Like Le Share Men Ah Kum 10 Mihrem Tum Ralhrang

Like Le Share Men Ah Kum 10 Mihrem Tum Ralhrang – Ralhrang ralkap cun a tufang Myanmar ram sung buainak ah NUG, CRPH le PDF hrang daan thar an suah ciamco ih, Like le Share men khalin kum 10 thawngtlak theinak an aupi.

September 20 ih an tuahmi Media komnak ah ralhrang thuphuangtu Zaw Min Tun “Facebook ah NUG, CRPH le PDF pawlih ca ,zuk le video pawl thazang pe ih, like le share tuahtu pawl cu pukmah 124 hmangin thubuai kan tuahsak thlang ding a si,”tin a sim.

Pukmah 124 cu ralhrang ralkap in rampi thuneihnak an lak hnuah an tuah tharmi daan a si ih, pukmah 124 hmangin thubuai tuahsakmi cu kum 3 in kum 10 tiang thawngtlak theih tin an ngan.

Ralhrang thuphuangtu Zaw Min Tun cun kan dung media caan khalah “Facebook kan phit dingih, Facebook aiawh kan tuah ding. Youtube aiawh khal kan tuah ding. Ziangahtile, facebook le Youtube ah thu kan thlah thei ve lo,” tin a rak tongsuak zo.

Asinan, tuini tiang ralhrang cun Facebook le Youtube aiawh cu an tuahsuak thei hrih lo cuang lo ih, kan buaipi rero lai tilawng an rel thei.

PDF hruitu pakhat cun “Tu ahcun ralhrang pawl an buai tuk zo ih, leihnuai doawknak khalah ke in an suakvak ngam nawn lo. Tlunzuang hlir an hman tikah ramleng in an zoh thepthepih, ralhrang pawl hmailam a pit deuhdeuh. Curuangah, mipi an hro rero siko. Asinan, mipi an himnak dingah khualtlawng sukso cu fimkhur a tha. ziangahtile, ralhrang in mi an kaih pang cun luatsal a harsa ih,buaipi a ol lo.

“Curuangah khualtlawng sukso vak pawl cu fimkhur hram uh. Ziangahtile, ralhrang in facebook an hua tuk thlang. Lolam menah mipi kaih an tuar ding kan duh lo. Ralhrang cun facebook aiawh le youtube aiawh an tuah thei dahlo dingih, cumi ruangah ahmangtu pawl kaih an tum thlang siko,” tin a sim.

Hmatpungtin Tel Lo Simcard Thiter Tum – Ralhrang ralkap cun an thuneihnak fehpi vivo an duh ruangah mipi harsatnak an pe rero ih, tu khalah hmatpungtin thawn ngankhum lomi simcard zaten an thihter ding thu an than.

Ziangtikah hmatpungtin thawn tuah lomi simcard pawl an thiter ding timi a ni cu an than tel lo. Asinan, ramsung mipi zaten mai hmatpungtin thawn lawngin simcard hmang dingin le lei dingin an theihter ih, hmatpungtin thawn lei lomi simcard zaten an thiter tum.

Hivek cu ralhrang in PDF pawl bomnak phih an tum ruangah siko ding tin ramsung mipi pawl cun an sim. Ziangahtile, kan dung khalah Wave money cun phone number lawngin sumpai suah le kuat a theih nawn lo thu mipi an theihter ih, zokhal hmatpungtin hmang thluh dingin thu an rak suah.

Yangon ih um pakhat cun “Mipi kan harsa tuk tinak laiah ralhrang pawl cun mipi dekcoknak ding le mipi tuar ding zawngin an cangvai peh ringring hrih. PDF pawl bomnak pe thei nawn hlahseh, petu an um khalle zingzoi thei haiseh timi an duh ruangah siko ding,” tin a sim.