Makui ramthen Pwint phyo myone Pathein le Mungzua lamzin ah PDF tomi mawtaw cu June 22 zingah ralhrang ralkap in an rak kap ih, PDF mawtaw puak ah PDF 12 an thi ih, PDF 3 ralhrang in an kai ngah. Ralhrang cun PDF 12 thi pawl ih ruang zuk khal an pholang.
Mawtaw khal a puak se thluh ih, mawtaw sungih ralthuam an phurhmi meithal zun 25 khal ralhrang pawlin an laksak. Meithal zun 25 lakin meithal 6 lawng a tha ih, a dang meithal 19 pawl cu mawtaw puak ah an siat. Mawtaw ahcun PDF 20 hrawng an to ih, hrekkhat nungdam in an tlansuak thei.
Ralhrang cun “Lamzin ah rinhlelh mawtaw cek dingin kan dingter ih, mawtaw sungin in kap. Cutikah kannih khalin kan kap ve. Mawtaw puak ah PDF 12 an thi ih, PDF 3 nungdam in kan kai ngah tlunah PDF 2 hriam natuk an ngah. Meithai zun 25 an phurhmi lakin meithal zun 19 a siat ih, meithal zun 6 a thami khal kan laksak a si,” tin thu an suah.
Khuami pakhat cun “Thilthleng taktak a siko. Nidang ahcun lamzin Lilawn ah ralhrang pawl an um dah lo nan, tuitum cu ralhrang pawl an rak um. Ralhrang pawlin thuhla an thei ih, PDF pawl an rak bawh cia in a lang. Ralhrang pawlin mawtaw an hmuh veten cek khal an tum lo ih, hlaral deuh in ralthuampi thawn an rak kap siat hngal a si,” tin a sim.
Pwint Phyo PDF hotu cun “Thuhla a rak darh thupih , ralhrang pawl cun lamzin in an rak bawh cia. Lilawn ah ralhrang pawlin an rak kap ih, PDF lam khalin mah le mah humhimawknak hrang theitawk in an rak kap ve. Mawtaw sungah puak thei le ralthuam a um tikah a puak ol tuk.
“Doawknak le mawtaw puak ah PDF 12 an thi ih, PDF 3 hriam naa tuk an ngah tlunah ralhrang in an kai. PDF 13 cu an luat thei. An fehnak lamzin cu PDF pawl ukmi a tamsawn nan, tuitum ih an fehnak tak cu ralhrang lamin an neh hrih. Cumi ruangah a kiangkap ih um PDF pawl ralthuam pe dingin feh an si. Ralthuam an phurhmi meithal zun 25 khal ralhrang pawlin an laksak thluh a si,” tin a sim.
Ralhrang Le Pyu Saw Hty 14 An That – Sagaing ramthen Khin Oo myone Kanthit khua dunglam ah Khin Oo in suak palik bawi Soe Htut Khaing le Pyu Saw Htee pawl tomi mawtaw cu June 22, zinglam nazi 9:30 hrawngah Khin Oo PDF pawl in an rak kap ih, ralhrang palik le Pyu Saw Htee 14 an thi tin thu an suah.
ralhrang ralkap mawtaw to ralhrang palik le Pyu Saw Htee pawl cu NLGRF ,Red Force, mipi ralkap le tuansung pumpe pawlin an rak do. Doawknak ah ralhrang palik le Pyu Saw Htee pawl an cang man lo ih , Mawtaw sungih to an zaten an thi thluh. Ralhrang palik le Pyu Saw Htee 14 an thah tlunah meithal zun 11 khal kan laksak thei tin tin PDF hotu cun mipi a simthei.
Ralhrang In Mipi Inmi Tikhur Ah Zian An Thlak – Ralhrang ralkap cun khuami pawl ih inmi tikhur sungah ralthuampi cerek le zian pawl an thlak ih, cumi ruangah khua mipi pawl cu dam loin an buai thluh.
Makui ramthen Saw peng, Akyi khua ah khuami pawl cu pum na, sungdok, kawtha lo in an um ciamco ih, an tidai inmi a thianghlim lo si ding, tiin June 21 ah tikhur thianfainak an nei.
Tikhur cu cet in an zukkang ih a sungah tum in ciarbek pawl an huatfai. Cumi ahcun tikhur sungah ziandawng tam zet an hmu. Ralhrang pawl cun khua mipi pawl dam loin buai thluh haiseh timi duh ah an thlak hrim siko tin an sim.
Saw mipi uktu pawlkom cun “Ralhrang in mipi pawl harsatnak tuarter an duh ruangah, an tuah thupmi phunkhat a si. Hivek kan hmuh zo ruangah mipi ralkap pawl thawn khua le ram thianfainak kan neih cih a tul,” tin mipi an theihter.
Khawsung tikhur ah ralthuampi cerek le ziandawng thlatu ralhrang pawl cu May 22 ihsin thok in Kyaukto-Pakkoku lamzin tluanh sukso an rak vak rero zo.
May thla cem ihsin ralhrang pawl cun Magway ramthen, Yaw ram (Gangaw, Kyaw, Htelin, Saw le Kyaukto) peng pawl an nor rero zo. Atufang ahhin Gangaw, Htelin peng ah ralhrang ralkap le mipi ralkap pawl ni 3 sung an do aw zo tin khuami pawl cun an rel bet.
KIA Le PDF In Ralhrang An Do Peh – Sagaing ramthen Intaw ( အင်းတော် ) myone ah kachin ralkap KIA le Intaw PDF cun ralhrang ralkap an do peh ih, ni 2 sung ralhrang an donak ah ralhrang 23 tlun an thi tin Intaw pDF cun thu an suah.
Intaw PDF cun “June 18 ah Intaw myone Aungkung khua kiangih umhmun khuar ralhrang ralkap pawl cu kannih Intaw PDF le KIA in rinloparal ah kan kap ih,ralhrang 20 tlun an thi. Bomb kan puah hnuah meithal in kan kap ciamco cih. Tawkfang cun ralhrang ralkap lamin ralthuampi an hmangih , duhtawk in kiangkap an kap ciamco.
‘Ralhrang pawl ih kahsuahmi ralthuampi cun raltlan nauhak 4 le upa pakhat a ngah. June 20 khalah Aungkung kiangih umhmun khuar ralhrang ralkap pawl cu kannih Intaw PDF le KIA in kan kap betih, ralhrang 3 tlun an thi. Ni 2 sung ralhrang ralkap kan domi ah ralhrang 23 tlun an thi ih, ralhrang 10 tlun hriamhma ngah an um. Doawknak ah kannih PDF lam khalin hriam ngah pakhat a um ve.
“kannih PDF le KIA cun thupten ralhrang umnak kan kap ih, ralhrang lamin ralthuampi an hman hlanah dung kan sip. Rinparal ih do kan si tlunah hmunram kan fiang ih, kan dinhmun siat hlanah dung kan sip. Cucu, kan himnak bik a si,” tin mipi an simthei.
ASEAN Humhimnak Vuanci Meeting Ah Ralhrang Palai A Tel Ve – Avei 16-nak ASEAn humhimnak vuanci meeting cu June 22 in an thok ih,ralhrang palai ralbawi Mya Htun Oo khal meeting ah a tel ve.
A tufang ASEAn Chairman Combodia cun ASEAN sungtel hmuahmuah meeting kai dingin an sawm. Tuitum meeting cu ralkap bawi pawl humhimnak lam rel dingmi a si ih, ASEAN sungtel pawl an tuankhawm thei dan ding khal an rel ding.
ASEAN sungtel hruaitu lubik pawl meeting ahcun Myanmar palai ah ralhrang sawm an si dah lo ih, Min Aung Hlaing a rak tel thei lo. ASEAN sungtel ramdang vuanci pawl meeting khalah ralhrang palai sawm a si cuang lo. Tuitum ASEAN Defense vuanci meeting ahcun ASEAN sungtel Defense vuanci zaten sawm an si ih, ralhrang palai a tel ding cu dokalhtu an um lo ruangah a tel thei.
Ralhrang palai pawl cu June 21 ah Cambodia an thleng zo ih, June 22 meeting thok ni khal a thokin an tel. Combodia cun ASEAN sungtel ram 10 ih palai zaten kan sawm ih, ram 8 lungkimnak thawn meeting tuah thei kan si tin thu an suah.
ASEAN Defense vuanci meeting ah ralhrang palai a tel thei cu Myanmar mipi dinpitu pawl an lungawi lo zetih, an lungawilonak an langter rero ve.
Leave a Reply