Mandalay PDF pawl cun mipi thawhkhawmmi sumpai hmangin Mandalay ramthen sungih PDF pakhat hrang thlakhat ah thawng 10 hlawh an pek thok thu mipi theihternak an nei.
Mandalay PDF cun “Mipi sumpai thawhmi thawn PDF pawl thla 2 hlawh kan pe thlang. PDF pakhat ah thla khat hrang thawng 10 kan pe. An thlahlawh cu a tam ciamco lo nan, mipi pekmi a si ruangah a sunglawi tuk. Mandalay ramthen sungih PDF zaten thlahlawh pe kan si ruangah duh vekin tam kan pe thei hrih lo.
“Mipi khal sumpai an thawhkhawmmi PDF pawlin an ngah timi an theih tikah an lungawi tukih kannih PDF pawl khal mipi ih in dinpinak kan hmuh tikah kan hna a ngam tuk lawlaw a si,” tin thu an suah.
A tufang hi Mandalay le Shan ramri Naungcho ah doawknak a sosang zetih August 3 in August 5 tiang an do aw zo. Doawknak ah ralhrang 6 an thi ih, ralhrang 30 hrawng hriamhma an ngah tin Mandalay PDF cun mipi an simthei.
Rampi pakhat ih ralkap pawl cu cozah in hlawh an pe ih, PDF le mipi ralkap pawl cu kum 1 tlun hlawh nei lo, harsa zetin ralhrang ralkap an do. Hmundang khal PDF pawl hlawh pe thei dingin theitawk an zuam rero tiah theih a si.
Kalaymyo Ah Ralhrang 20 An Thi – Kalay PDF cun August 5 ah hmun 2 in ralhrang ralkap bomb an puah ih, ralhrang 20 an thi tin mipi theihternak an nei. Hmunkhat cu Taungphila lamah a si ih, hmundang sawn cu Kanpa lilawn ah a si.
Kalay PDF cun “August 5, zinglam nazi 9 hrawngah kalaymyo Tahan vengin Tuangphila vuanthan inn lamih feh ralhrang ralkap mawtaw 2 cu kannih Kalay PDF in bomb kan kamciami hmangin kan rak puah ih, a hmunah ralhrang 6 an thi. Ralhrang 4 dang khal sizung fehpi an sinan, lamlak ah an thi bet. Bomb puah tuar ralhrang pawl cun kiangkap an kap ciamco ih, mipi pakhat hriamhma a ngah.
“Kalaymyo thlanglam Kanpa’ Lilawn ih umhmun khuar ralhrang ralkap mipum 30 hrawng khal Myiangchuang lilawn lamah an feh ih, Lilawn kiangih bomb kan kammi an thianfai laiah Kalay PDF bomb thiam pawlin a sangsangten bomb an puah betih, ralhrang ralkap 10 hrawng an thih tlunah ralhrang 10 hnakin mal lo hriamhma an ngah. Zinglam nazi 10:30 hrawngah ralhrang Helicopter pakhat kanpa’ Lilawn ah a ttum ih ralhrang thi le hriamhma ngah pawl a phur.
“Kalaymyo thlanglam Tayakung khua ih umhmun khuar ralhrang ralkap pawl cun August 5 khalah Tayakung khua in inn hrekkhat an urkang bet. Ralhrang pawl in Tayakung khua in mipi 3 an that zo ih, an kaihmi mipi 30 hrawng khal an thlah hrih lo. Kalaymyo saklam Yazagyo khua ih lut ralhrang ralkap pawl khalin Yazagyo khua in inn hrekkhat an urkang ih, mipi pakhat an that.
“A tufang Kalay peng sungah doawknak a sosang tukih, lamzinpi zawh hrih lo dingin, ralhrang umnak naih lo dingin, ralhrang mawtaw kiangah feh lo dingin mipi kan lo dilmi cu in thlunsak hram dingah mipi pawl zangfah kan lo dil nonsal duh a si,” tin thu an suah.
Sagaing Raltlan Pawl Kut An Dawh – Sagaing ramthen Salinkyi myone ih khua 6 pawl cu kan dung zarh lamah ralhrang ralkap pawlin an rak luhcilh ih , khuapum in an urkang sakmi a tam. Ralhrag ralkap cun ni 2 sungah khua 6 an urkang ih,khua 6 lakin inn 80 hrawng umnak kyauk Hmwe khua cu inn 70 hrawng an urkang.
Khua mipi pawl cu nikhat hlawh, nikhat ei tlangpi an si tikah tu ahcun umnak ding inn an nei fawn lo, naivai bik phungki tlawng le hramlak tivek ah an um. A tamsawn cu Mungzua khawpi ah an feh ih, ei ding an neih lo ruangah mipi hnenah kut an dawh.
A hlan ahcun ralhrang ralkap in khua pakhat sungin inn malteten an rak urkang theu nan, tulai fang cu ralhrang ralkap in khuapum in inn urkang sak an hmangih, mipi pawl cu kiangkap khua ih beunak nei lo,hmun hlapi ih tlan tul khal an tam. Hnatuan duh zet hai khal sehla hnatuan ding a um lo ih, khua ah an um ngam lo.
Raltlan pakhat cun “Kan ning a zak tuk ko,Asinan kut kan dawh lo cun ei ding zianghman kan nei lo. Cumi ruangah ningzak cingin kutdawh kan si. Kannih khua cu nikhat hlawh aw ,nikhat ei kan si tlangpi ih sumpai khawlmi zianghman kan nei lo. Kan neihsun inn khal in urkang sak thluh ih, umnak ding khal kan nei lo.
“Raltlan dinhmun in kut kan dawh ting tivek cu veikhat hman ka ruat dah lo ih, a thleng ding tikhal ka zum ban lo. Tu ahcun lo theih lo ruangah kutdawh kan si. A har, kan ning a zak. Khua ah zohman kan um ngam lo ih, lo hnatuan khal zohman an um lo. Cutikah hnatuan ih hlawhawknak ding khal a um lo.
“Tukhalah Mungzua phungki tlawngah ka um. Phungki pawl khal ralhrang ttih ah inn tin feh in rawl an dil ngam lo, an suak ngam lo.Mipi khal phungki tlawngah rawlpe in an feh ngam ve lo. Cutikah an neihciami cun rei in cawm theilo. Ziangahtile, mi pakhat hnih men lawng kan silo ih, kan tam tuk. Curuangah kanmah sawn lengah kan suak ih, kan ei ding kutdawh kan si,” tin a sim.
Ralhrang In Anmah Thuthup Simtu An That – Mandalay ramthen Chanmya Tharsi myone ih ralhrang thuthup simtu dalan picang Ne Ni Aung cu August 5 ah thicia in a ruang sar a si.
Dalan Ne Ni Aung cun Mandalay ih PDF pawl umnak hmun cu thupten ralhrang pawl hnenah a rak simthei ih, ralhrang pawl cun July 22 ah Mandalay ih PDF pawl umnak Apex innpi an rak luhcilh. Apex innpi ih doawknak ah ralhrang lam thi an tam ih, PDF 4 le mipi 4 khal ralhrang ralkap pawlin an kap that. Culo PDF 6 khal ralhrang pawlin an rak kai.
Thuhla theitu cun “Ne Nin Aung cun ralhrang ralkap hnenah PDF pawl umnak a simthup nan, neta ah ralhrang thawn buainak an nei. Ralhrang lamin a duhmi an pe lo tla a sithei. Ralhrang pawlin khawihman ah thuhla relsuak lo dingin ret an duh ih, an that.
“Ne Ni Aung ruangah mino tampi kaih tong an um zo. Amah Ne Ni Aung cu a him duh ah phungki a lutawter. Netabik ih thuhla kan theih dan vek asile ralhrang pawlin an ko ih, thudik darhsuak lo dingin an ret tha lawlaw. Mithi ruang kan zoh tikah amah Ne Nin Aung rori a si,” tin a sim.
KNU le DKBA An Kom Aw Sal Tum – karen ralthuamkai pahnih KNU le DKBA kom aw sal dingin an be aw rero zo ih ,remawknak felfai neih lohli an tum.
KNU le DKBA cu a hlanah hmunkhat teih rak um an si ih, DKBA sawn KNU in an rak suak. A san cu biaknak lam thawn pehpar aw in a si ih, DKBA cu Karen Budish Army tin hmindang an pe aw. Tu ahcun komawk sal an tumih, a thu cun remawknak neuhneuh an nei zo.
DKBA ralbawi Saw Satti cun “Ca in kan suah rero zo bangin tongkam cun remawknak kan nei zo. Asinan, remawknak tuah ding tampi kan nei lai ih, thu kan reltlang hrih ding. Remawknak 5 kan suahmi lakin 5’nak cu kan lungkim ciah lo ih,cumi ruangah thurel tlang hrih ding kan si,” tin a sim.
July 17 ah KNDO ralbawi Sawne Darmiah cun Kawtholay Army a din thu mipi a rak theihter ih, cumi hnuah KNU le DKBA pawl be aw thok an si. KNU le DKBA cun remnak 5 an tuah ih, remnak 5 an tuahmi lakah 5-nak cu rel thasal dingin DKBA lamin an dil.
KNU le DKBA ih remnak tuahmi 5 pawl cu pakhatnak ah Kawtholay Army dintu Sawne Darmya be dingin KNU ralbawi Neda Htoo le DKBA ralbawi Satii an ruat. Pahnihnak ah KNU le DKBA cu tongkam in kan rem aw zo ih,ral hmun khalah tacik pakhat thawn kan cangvai thlang ding an ti. Pathumnak cu remnak kan neih hnuah thlakhat veikhat thurelnak kan nei ding an ti. Palinak cu KNU in an ralih DKBA an rak phuanmi an sut kirsal. Panganak cu a tufang ram buainak ah DKBA hotu Satti in ralhrang a be dingih ralhrang lamin ral an tho peh asile lungrual in kan do ding timi a si.
Netabik remawknak an tuahmi ah DKBA lam an lungkim ciah lo ih, reltha sal dingin KNU an phut. Cumi thu ah KNU lam cun thusuah an nei hrih lo.
Karen ramkulh sungah KNU, DKBA, Kawtholay Army, KNLA PC le BGF tin ralthuam pawlkom 5 an um ih, an lakah BGF cu ralhrang lamtang le ralhrang tuanpi an si.
China le US Thu A Reh Thei Hrih lo – US House Speaker Nancy in Taiwan a tlawn ruangih thinheng tuk China cu Nancy in a tongkum bet.
Nancy cun “Taiwan cu ram pakhat Democracy ram sifel dingin zuam rero an si ih, an ram sungih US ram hruaitu pawl kan tlawn ding tikah China in thu an nei thei lo. China in US ram hruaitu pawl Taiwan tlawng lo dingin an kham theinak san a um lo. Kham tum khal sehla an kham thei cuang lo ding. Taiwan ka tlawnnak san cu buainak coksuak tum a silo ih, Taiwan ih remdaihnak kilkhawi tha dingin a sisawn,” tin China a tongkhum.
China cu US parah an thinheng tuk lawmmam ih, US cozah dokalhnak ca an suah rero. Asinan, tuini tiang cu China lam ralthuam in cangvaihnak an nei hrih lo ih,Taiwan ramri ah raldo an zir rero timi a si hrih. Raldo an zir theh hnuah a takin an cangvai cih pei maw timi cu zohman ih theih cia a silo.
Leave a Reply