrampi kan rem a tulin a lang. Daan hrampi kan rem lawngah tlangpar miphun pawlin hamthatnak an ngah thei fang ding.
“Curuangah tlangpar mipi pawlih duhmi pitlin thei dingin hlutdaw ah tlangparmi pawl lut ciamco uh. Cumi lawngah kimten thu kan rel thei ding. Miphun tinkim in thu kan rel tik ahcun bangrannak le hamthatnak a um ding. Tlangpar ralthuamkai pawl thawn kan tonawknak khalah Federal Democracy dindan ding kan rel ih,hmailam kan pan rero zo a si,” tin a sim.
Leave a Reply