Karen ralkap KNU le NLD cozah aiawh cu may 27 ah an tongaw ih , thureltlangnak an nei tin kaphnih pawlkom cun thu an suah. Pawlkom pahnih tonawknak ahcun Federal Democracy uknak tlunah ralhrang ralkap do cimit dan ding kan rel tin KNU lam cun an sim.
KNU ramdang palai Pado Saw Tawni cun “NLD palai thawn kan tongaw ih ,thufel tlangnak kan nei rori ko. Thu kan relmi cu Federal Democracy ukawk dan , ralhrang do cimit dan ding le ziangtin hmailam ah lungrual ten ke kan kar tlang ding tivek pawl an si.
“Onine in tongaw le thureltlangnak nei kan si. Kannih KNU lamin hotu sang, sungtuan, Central sungtel le palai pawl kan tel ih, NLD lamin Central sungtel Aung Kyi Ngyut, Dr.Khin Saung, U Htun Myint, U Kyaw Htwe le U Myo Naing pawl an tel. A tul dan vekin hmailam khalah tongaw vivo thei kan si.
“Thureltlangnak le tonawknak a tam tikah thatlam a pan ding. Thla 3 dan siloin thla tinten tongaw thei sehla a tha sinsin ding. Tu ahcun thla khat veikhat ti khal siloin a tul dan vekin tongaw dingin kan lungkim hri a si,” tin a sim.
Tuitum KNU le NLD tonawknak cu ralhrang ralkap in rampi thuneihnak an lak hnuah avei thumnak a si tin an rel ih, vei hnih an rak tongaw zo.
Ralkap Pawl An Kap That Aw Ngah – Mandalay ramthen Kyauk Pantaung myone ah ralhrang ralkap cun PDF 2 an kulh ih, kah that ngah rori an tumnak ah ralhrang bawi Aung Myo Thu sawn an kap that ngah.
Ralhrang pawl cun Kyauk Pantaung ih PDF pahnih phur aw cu May 26 ni ah dung le hmai in an kulh. Bike ih phur aw PDF 2 cu ralhrang mawtaw 3 in dung le hmai in an kulh nan, PDF 2 an tlansuak thei thotho ih, ralhrang pawl cun anmah hotu ralhrang bawi Aung Myo Thu sawn an kap that ngah. Ralhrang midang 6 khal hriam an ngah.
Ralhrang bawi Aung Myo Thu ih ruak cu may 27 ah vuinak an nei ih, ralbawi a sinak khal ralhrang pawl cun an langter ngam lo. Mipi pakhat vek men in an vuiliam.
Ralhrang ruak buaipitu pakhat cun “Ziangruangah ralkap bawi a sinak langter loin mipi vek menin an vuiliam timi a san cu kan thei ve lo. Kannih a bawmtu men kan si ih, thuhla cipciar kan sut ngam lo a si,” tin a sim.
Ralhrang In lemcangthiam Ye Tike Hremnak An Pe – Ralhrang ralkap cun anmah dokalhtu ti ih an kaihmi lemcangthiam Ye Tike cu kum 10 sung thawngtla dingin May 27 ah hremnak an pe bet.
Ralhrang ralkap cun kan dung kum April thla ah lemcangthiam Ye Tike an rak kai ih, rampi dokalhtu pukmah 505 tlunah rittheihsi tham tin pukmah 16 thawn thubuai pahnih an orhter.
Rampi dokalh timi pukmah 505 hmangin ralhrang ralkap cun Ye Tike cu kum 3 sung thawngtla dingin hremnak an pe zo ih, rittheihsi tham timi puakmah 16 hmangin kum 10 sung thawngtla dingin hremnak an pekmi a si.
Ralhrang ralkap cun lamzawh duhphorhnak nei Ye Tike kan kaih rualin a taksa ah rittheihsi kan hmu tin thubuai dang an orhtermi a si.
Ye Tike tlunah lemcanthiam Lumin, Paing Takhon, Pyay Ti Oo, Indra Kyaw Zin pawl khal ralhrang ralkap cun rampi dokalh tin an rak kai ve nan, midang pawl cu an thlah thluh zo ih, Ye Tike cu kum 10 sung thawngtla dingin hremnak an pek betmi a si.
Thih Dan Pekmi 114 An Um Zo – Ralhrang ralkap in rampi thuneihnak an lak hnuah anmah dokalhtu tin an kaihmi lakin thih dan an pekmi 114 an um zo.
Ralhrang in ram buai hnuih an kaihmi lakin thih dan an pekmi 114 a um tlunah kum 7 in damsung thawngtla dingih an hremmi 78 an um zo. Thih dan an pekmi siseh kum 7 in damsung thawngtla dingih hremnak an pekmi pawl khal daan vekin humhimawknak an nei lo tin sihni pawl cun an sim.
Ralhrang in thih dan an pekmi pawl lakah mino , phungsang tlawng kai rero lai an tam ih, dohtlengnak ih tel ruangah, lamzawh duhphorhnak ih tel ruangah tin an kaihmi an tam. Hrekkhat cu CRPH, NUG le PDF pawl na bom ruangah tin an kaihmi khal an um.
Ralhrang in thihdan an pekmi ah 88 tlawngta hotu Jimmy le NLD party hlutdaw palai Phyo Zaw Yar Thaw tek pahnih khal an tel ve. Annih pahnih cu Yangon hmun pakhat ah ralhrang in ralthuam thawn an kaihmi an si.
Tlangpar Ralthuamkai Hotu le UN Security Council An Tongaw – A tufang Myanmar ram buainak thawn pehpar aw in Myanmar ram sungih tlangpar ralthuamkai hotu pawl le UN Security Council hotu pawl may 25 ah an tongaw, ih thureltlangnak an nei.
New York khawp ah tongaw an si ih, a hmunih tel an um bangin, a hmunih tel thei lo pawl cu online in an tel. Tlangpar ralthuamkai lakah KIA, KNU, CNA le KNPP ( kaya ) pawl cu Un Security palai tongtu an si.
Tonkhawmnak ahcun tlangpar ralthuamkai pawlkom 4 in UN Security hnenah thil 4 an dil ih, UN Security lamin theitawk ih an buaipi ding thu an sim.
Tlangpar ralthuamkai 4 pawlin Un Security hnenih an dilmi thil 4 pawl cu ramleng in ralhrang sumpai ngahnak phit dingin, UN Security pawlkom in tlangpar ralthuakai pawl thurelpi vivo dingin,minungpi duhdawt zangfah lainak thawn bomnak pe dingin le ASEAN remnak an tuahpimi a takin pitlin dingin timi pawl an si.
Ralhrang Sakhan In Ralthuampi Tampi An La – Shan ramkulh phekung myone Moebe kiang Similaw khua ih ralhrang ralkap sakhan cu KNDF pawlin may 26 ah zohfelnak an nei ih, ralthuam tampi an sar.
Sililaw khua kiang ahcun may 24 ah ralhrang ralkap le KNDF pawl an rak do aw ih, KNDF in ralhrang sakhan an do neh nan, Moebe ih ralhrang hmunpi in ralthuampi thawn an kap ciamco ih,ralhrang sakhan an thianfai man lo. Ni 2 hnuah ralhrang sakhan an va thianfaimi a si ih, ralthuam tampi an sar tlunah ralhrang fawm tampi khal an sar.
KNDF ralbawi cun “A hlanih kan domi sakhan thianfainak kan nei. Ralhrang sakhan ahcun ralhrang an rak um nawn lo ih, ralthuam tampi an tlansan. Cerek,RPG le bomb hrekkhat kan sar. Ralhrang fawm tampi kan sar ih, an ruang pawl cu kan hmu lo. Ralhrang an phumnak lei an leihmi khal kan hmu nan ,kan phorh lemlo.
“Ralhrang sakhan in ralthuampi 2, bomb puah theih 4 , cerek bawm 50 le thildang neuhneuh kan sar. Doawknak ah ralhrang ziangzat ciah an thi timi cu kan fiah thei lo. Ziangahtile anmah in an rak phum thuh ih, an fawm pawl lawng kan sarmi a si,” tin a sim.
Russia le Ukraine An Do Aw Thok Fang – Ukraine cun Russia ralkap thawn an doawknak thla 3 sung rei hmansehla a thokfang a silai tin leitlun an simthei. Ziangahtile, a tufang ah Russia cun Ukraine nisuahnak lam cu nasa ten an do ih, doawknak a sosang.
Tu ah Russia ralkap mipum tamzet, raldonak mawtaw tlunah tank mawtaw tiangin Ukraine nisuahnak lam an nor rero ih, khawpi pakhat hnu pakhat lak vivo an tum. Ukraine ralkap pawl cun theitawk in Russia ralkap pawl an rak do rero nan, hmailam nor thei lo dingin an kham thei hrih lo.
Ukraine president Zelenskyi cun “Ukraine nisuahnak lam lawngah kan ralkap mipum 100 hrawng cun ram le miphun hrang an nunnak an hlan zo. Russia cun Ukraine nisuahnak lak an tumih, nasa ten in nor. Curuangah Ukraine le Russia buainak cu a thokfang a si hrih. Kannih cun kan ram le miphun cu kan humhim vivo ding a si,” tin a sim.
Tutiang Ukraine ralkap pawl pekawk an tum hrih lo ih, Russia ralkap pawl khal dungsip an tum hrih lo. Russia cun Ukraine nisuahnak lam Donbas ramthen sungin Donetsk le Luhansk lakfel an tum ih, Cucu, Ukraine lamin theitawk in an rak kham rero ve.
Ram pahnih buainak ah leitlun ramdang zohman a takin an tel hrih lo ih, ralthuam le sumpai lawngin Ukraine an bawm hrih. Hivek a si tikah Ukraine lam an pe aw lo nan, a tuartu bik cu an si.
Leave a Reply