Karen ramkulh Myawady myone Thailand ramri ih ralhrang sakhan သေ့ဘောဘိုး sakhan cu May 17 ah KNU ralkap KNLA, KNDO le PDF pawl tangtlang in nasa ten an do ih,ralhrang lamin raldonak vanzam tiang an hman phah nan, may 18 zinglam nazi 10 le 11 karlak hrawng ahcun KNU in ralhrang sakhan သေ့ဘောဘိုး an lafel thei.
KNU in ralhrang sakhan an lakfelmi ah ralhrang hrekkhat an tlansuak man nan, ralhrang thi an tam ih,nungdam in ralhrang 6 an kaih ngah tlunah ralthuam hrekkhat khal an laksak thei. Ralhrang ralkap cun an sakhan humhim dingin raldonak vanzam 3 le Helicopter 1 an hmang nan, an sakhan humhim thei loin dung an sip.
Doawknak ah KNU lamin miraltha 3 cun ram le miphun hrang an nunnak an hlan. Doawknak ah ralhrang thi an tam tuk nan, a zak cekci an fiah thei hrih lo. Ralhrang cun raldonak vanzam, bomb thlaknak vanzam le raldonak Helicopter in an sakhan humhim an tumih, KNU miraltha rual pawl cu tlunsang in vei 35 tluk an kap ciamco. Asinan, tlun le hnuailam ih ttang ralhrang pawl cu KNU miraltha rual pawlin raltha tukin an do peh ih, ralhrang sawn dung an sip thluh.
KNU in ralhrang sakhan in ralthuam an lakmi pawl khal an pholang thluh ih, meithal zun 10, ralthuampi kahnak 2, bomb phunphun , cerek le thildang neuhneuh pawl an si.
KNU in nungdam ih an kaihmi ralhrang pawl cu senthum Naing Aung, senthum Tin Soe, senhnih Kyaw Htun ,senkhat Myo Lin Aung, ralkap Mg Htite le ralkap Naing Lin Aung pawl an si.
KNLA ralbawi cun “Ralhrang thi an tamih, 10 tlun cu an thi dingah kan ruat. Asinan, anmah ralhrang pawlin ruang an phurh cih tikah a zat cekci sim a har. Ralhrang thi ruang an thiar lai khal hlaral in kan hmu rori. Ralhrang 6 cu nungdam in kan kai ngah ih, a tul dan vekin kan tuah vivo ding a si,” tin a sim.
Ralhrang Mawtaw Bomb An Puah – Sagaing ramthen Shwebo myone Kyauk Myiang ( ကျောက်မြောင် ) palik sakhan in suak ralhrang ralkap mawtaw cu mipi ralkap pawlin lamlak ah bomb an rak puah ih, ralhrang 3 an thi tin thu an suah.
Ralhrang ralkap mawtaw fehkhawm cu mipi ralkap komkhawm နတ်တောင်နဂါး တပ်ဖွဲ့, GHOST RIDER Special Task Force BURMA le ShweBo SBDF pawlin bomb puah in an rak do.
Mipi ralkap hotu cun “Ralhrang pawl cu may 16 ah hmaisa sawn bomb kan rak puah ih, bomb 4 rori kan hman tikah kan puah fuh tuk. Asinan, ralhrang ziangzat ciah an thi timi cu kan fiah thei lo. Bomb puahnak in luat ralhrang pawl cun may 17 ah bomb kan puahnak kiangkap ih khua an luhcilh ih, mipi inn an nawkkang.
“Mipi inn nawkkang ih mipi thilri duhtawk in firtu ralhrang pawl cu mawtaw 4 in hmundang ah feh an tum. Cumi cu kannih mipi ralkap komkhawm in lamlak ah kan rak bawh ih, bomb kan puah hnuah kan kap. Neta sawn ih kan doawknak ah ralhrang le Pyu Saw Htee komkhawm 3 cu felfai zetin an thi rori a si,” tin a sim.
Makui ramthen Yesakyo myone khalah mipi ralkap komkhawm in ni 4 sung ralhrang ralkap an do ih, ralhrang thi an um tlunah ralthuam an laksakmi pawl an pholang.
Yesakyo PDF hotu cun “Ralhrang mipum 100 hrawng an si ding. May 10 in hmunram in nor ih, doawknak hram kan thok. Ni 4 sung kan doawknak ah ralhrang 3 cu an thi ih, ralthuam laksakmi kan nei. Ralthuam kan laksakmi pawl cu meithal zunthum, palik fawm, cerek le ralthuam dangdang an si,” tin ralthuam an lakmi khal an pholang cih.
Thailand Ih Thupte Lut Myanmar Rammi 1513 An Kai – Thailand in Myanmar rammi hnatuan dingin a ram sungah daan vekin a ko rerob sal nan, cuvek rak colo pawl hrekkhat cu thupten Thailand ih lut rero khal an um ih,Thailand palik pawl cun May 1 in 17 tiangah thupten Thailand ram sungih lut Myanmar rammi 1513 an kai.
May 17 lawngah mipum 72, may 14 ah mipum 298 ,May 15 ah mipum 103 le may 16 ah mipum 20 tin ni 4 sung men hmanah mipum 500 kiangkap Thailand palik pawlin thupten Thailand ih lut Myanmar mipawl an kai.
Thupten Thailand ih lut pawl cun puaisa hnenah Thailand tangka bath thawng 20 in thawng 30 karlak an pe ih, May 1 in 17 tiangah puaisa 14 khal an kai tel.
Thailand ih Myanmar mi buaipitu pakhat cun “Tu ah daan vekin Thailand ram ah hnatuan theinak pek a sisal zo ih, daan vekin mi tam tuk Thailand ah an lut rero zo. Curuangah, thupten Thailand ram sungih lut pawl cu an him lo deuhdeuh dingih, an cek uluk deuhdeuh ding. Curuangah,a cangthei asile daan vekin feh tumsawn uhsi,” tin Myanmar mipi sawmnak a nei.
Kan ram harsatnak ruangah le buainak ruangah Myanmar ah hnatuan ding a har lo ih, hmun hrekkhat ahcun doawknak ruangah hnatuan ngam lo khal an um. Hivek ruangah myanmar mipi tamzet cu ramdang rori an zoh ih, nitin rori’n ramleng suak an tum tuk tiah buaipitu pawl cun an sim.
CDM Pawl Ramleng Suah An Kham – Ralhrang ralkap cun ram buainak ruangah CDM tuah pawl cu ramleng suak thei lo dingin tan an la ih, tu ahcun hngetkhoh sinsin in an cek.
Ralhrang pawl cun March thla in CDM tuah pawl cu passport zungah thaten an cek ih, ramleng suak thei lo dingin zingzoinak an nei. CDM tuah ti ih an theihmi pohpoh cu Passport an tuahsak duh lo. Hrekkhat ramdang passport nei zo khal CDM an tuah asile a kum khal an thansak duh cuang lo.
Hivek tongtu pakhat cun “Ka hmin an zoh veten Tlawng sayamah maw na si maw t`in in sut. Ka si lo ka ti nan, na hmin le thuhla cipciar hinah a lang thluh in ti. Passport kan lo tuah sak khalle Airport ah na buai ding. Ramleng na suak thei cuang lo. CDM tuah pawlih hmin cazin kan nei thluh zo ih, Passport tuahsak lo dingin thupek kan si. Curuangah kirsal men aw in ti ih, keikhal ka kirsal,” tin a sim.
Ralhrang in rampi thuneihnak an lak hnuah ralhrang uknak cu a phunphun in dokalh a si ih, cozah hnatuan pawl khal CDM tuah in ralhrang uknak an do ve. Tu ah ralhrang pawl cun tlawng phuan an tum lala ih, CDM tuah zirhtu pawl cu lotheih loin tlawngkai dingah an nor thok rero zo tin thuhla a suak.
Combodia PM In Myanmar Mipi Thu A Cah – A tufang ASEAN Chairman Combodia Prime Minister Hunsen cun Myanmar mipi pawl hnenah amah dokalh rero lo dingin sawmnak a nei ih, Myanmar remdaihnak hrang zuam rerotu ka si tin a sim.
Hun Sen cu ralhrang hotu Min Aung Hlaing thawn be aw rero an si ih, ASEAN meeting khalah ralhrang tel thei dingin tan rak latu kha a si. Asinan, amai thute menin zianghman a fehpi thei lo ih, a rak hlawhsam. Cumi hnuah Myanmar ih tlangpar ralthuamkai hotu pawl bia in a rak tlawng zo. Hivekin Min Aung Hlaing a dinpi tikah Myanmar mipi in an duh lo ih, US a thlen khalah kedam in an rak deng.
Hun Sen cun “Myanmar ram buainak cem lohli dingin zuamtu pakhat ka si ve. Tlangpar ralthuamkai pawl ka bia ih, Min Aung Hlaing khal kahcawlh thu phuang dingin remnak ka tuahpi. Curuangah, Myanmar mipi in keimah in do rero asile an harsa deuhdeuh men dingih, mah le mah harsatnak pe aw sawn an si ding,” tin a sim.
ASEAN in Myanmar ram buainak fel dingin ralhrang hotu Min Aung Hlaing cu remnak 5 an tuahpi nan, tuini tiang ralhrang lamin zianghman pitlinmi an nei hrih lo. Hivek ruangah US cun ASEAN pawlkom a ton phah ih, Myanmar ralhrang pawl cu nasa ten nor dingin a sawm hai.
China Le Myanmar Ramri Gate An Ongsal – Shan ramkulh saklam Muse myone China le Myanmar ritawknak hmunih Wating Gate cu covid 19 natnak ruangah kharlawk a sinan, May 17 ah an ongsal zo.
Ramri gate ongsal dingin ram pahnih hruaitu pawl cu May 16 ah an rak be aw ih,remawknak an neih hnuah may 17 ah Myanmar le China ramri Gate cu an ongsal. Ramri gate onsal a si hnuah Myanmar lamih thilri phur mawtawpi pawl khal China lamah an lut rero zo.
A kiangih um pakhat cun “May 17 ihsin Myanmar lamih suak mawtawpi pawl China lamah an lut rero zo. Asinan, Myanmar lamih mawtaw mawng pawl cu China ram sung tiang an lan thei lo ih, ceknak hmun tiang lawng an mawng thei. China lamih mawtaw pawl cu Myanmar ram sung tiang an lut thei thung. Cucu ,tlunlam lairel dan a si dingih, a san kan thei ve lo,” tin a sim.
Leave a Reply