Ralhrang ralkap aiawh in thuphuangtu Zaw Min Tun cun tuih an tuahmi tonkhawmnak ah tlangpar miphun hrang mahte ukawknak an pek thei thu a sim ih, tui caan hi biakawkak ah caantha a si tin media pawl a simthei.
Zaw Min Tun cun “Kannih ralkap in daan hrampi kan rem duh lo tivek khal kan sim lo, mi tamsawn duhdan in rem theih ringring a si. Hlutdaw ah zatek sungin 25% lawng covo kan nei ih, daan hrampi rem dingin mipi covo 75% pawl lungkim thluh hai sehla rem theih a siko. Anmah le mah hman an lungkim tlang thluh thei lopi. Mipi covo 75% pawl khal lungkim thluh haisehla siko.
“Curuangah, tuhi tlangpar ralthuamkai pawl hrang caantha a si. Hlutdaw ah tlangpar miphun hrang dilnak theh lut siseh zopawl in an dokalh ding, ruat mai uh. Tlangpar miphun hrang thiltha tuahsak ding cu kan duh thluh si. Asinan, hlutdaw ih covo nei tam pawlih duhdan vekin a feh. Curuangah, khat le khat kan duhdan sim aw dingin, rel dingin tuhi caantha a si.
“Myanmar politics ihsin ralkap suakseh titu pawl ka sim duhmi cu annih teh ziang an tuah timi ka sut hmaisa duh?. Ralkap cu ralthuam an kai ih, Politics ah tel hlah haiseh nan ti asile nannih tlangpar ralthuamkai pawl khal ralthuam nan kai ih, politics ah tel ve hlah uh tinak a siko. Cubak fiang a um lo.
“Curuangah, ralthuam ap in pe aw thluh uh kan ti duhnak a silo. Ralthuam hmang loin khat le khat thurel thei kan si. Tutiang ah an duh kan zulhmi cu ralthuam hmang hlah haisehla thaten kan relkhawm ding. Cuti siloin ralthuam an hmangih, politics ah an tel vivo asile ziangtin diknak timi an rel thei? ziangtin diknak hrilawknak a um thei ding?
“Ziangruangah CRPH, NUG le PDF pawl tonawknak ah kan sawm lo ti asile ka lo sim ding, Tlangpar ralthuamkai pawlkom hotu lakah ramdangmi sinak nei tampi an um zo. Sungkua in ramdangmi sinak nei khal an um. Cupawl cun zo an dinpi ding,Myanmar ram thatnak maw an ruah ding, ziang an tuah ding timi cu nan thei thluh ko. Cuvek nan ruah tikah thil umdan nan thei mai ding.
“Kannih in tonkhawmawknak ah tlangpar miphun pawl thu kan tiam theimi a um ih, mahte ukawknak kan pe thei tuk, biakawk dan zir in kan pe ding. Asinan, cumi hlanah thu pakhat a um ve. Myanmar ram in an suak lo ding timi an tiamhnget hmaisa a tul. Cucu, siko. Nanmah ten nan ukaw thei ,asinan Myanmar in nan suak lo ding kan ti hnuah ziangsi an duh,a fiang tuk ko lo sawm? Kannih ralkap cun mahte ukawknak kan el dah lo lawlaw a si,” tin a sim.
Ralhrang hotu Min Aung Hlaing cun remnak hrang tlangpar ralthuamkai hotu pawl ton a duh thu a rak simthei ih, amah tong dingin hminpe tlangpar ralthuamkai pawlkom 10 pawl cu may 20 in pawlkom pakhat teten an tong thok. A hmaisabikah ralhrang hotu Min Aung Hlaing cun Shan ralkap RCSS hotu a tong hmaisa bik ih, cumi hnuah pawlkom dang a tong vivo ding.
Ralhrang ralkap hotu Min Aung Hlaing kan tong ding tin hminpe tlangpar ralthuamkai pawlkom 10 lakah pawlkom 7 pawl cu ralhrang thawn kapaw lo dingin NCA hminkhen ngan an si ih, pawlkom 3 cu NCA hminkhen nganlo an si. Min Aung Hlaing tong dingin hminpe NCA hminkhen ngan tlangpar ralthuamkai pawlkom 7 pawl cu KNLA PC, PNLO, ALP, RCSS, DKBA, NMSP le LDU pawl an si. NCA hminkhen ngan lo tlangpar ralthuamkai le pawlkom lakin Min Aung Hlaing tong dingih hminpe pawlkom 3 pawl cu UWSA ,NDAA le SSPP pawl an si.
Tlangpar ralthuamkai pawlkom lakin thazang cak ti ih an relmi Kachin ralkap KIA, Karen ralkap KNU, Chin ralkap CNA, Kaya ralkap KNPP ,Burmese Army ABSDF pawl cun ralhrang hotu Min Aung Hlaing an ton lo ding thu mipi an theihter zo ih, AA, TNLA le MNDAA pawl cun ralhrang hotu Min Aung Hlaing sawmnak an let lo.
Leave a Reply