Khawlal Ralthuamkai An Thianfai

Khawlal Ralthuamkai An Thianfai – Tanintharyi ramthen Palaw myone Tuangyakan khawlal cu ralthuam rinsan in mipi a dekcok ringring ruangah Palaw PDF cun September 12 ah an thianfai tin mipi an theihter.

Palaw PDF hotu cun “Khawlal a si tlunah Pyu Saw Htee sungtel khal a si. Ralthuam a nei thepthep ih, mipi hrang tuar theih lo ding khopin mipi a dekcok. Ralhrang a rinsan ngaingai ih, a ralthuam neihmi cun a humhim aw vivo thei dingah a ruat aw.

“Ralhrang in rampi thuneihnak an lak hnuah khawlal tuanvo an pekmi a si ih,zanlam nazi 4 hrawngah lamzin ah kan thianfai thei. Kan thianfai hnuah kan cekih, kutden bomb 2, phone pakhat,tangka ting 9 kyats, hmatpungtin 8, WY ritheihsi mum 8 , condom 2 , zunghruk pahnih, sidawhnak le sii dang neuhneuh pawl kan lasak.

“Amah cu Maung Yuh tiah an ko ih, dothlengnak ih teltu pohpoh a hnaihnok. Tuitum cu meithal a rak pai ngah lo ih, kutden bomb 2 lawng a keng. a cangvaih man hlanah kan thianfai thei. A meithal cu inn lamah a rak ret. Ralthuam a neih ruangah duhtawkin mipi a hro ih, cumi ruangah thianfai lawlaw kan si,” tin a sim.

Israel Le Ralhrang An Rem Aw – Asia ram sungin ram pakhat cun Israel hnenah Drone kah thlaknak lei dingin an dil ih, ram pahnih an rem aw zo tin ramdang thuthang cun an tarlang celcel.

Asia ramsung in ram pakhat timi cu ralhrang ralkap rori an si tin zingzoitu pawl cun an sim ih, Israel lam cun remnak an tuahpimi ram hmin an rel lo tlunah Drone kah thlaknak an zuarmi a man zat khal an tarlang duh lo. Tuitum ih drone kah thlaknak an relmi cu veikhat ah drone tampi kap tla thei a si tlunah Drone cet thilri khal a tibuai thei tin an tarlang.

Israel ram hi Drone le Missile kahtlak thiam tuk ram pakhat an si ih, ram fate pakhat ah leitlun ih ralthuam neitha dinhmun ih tel ban an si ve. 2015 kum ah Min Aung Hlaing cun Israel ih ralthuam tuahnak hmun a rak tlawng zo ih, 2017 kum khalah Rohingya pawl donak ah israel cun ralhrang hnenah ralthuam an rak zuar ciamco zo.

Tuitum ah Drone kah thlaknak lei aw dingin remnak tuah fang an si ih, ziangtikah an lei aw fel ding timi cu ram pahnih in mipi theih lo dingin an thup hrih. A tufang ramsung buainak ah mipi ralkap pawl cun drone an hmang tangkai ih, ralhrang pawl an tuartuk. NUG khalin drone tampi lei ding cangvaihnak an nei rero ve, curuangah ralhrang thinphang cun Israel tuahmi Drone kah thlaknak an cah siko tin zingzoitu pawl cun an sim.