Central Chin Pawlpi In Rittheihsi Phur An Kham – A tufang kan ram Myanmar buai hnuah Chinmi tamzet cu India ram Mizoram sungih rittheihsi phur kaihmi tampi an um ih, Chin mipi hmel a balter zet.
Himi thuhla ah Central Chin Pawlpi cun Mizoram lamah rittheihsi phur lo dingin Chin mipi sawmnak an nei ih, Mizoram cozah khal rittheihsi phur Chinmi an kaihmi cu an phutawk hremnak pe dingin an theihter.
Central Chin Pawlpi cun “Myanmar ram buainak ruangah raltlan pawl duat zet le duhdawt zetin rak tuamhlawmtu , rak bawmtu Mizoram cozah siseh pawlkom dangdang khal kannih Chin pawlpi cun lungawithu kan lo sim.
“Mangbang vansanak le riahsiatnak pawl remcang ah hmangin rittheihsi phurtu pawl cu Mizoram cozah in an phutawk hremnak pe dingin kan duh. Kannih Central Chin Pawlpi khalin hivek thiltha lo rittheihsi hrimhrim Mizoram lamah phur lo dingin kan mipi pawl kan simthluh hngal a si,” tin thu an suah.
YBS Bus Rutu In Mi Pahnih A Pah That -Yangon ramthen ShwePita myone CNG Gas thunnak ih cawl YBS 94 Bus pakhat cu August 2, zingah mi pakhat in a ru ih, a ra mawngsuak.
Rukru tifam ah lamzin ahcun cak tukin a mawngih kum 12 nute le nunau pakhat dang a pah that. Bus rutu cun lamzin sirih it nauhak nute le nunau pakhat dang a pah ih, zamrang zetin sizung fehpi an sinan, sizung ah an thi.
Bus rutu cu kungka mawtawpi mawng a si ve ih, Gas thun dingin a tlaraw ve. Sii thammi a nei ko ding tin palik lam cun an sim ih, an kaih hnuah thusuhnak an nei peh rero lai.
Mino Pawl Pahtu Dalan An Kap That – Yangon S.Dagon vengih duhphorhnak nei mino pawl mawtaw ih pahtu Dalan cu August 1 ah South Dagon Guerrilla Force (SDGF) in an kap that tin mipi theihternak an nei.
July 27 ah Mino thenkhat pawl cu Yangon S.Dagon ah ralhrang duhlonak an rak langter ih, lamzin tluan an feh laiah ralhrang pawl cun an dunglamin mataw thawn an pah. Cumi ih ralhrang mawtaw mawngtu cu S.Dagaon veng ih um dalan Kyaw Naing Ko a si ih,ralhrang tuanpitu dalan tin veng mipi cun an sim.
South Dagon Guerrilla Force (SDGF) hotu cun “Ralhrang mawtaw a mawng timi cu felfai zetin kan thei. Ralhrang in ralthuam tiang an pekmi dalan picang khal a si. Innza uktu ihsin venglal sinak beisei teuteutu khal a si ih, cunah kan thianfai lawlaw. Kan kah that laiah in rak kap ve tum nan, a cangvaih hman hlanah kap kap that. A taksa ah vei 3 rori kan kap ngah ih , a hmunah a thi cih. Kannih cu thi le hriamhma ngah um loin himdamten dung kan sipsal a si,” tin a sim.
Ralhrang Bawi Zirhnak Hmunah Bomb A Puak – Yangon ramthen Hmawbi myone Hmawpi ralhrang vanzam sakhan kotih ralbawi zirnak hmunpi a puak ih, damlo phur mawtaw an lut cupco tin kiangkap ih um pawl cun an sim.
August 1, zan nazi 7 hrawngah Hmawpi ih ralbawi zirnak hmun sungah bomb a puak ih , ralhrang damlo phur mawtaw 4 an lut cih. Ralhrang pawl cun raldo kan zirnak tin thu diklo an thlah rero nan, raldo zir caan a silo ih, bomb puak awn rori a si tin kiangkap ih um pawl cun an sim.
Ralhrang thuthup zingzoitu cun “Hmawpi ih ralbawi zirnak hmunpi sungin zrinak an peknak hmunah bomb a puak. Zan nazi 7 hrawngah a si ih, raldo zir caan a si nawn lo. A hnu reilo ah damlo phur mawtaw 4 an lut. Tuitum ih bomb puaknak hmun cu naunau lawng ralbawi si dingin raldo an zirnak hmun a si. Bomb puak ruangah thi an um thei nan, lenglam in fiah theih a silo,” tin a sim.
Japan Ah NUG Palai Zung An Ong – NUG cozah cun Japan ih an palai ding hrang Japan ah NUG palai zung an ong fel ih, hruaitu bik ah Saw Ba Hla Thein an ruat.
Japan ih NUG palai zung cu July 31 ah onpuai an tuah fel ih, NUG palai , Myanmar zalennak hrang zuamtu pawl le Media pawl khal onpuai ahcun an tel ve.
Saw Ba HLa Thein cun suakkhawm mipi ih thusuhnak a let ih, hmailam ah Myanmar mipi hrang theitawk suah in cangvaih an tum thu pawl khal a rel. Japan ih um visa cem Myanmar mipawl cu kan buaip thei hrih lo ih,buaipi thei dingin kan zuam ding tin suakkhawm mipi pawl a simthei hai.
Hitin NUG cun US, UK, Norway, Zzeck, Australia, S.Korea le Japan pawl ah NUG palai zung an ong thei zo ih, ramdang khalah NUG palai zung on vivo an tum. An tumtahmi cu NUG palai zung an onnak ram le NUG pehtlaihawknak tha dingin, a hmun ih Myanmar mipi pawl bawm thei dingin tivek pawl an si
Ramleng In Min Aung Hlaing An Zum Lo – Ralhrang ralkap hotu Min Aung Hlaing cun August 1 ah rampi thuneihnak thla 6 dang an lakbet thu leitlun simthannak a nei ih, ASEAN remnak kan neihmi 5 khal pitlin dingin kan zuam rero lai. Thuneihnak kan lakmi 6 a cem ahcun rampi hrilawknak kan tuah dingih, a nehtu party hnenah thuneihnak kan hlan ding tin a sim. Cucu, ramdang pawlin a zum in an zum thei lo ih, Min Aung Hlaing tongmi pohpoh zum ding a um lo tin an sim.
American cozah le remdaihnak pawlkom sungtel pakhat cun “Ralhrang tongkam suak hrimhrim cu zum ding a um lo. Ralhrang ralkap cun ramsung ah thuphan phunphun an suah ih, mipi an hringhro rero. Ramsung an cangvaih dan cu ramleng darhsuak lo dingin an zuam ih, ramleng ah mithmai ngah vivo an tum. Tuih an umdan vek cun zum ding pakhat hman an um hrih lo a.
“Ralhrang ralkap in ASEAN thawn remnak tuahmi 5 pitlin kan tum an timi cu thuphan an rel men. ASEAN thawn remnak an tuahmi 5 an thlun lo tlunah nasa sinsin ramsung ah an cangvai lam ding. Ramsung ah thuneihnak fehpi vivo an duh ih, ramleng in ralhrang an nornak hnakin ramsung dothlengnak tuahtu pawl ih ralhrang an nornak cu hmuar a nei sawn ding. Cumi cu anmah ralhrang pawlin an theifiang tuk ih, cumi theifiang cingin cangvai an si ,” tin a sim.
Australia ram ih Myanmar thuhla zingzoitu Marston cun “Ralhrang ralkap in ASEAN thawn remnak an neihmi 5 pitlin an tum tin an relsuak nan, zum ding a um lo lawlaw. Min Aung Hlaing cun hmaiton rori in ASEAN hruaitu pawl remnak a rak tuahmi nan, Myanmar a thlensal veten remnak a tuahpimi pawl cu a hlit thluhsal hngal. ASEAN hruaitu lak khalah thenkhat cun ralhrang an mawhthluk ciamco nan, thenkhat cun ralhrang an tuanpi. Hivek ruangah Min Aung Hlaing cun amah dinpitu ASEAN hruaitu thenkhat cu a be tha ciamco ih, caan potsau vivo an tum.
“Ralhrang in thuneihnak thla 6 dang an lak betmi khal hrilawknak an tuah tumi ah nehnak an co thei dan ding an tawlrel cia dingih cumi hrang caan an duh. Hmaisabik ahcun NLD hruaitu pawl an thianfai vivo dingih, cumi hnuah hmin nei party hruaitu dang pawl an hro bet ding. Cutin an duhmi PR hrilawknak an fehpi ding a si. ,” tin a sim.
Taiwan Thu Ah US An Fimkhur – A Tufang Asia hmun hrekkhat ih khualtlawng US House Speaker Nancy Pelosi cun Taiwan a tlawn phah thei thu leitlun a rak simthei zo ih, cumi ruangah China cun ralrinnak an rak pe ve zo.
Tu ah US president umnak White House cun thu an suah ve ih, House Speaker Nancy cu Taiwan tlawng phah lo men dingin an sim. Nancy in Taiwan a tlawng asile China lam ralthuam an hmang thei ih, buainak picang tuk suak thei a si an ti.
China cun Taiwan cu kan ramsung ih um, kan thuneihnak hnuai ih um an si an ti ih, House Speaker Nancy in Taiwan a tlawn ding cu an duh lo lawlaw. Nancy in Taiwan a tlawng asile thungrulnak kan nei ding tin ralrinnak an rak pe zo.
Hivek thu a suah hnuah Nancy in Taiwan a tlawng thotho pei maw timi cu felfai in theih a si hrih lo ih, a tlawng thotho asile China lam cangvai thei dinhmun ah an um tin White House cun thu an rak suah ve.
Taiwan thuhla ah China le US an buainak a reizet thlang nan, tutiang cu a takin China lam an cangvai hrih lo. Nancy in Taiwan a tlawng taktak asile China lam a takin an cangvaih men zum a si ih,Russia le Ukraine buainak bangin leitlun ah buainak dang suak thei dinhmun a si.
Leave a Reply