Sagaing ramthen Shwebo myone Kyunsik khua kiangah kum kim lo telin Wetlet PDF sungtel 9 thah an si tin an sungtel pawl cun an relsuak.
June 29 zingah Wetlet PDF pawl cu Ayadaw myone ah sii lam zir dingin an feh ih, Shwebo myone an luh zawngah ralhrang ralkap pawl thawn an tongaw ih, ralhrang pawlin an kaih hnuah an kap that thluh.
Wetlet PDF hotu cun “Ziang ralthuam hman an keng lo. Sii lam zir dingin feh an si ih, lamzin a felfai timi thu kan don ruangah hahdam zetin an feh. Asinan, ralhrang lamin ziangtin an rak thei timi cu kan thei ve lo, kaih an si ih, ralhrang lamin zuk an thlah hnu lawngah kan sungtel an si timi kan thei ve fang. Ralhrang pawlin an kaih hnuah an kap that cih tin thuhla kan dong. Riahsiat thlakza ngaingai a si,” tin a sim.
Ralhrang pawl ih thahmi PDF 9 lakah Nunau 4 an tel ih, mipa 5 an si. Nunau 4 pawl cu Papa Khaing ( kum 14 ), Win Eih Kyaw ( kum 15 ), Naing Naing Aung ( kum 24 ) le Thit Thit Hlaing ( kum 34 ) pawl an si ih, mipa 5 pawl cu Pho Thaung ( kum 17 ), Bung Kyaw ( kum 17 ), Thein Than Oo ( kum 21 ),Aung Kyaw Moe ( kum 27 ) le PHo Nyein ( kum 27 ) pawl an si.
Innsangnu pakhat cun “Ka fa cu kum a kim hrih lo nan, tel a cak tuk ruangah a lut. Kan don rero nan,kan don thei lo rori ih, ka titheinak zawnte ah ka tel duh ve silawm tin a ttang. Tuvekin siatnak a ton tikah ka tuar thei lo lawlaw. A tuar dan ding khal ka thiam lo,ka tuarna tuk lawmmam a si,” tin a sim.
Wetlet PDF cun hivek kum kim lo an kai ih, daan vekin an thurel sak lo ih , rapthlak tukin an thah ruangah ralhrang pawl cu tlunlam a cangthei tawkin heknak an tuah ding thu an sim.
Falam le Kalay Lamzin Kham Hrih A Si – Ralhrang ralkap mawtaw tam tukin Kalaymyo suahsan saklam Chin ramkulh an rak pan ruangah Falam le Kalaymyo lamzin zawh lo dingin mipi ralkap lam cun thu an rak than zo ih, tukhal lamzin a him hrih lo thu an sim.
Ralhrang ralkap pawl cu June 27 ah kalaymyo in saklam Chin ramkulh rak pan an si. Mipi ralkap lam cun lamzin an kharnak san cu mipi an himthei ding a si tlunah ralhrang pawl thang an kammi ralringten an ret thlang ruangah a si thu an tarlang.
Cumi thu ah CNDF ralbawi cun “Ralrinnak kan pekawkmi hi zangfahten in ngaipoimawh sak hram uh! Curfew kan puang duh ruangah si lo. A ruhlang lawlaw in kan rel ding asile ralhrang pawl rat theinak lamzin ih thangkammi kan nungter, ralhrang pawlin ek an pal ngah tikah a kiangkap vak men khal an keu ciamco theu, ralhrang pawl thangkammi in mipi sawn riangri a awk tikah thin a naa tuk. ralhrang pawl in zinvak men in kaihsak ih in keu sak tik khalah thin a naa tuk. Cuvek pawl ruangah a si, ralhrang an um cun lamzin zawh lo dingin mipi kan lo theiternak san. Zangfahten raldonak um thei dinhmun ah thu kan suah asile ngai pawimoh hram uhlaw,” tin mipi a simthei.
Ralhrang Thilri Phur Mawtaw An Kap – Kaya ramkulh Loikaw myone ah ralhrang hrang thilri mawtaw cu KNDF pawlin an kap ih, ralhrang 4 an thi tin mipi an theihter.
KNDF cun “June 30 zingah Loikaw le Lawpih Htah ( လောပိတ ) lamzin ah ralhrang thilri phur mawtaw kan hmu ih, kannih KNDF pawl cun kan kap cih. Hmunram zohfelnak kan neih laiah ralhrang hrang thilri phur mawtaw pakhat kan hmu ih, kan kap. Cumi ahcun ralhrang bawi telin ralhrang 4 an thi.
“Zinglam nazi 8:45 in nazi 9:5 tiang kan do aw ih, ralhrang thi pawl hnenin pistol zunkhat, cerek 12 le phone 2 pawl kan laksak thei. Doawknak ah kannih lam thi le hriamhma ngah kan um lo. Buaithlak zet cu doawknak a um tinten ralhrang pawl cun duhduh in ralthuampi an kap ciamco ih, kiangkap khua mipi pawl an tlan phah a si,” tin thu an suah.
Lamzin Ah Ralhrang An Thi Teptep – Karen ramkulh Myawaddy myone Wawlay ramsung ih ralhrang sakhan Ukari Htah cu June 30 tiang KNU le ralhrang ralkap pawl in an cuh aw hrih ih, June 30 an doawknak ah ralhrang pawl lamzin tluanah an thi teptep.
KNU ralkap KNLA le KNDO pawl bawmtu PDF hotu cun “Sakhan cuh aw ih kan doawknak ah ralhrang tantu pawlin thudik lo phunphun an rak suah. Sakhan cuh ih doawknak ah KNU le PDF lam thi an tamtuk ih, an duai, an tlan thluh an ti. Anmah ralhrang lam cu thi um lo vekin an rel. Cumi ruangah kannih khalin lamzin tluanih thi teptep ralhrang pawl cu mipi hmuhah kan pholang a si,” tin a sim.
Ralhrang sakhan cu KNU lamin an luah thluh zo nan, ralhrang pawlin luahsal an tummi a si ih, Sakhan thlen hlanah an do aw. Sakhan luahsal tumih feh ralhrang pawl cu lamlak ah KNU ralkap pawlin an rak bawh ih, an kap ciamco. Cumi ruangah ralhrang thi an tam tuk ti’n KNU ralkap KNDO pawl cun mipi an theihter.
KNDO ralbawi cun “June 30, zinglam nazi 6 a si ih, nan ralkap Commando pawl cu rak thlah uhla, kannih in nazi 1 sung man do a tul lo ding. Zoh uh nan ralhrang pawlih meithal kan lonmi pawl, midang rak thlah hrih uh. Hinah midang Elsiwa an um lo, keimah KNDO hotu Elsiwa pakhat lawng ka um a si,” tin ralhrang pawl a ko.
Sakhan cuh aw ih doawknak ah ralhrang ralkap cun raldonak vanzam an hmang ciamco ih, kiangkap khua mipi pawl cu khua ah um ngam loin an tlan thluh. Ralhrang lamin vanzam an hman tikah KNU lam hrang khalah fimkhur a tul ih, vanzam awn an theih cun, hmunhim an pan ringring. Leihnuai doawknak ahcun ralhrang lam hmai an nor thei nawn lo tin an sim.
Ralhrang In Thailand Ngaidam An Dil – Karen ramkulh sungih KNU le ralhrang doawknak ah ralhrang thi an tam tuk thlangih, ralhrang cun KNU donak ah raldonak vanzam an hmang rero zo.
Asinan, ralhrang raldonak vanzam pawl cu an hmunram theifiang loin June 30 zingah Thailand ramri lamah an va lut sual ih, Thailand lamin raldonak vanzam 2 an rak zamter ve hngal.
Ralhrang raldonak vanzam cu June 30 zinglam nazi 11 hranwgah Thailand lamah zamsual pang a si ih, Thailand ram sungih a va zam ruangah Thailand mipi pawl cu thinphang in an rak tlan ciamco man. Cucu, Thailand tuanvo neitu lamin an theih tikah an raldonak vanzam 2 an ramter hngal ih,zohfelnak an nei.
Neta ah Thailand lamin ralhrang raldonak vanzam lamzin a hlo timi an theisuak ih, zamrangten ralhrang lam an be cih. Cumi ahcun Thailand lamin neta ah hivek a thleng leh asile an vanzam a him nawn lo ding thu an theihter ih, ralhrang pawl khalin “In ngaidam hram uh, neta ah hivek a thleng nawn lo ding a si tin ngaithiam an dil tin Bangkok thuthang cun a tarlang.
Ralhrang Vanzam Sakhan Hotu Lam An Kai – Ralhrang ralkap ih vanzam sakhan hmunpi umnak Hmawbi Airforce sakhan sungah thupten bomb kam ngah a si ih bomb a puak ngah lo nan, bomb kam a si ruangah Hmawbi Airforce sakhan ih hnatuan ralhrang bawi pawl tiangin kaih le thusuh rero an si.
CDM ralbawi cun “June 28 ah ziangkim tawlrelnak kan nei ih, harsa zet dingin Hmawbi Airforce sakhan ah bomb kan kam thei. Olsamten sakhan sung lut thei kan silo ih, a harsa ngaingai. Vanzam hmun ahcun Yak 130 vanzam 6 a um ih, cumi ahcun bomb kan kam.
“June 29 zingah vanzam pawl suak ding an si ih, cumi caan ah hlaral control’nak in bomb kan kammi kan puakter nan, a rak fuh lo ih a puak thei lo. Bomb a puak ngah lo nan, vanzam sakhan ah bomb kam a si timi an theisuak ih, a hmunih hnatuan ralbawi tiang telin mi tampi an kai.
“Kaihmi lakah hotu ralbawi pahnih le an kuthnuai pawl an tel. An zaten ralkap thusuhnak hmunah hruai an si ih, hrem phah in thu an sut rero zo ding. An phone pawl khal an laksak thluh. Ziang dinhmun an thleng zo timi cu kan thei ban hrih lo a si,” tin a sim.
Putin In Ukraine Bawmtu Pawl Thu A Cah – Russia in thla 4 sung Ukraine an donak ah ramdang tamzet cun theitawk in Ukraine hnenah ralthuam an pe rero ih, cumi ahcun US le NATO member Europe hrekkhat pawl cu Ukraine bawm hleicetu an si.
Ukraine hnenih ralthuam an pekmi ah hla tuktuk kap thei tivek a tel ih, cuvek an don tikah Ukraine ralkap pawlin Russia ralkap pawl ih vanzam, helicopter, Lawng le hmunpi tivek an kap siat theu. Cucu, Russia lamin an ngai thupi tuk thlangih Ukraine in ralthuam an don dan ih zir in kannih khalin kap vivo ding tin Putin a tongsuak.
Putin cun “US le ramdang pawlin kanmah Russia tisiat duh ruangah Ukraine hnenah ralthuam an pe rero ih, ralthuam an pek dan ih zirin kannih khal kan cangvai vivo ding. Ukraine in ralthuam tha an don asile kannih khal Ukraine ram sungih kan kah dahlomi hmun poimawh le inn picang tivek kan kap siat vivo ding a si,” tin US le ramdang pawl a theihter hai.
Ram pahnih buainak ah US le NATO member pawl cu a takin an tel lonnan, Ukraine hnenah ralthuam an pe rero ih, doawknak a tawp thei hrih lo. A thok ahcun Russia in Ukraine rampi huapin thuahfai an tum nan , neta ah Ukraine nisuahnak lam sawn lakfel tumin an do ciamco. Ukraine nisuahnak lamih nasa ten an doawk hnuah Russia cun June 26 le 27 ah Ukraine khawpi bik Kyiv le Central Ukraine lam a kap sal ih,Cucu ramdang pawl cangvaih dan ruangah cangvai ve in an rel aw.
Leave a Reply