Malaysia Feh Tum Myanmar Mi 30 An Kai

Malaysia Feh Tum Myanmar Mi 30 An Kai – Thailand in Malaysia ih feh tum Myanmar mi 30 pawl cu Malaysia ramri Thailand ah kaih ngah an si ih, a zaten Myanmar ah kuat thluhsal a si tin Thailand palik cun thu an suah.

Thailand palik pawl ih kaihmi Myanmar mi 30 lakah mipa 26 an tel ih nunau 4 an tel. Thailand an thlen hnuah Malaysia feh tum an si ih, Malaysia an thlen theinak dingah mi pakhatin puaisa hnenah Thai baht 35000 ciar an pek thu an sim. Thawng 20 baht cu Myanmar in Thailand a luhnak man a si ih, thawng 10 bath cu Malaysia an feh pehnak ding man, 5000 bath cu tulsammi dang hrang kan pe tin an sim.

A tufang hi Thailand lawng siloin Malaysia khalah Passport nei lo Myanmar mipawl cu kaih rero an sinan, thupten Myanmar in Thailand, Thailand in Malaysia lut tum an um ringring tho. Thenkhat Malaysia an lut tluang nan,Thailand ah kaihmi an tam zetih,Malaysia an thlen hnu khalah kaihmi an um thotho.

Insein Thawnginn Ah Thil Kuat An Kham – Yangon Insein thawnginn sungih bomb a puak hnuah ralhrang cun Insein thawnginn sungih khummi zate hrang thil ziangkhal kuat an sian nawn lo hrih thu mipi an theihter ih, Insein thawnginn sungih Court pawl khal zarh khat sung an khar.

Thawngtla buaipitu pakhat cun “Thawngtla pawl ton an theih lai ahcun an tulsammi sivai le eiin pek theihmi a um ih, an hrang a zia deuh ding. Thawnginn sungih eiin le thilri rori lawng cu ring thei lo an tam. Tu ahcun zokhal thawngtla pawl khal thilkuat an siang nawn lo ruangah thawngta tampi in harsat an tong phah rori ding a si,” tin a sim.

October 19 zingah Insein thawnginn sung thilri kuatnak hmunah bomb vei 2 a rak puak ih thawnginn kiltu , hnatuan mi pathum le lenglammi mi 5 an thih phah. Mipi thih phah an um ruangah dothlengnak pawlkom siseh mipi lak khalah ruahdan le pomdan a bangaw lo. Mipi tuar ding zawngih canvai mawhthluk an um laiah mipi khalin tuar caan kan neih ve a tul ko titu an um ve. Thawnginn sungih bomb puak cu kanmah cangvaihdan a si tin Yangon Cangvai STA pawlkom cun thu an rak suah zo.

Ralhrang Anmah le Mah An Kap That Aw – Kaya ramkulh Loikaw myone Pikin’ khua ah ralhrang anmah le mah an kap aw ih, pahnih a thi tin CDM tuah ralkap pahnih cun an phuang.

Kaya ramri Phekung ih CDM tuah pahnih cun “October 15 lamah a sinan, anmah ralhrang cun mipi lakih a darh ding an duh lo ih a thup. Deputy Battalion Commander pakhat a kuthnuai pakhat in a kap that. A kuthnuai ralkap khal an hotu a kah that hnuin amah le mah a kap that aw cih ve. Ralbawi thi cu Moebe in Naypidaw lamah an phur ih, Naypidaw ah vuinak an nei.

“Kannih pahnih cu ralhrang in rampi thuneihnak an lak hlanah ralkap lut dingin zirnak rak nei laklawh kan si ih, ralkap kan tuan caan khal thla 1 tha fang a si hrih. Phekhung lamih kuat kan si tikah remcang kan la ih, CDM kan tuah hngal. A tufang cu ralhrang sunglam ah buainak phunphun an nei ih, mah le mah kap aw an tam. A tamsawn cu ralhrang pawlin thuhla an suakter duh lo a si,” tin an sim.

Phekhung PDF cun “Kan hnenah CDM ralkap pahnih a thleng. Thaten kan kilkhawi ih, uluk zetin kan zoh ringring hrih ding. Zokhal CDM tuah duh pohpoh kan lo hmuak. Ralthuam famkim thawn CDM tuahtu cu laksawng ah ting 50 kan pe ding a si,” tin ralhrang pawl sawmnak an nei.

Ralhrang Ralthuampi Ruangah Tlawngta An Relh – Rakhine ramkulh Kyaukdaw myone Watmaing khua kiangkap cu October 19 ah ralhrang ralkap in ralthuampi in an kap ciamco ih, tlawngta pawl khal tlawnginn sungah an relh rero.

Khuami pakhat cun “A tufang Rakhine ramkulh hmun tinkim ah doawknak a sosang zet nan, October 19 ahcun doawknak thawmvang kan nei lo. Doawknak um riai loin ralhrang cun duhtawk in ralthuampi an kap ciamco. Ralthuampi an kahmi khal khua sung lam an batih khua sungin inn siat phah, hriamhma ngah phah khal an um.

“Tlawnginn kiangkap khalah ralhrang kahsuakmi ralthuampi a tla ih, tlawngta pawl cu cazir thei loin tlawnginn sungah an relh thluh. Ralthuampi tla ruangah mi pahnih hriamhma an ngah. Sun nazi 1 hrawngin ralhrang pawl cun ralthuampi an kap ciamco. Nazi 3 sung rori ralhrang pawl cun duhtawk in ralthuampi an kap ciamco ih, khua mipi cu tih le khur in kan um.

“Tuhrih tiang ahcun ralthuampi puak ruangah mithi an um thu kan thei hrih lo. Hriamhma ngah pahnih an um ih, inn thenkhat a siat. Ralthuampi puak hrih lo tivek kan hmuh tikah mipi hrang a him lo lawlaw. Doawknak um riai loin mipi umnak ah ralthuampi an kap ciamco timi cu a san kan thei lo lawlaw a si,” tin a sim.

Ralhrang In Naupai An Kap That – Sagaing ramthen Yinmarpin le Pale myone ramri khua pawl cu October 19 ah ralhrang ralkap in Helicopter 2 in an kap ciamco ih, nunau pahnih an thih phah.

Khuami pakhat cun “October 19, zinglam nazi 10 hrawngah Ralhrang Helicopter 6 cun duhtawk in kan khua kiangkap an kap ciamco. Cumi hnuah ralhrang 200 hrawngah leihnuai ah an tthumih cupawl cun khua tin an suasam vivo phah. Ralhrang pawl an rat ruangah khuami pawl cu phungki tlawngah an rak relh. ralhrang pawl cun phungki tlawng an luhcilh ih a sungih um lakin mipa 37 an kai.

“Phungki tlawng sungih relh raltlan pawlih phone 150 khal an laksak. Ralhrang pawl an um nawn lo hnuah kiangkap zohfelnak kan nei ih, ralhrang pawlih kah thatmi nunau ruang pahnih kan hmu. Nunau pakhat sawn cu thla 6 mi naupai lai a si. Culo midang pahnih hriamhma ngah khal an um. Kaihmi pawl ziangtin an tuah ding ti cu kan thei lo ih, kan phanpi tuk a si,” tin a sim.

Malaysia In CDM 6 An Kuat Kirsal – Malaysia cun daan loin an ram sungih um Myanmar mi 150 pawl cu Myanmar ah an kuatih, kuatmi lakah CDM mi 6 an tel tin an sim.

CDM 6 pawl cu ralhrang in rampi thuneihnak an lak tikah ralhrang hnuaiah hnatuan paih nawn lo ih, tipar ralkap sinak rak fehsan zotu pawl an si. Malaysia an thlen hnuah raltlan sinak an dil nan, UN lamin humhimnak ca an rak pe fel man loin an sim. Myanmar an thlen veten ralhrang pawlin an rak kai hngal ih, tu ahcun khawiah an ret tihman theih a si hrih lo.

Malaysia ih Myanmar Embassy cun “Daan lo ih Malaysia lut le Malaysia daan pahbal ruangih kaihmi Myanmar mi 150 pawl cu ram pahnih thaten kan tuantlang hnuah Myanmar ah kuat tlung thluh an si,” tin thu an rak suah.

Malaysia hi ralhrang uknak dokalhtu NUG dinpitu vekin an au rero nan, daan loin an ram sungih um Myanmar mipawl cu an kai rero thotho ih, thawng a thlak lole Myanmar ah an kuat. Tuitum ah CDM mi 6 an kuat tel cu UN le NUG in Malaysia an mawhthluk tuk thu an sim.

NUG cun “Neta ah Malaysia in hivekin an tuah nawn lo kan beisei. Kuatmi lakah Myanmar an thlen veten kaih hngal dingmi le an nunnak hrang tihnung an um. Malaysia in Myanmar mipi an dinpi thu , Myanmar in Democracy ngah sehla an duh thu an aupi rero nan, tuitum ah minungpi duhdawt zangfahnak nei loin an tuah. Hivek cu neta ah tuah nawn lo dingin kan theihter duh a si,” tin NUG vuanci Aung Myo Min cun a sim.

Russia In Ukraine Hmunram 4 Ah Ralkap Uknak Thu An Suah – Russia cun kan ram a si zo tin thu an suahmi Ukraine ram, Donbas ramthen sungih hmunram 4 ah ralkap uknak thu an suah.

Russia cun September 30 ah Ukraine ram, Donbas ramthen sungin Donetsk, LUhansk, KHerson le Zaporzhzhia pawl cu Ukraine ram a si nawn lo, Russia ram a sizo tin thu an rak suah ih,tu ahcun himi hmunram 4 cu Russia ralkap uknak ram a si tin October 19 ah thu an suah.

Russia cun 2014 kum khalah Ukraine ramthen pakhat Crimea an rak long zo ih, tuini tiang Crimea hmunram cu Russia ramsungah an ret lanta. Tui kum an doawknak ah Russia cun Ukraine hmunram 4 an laksak zo ih, Ukraine lamin theitawk suah in dosal an zum ruangah ralkap ukak thu an suahmi siko ding tin zingzoitu pawl cun an sim.