Ralhrang in rampi thuneihnak an lak hnuah Myanmar ramsung hmun tinkim in ralhrang uknak nasaten do a si ih, thla tamzet sung cu Sagaing ah ralhrang ralkap le mipi ralkap pawl an do aw zo.
Tu ah sagaing ramthen sungah ralhrang ih phone thlaumi an sar ngah ih, a phone sung ahcun ralhrang pawl phuanaknak video le zuk tampi a um. Ralhrang phone thlaumi an zohfel tikah mipi 30 hridai ih an khih hnuah an hrem lai,a bur ih mipi an thahlai lai tivek a um.
Ralhrang phone cu Sagaing ramthen Ayadaw myone sungah mipi in an sar ngah. Phone sung ahcun phone neitu in a rualpi ralkap dang pawl mipi ziangzat nan thatt? ziangtin nan that tivek a sut ih, mipi a bur ih,an thah lai le an hrem lai pawl khal a phone sungah a rak khum thluh.
Phone neitu ralkap bawi cun a kuthnuai ralkap dang pahnih cu, “mi paziat nan that zo tin a sut. Pakhat sawn cu mi 26 ka that zo, meithal ih kah thatmi tivek an si tin a sim. Phone neitu ralkap cun “Kei cu mi 8 ka that zo, hrekkhat cu nam in an hngawng ka at ih ka that hai” tin a uang aw ve. A dang pakhat cun kei cu ka tih ih, ka that ngam hrih lo tin a rak let ve.
Ralhrang ih phuanawknak pawl cu May thla sungih thleng a si ih, ralhrang pawl cu Sagaing ramthen sungih ralhrang lawng siloin Yangon ramthen sungih ralhrang pawl khal Sagaing le Makui ah kuat an si tin CDM ralbawi Lin Hte Aung cun a rel.
Thilthleng cu felfai zetin zoh a si tikah Ayadaw myone Chinnpin khua ih thilthleng a si ih, a caan lai khalah Ayadaw thuthang pawlin an rak tarlang. Cumi ahcun May 7 ah ralhrang in khuami 6 an rak kap that ih, khuami 30 hrawng an rak kai. Kaihmi dang khuami 7 pawl khal tuini tiang an umnak theih a si nawn lo. May thlasung thotho ah Ye Oo myone sungin khuami 30 pawl cu ralhrang in an kaih hnuah an that thluh in Ye Oo lam cun thu an suah ve.
Ralhrang phuangaw pawl cun minung an thah ih taksa umdan pawl, an duh tiktikah duhtawk in mi an thah thei thu, minung lu cu veikhat men ah sah tan a theih lo thu, minung taksa in aihre rong vek a suak theu ,kan duhmi cu kan that vivo ding siko tin an rel rero men.
PDF Pawl Ngiartu An That – Tanintharyi ramthen Yephyu myone Mu’do’ khua ih um Kan Soe timi cu PDF pawl a ngiar tikah a ngiar pawlin an that taktak.
Kan Soe cu tuitoih le Pyu Saw Hte sungtel a si ih, meithel a neih ve ruangah PDF pawl a ngiar theu. Cumi ruangah, PDF pawlin a takin an that lawlaw ih,hrosuang le ralhrang lamtang hrimhrim an thah vivo ding thu PDF cun thu an suah.
Khuami pakhat cun “Meithal pakhat a nei ih,Pyu Saw Htee le tuitoih pawlkom ka si tin a rel aw. An ngam asile PDF pawl cun in ra that haiseh in hro a suang ringring. Cuvek ruangah PDF pawlin an that lawlaw siko,” tin a sim.
Ralhrang In An Kuthnuai Pahnih An Kai – Ralhrang ralkap cun an zingzoitu pawlkom pawl ih thuthup a darh ruangah an kuthnuai ih hnatuan Home Affair sungtel pahnih an kai.
Ralhrang zingzoitu pawlkom pawl cun Daw Suh thuhla nasaten an zingzoi ih, thubuai thar tuah bet an tum. Cuvek ih ralhrang pawl cangvaih tum dan mipi lakih a darh tikah ralhrang cun an kuthnuai pahnih cu mipi hnenah thuthup nan sim tin an kai.
Ralhrang Home Affair cun “Mipi hnenah kan thuthup simtu pahnih kan kai ngah zo. An thuhla felfai zetih kan zingzoi hnuah kan kai ngah. Kan kaihnak san khal fiahnak tha tuk kan nei. Neta khalah kan thuthup phuang thuptu an um asile an him lan lo dingih kan kai ngah thotho ding a si,” tin thu an suah.
Ralhrang in rampi thuneihnak an lak hnuah CDM tuah lo nan, ralhrang sungah thupten mipi lamtang an rak um ve ih, ralhrang sungih thuthup pawl cu mipi hnenah an rak sim theu.
Makui ramthen khalah ralhrang pawl meeting an neihnak video a rak darh zo ih, cumi ruangah ralhrang in an kuthnuai pawl an rak kai zo thotho.
Ralhrang In Phun 10 Sung Pawl Caan An Pe – Ralhrang ralkap cun 2022 ih phun 10 sung pawl le phun 10 phi remcang lo pawl cu 2023 ah phun 10 phitnak caan kan pesal ding tin thu an suah.
Ralhrang ralkap cun June 17 ah a liamcia fimzir kum hrang phun 10 ong cazin an rak suah ih, phun 10 phitu lakin hrekkhat hrawng an sung. Phun 10 sung an rak tam tikah ralhrang cun phun 10 sung siseh phi remcang lo pawl khal phun 10 phitnak caan kan tuah sal ding tin thu an suah.
Ralhrang cun a liamcia fimzir kum ah thla 4 lawng tlawngta pawl ca an rak zirter ih ,camipuai an tuahter. Cucu, Myanmar ram sungih veikhat thlennak a si ih, tlawngta pawl cazir mumal loin camipuai an tuah.
Tukhalah ralhrang ralkap cun ramsung hmun tinkim in tlawng an phuan zo ih, tuitum cu tlawngta pawl thlaw 9 sung ca an zirter ding thu an sim.
Ralhrang cun phun 10 sung le phi remcang lo pawl phun 10 phitnak caan an peksalnak ding san cu 2024 ih zirnak thar kan fehpi ding ruangah a si tin an tarlang.
Mipi Hnaihnoktu Ralhrang An Do – Makui ramthen Gangaw myone sungih cangvai ralhrang ralkap pawl cu Gangaw PDF le an tuanpi pawl cun ni 2 peh in an do ih, ralhrang thi an um tin thu an suah.
PDF Gangaw cun “June 14 ah Kankhua ih mipi pawl kaitu , mipi inn urkang ih, mipi tilva that ih eitu ralhrang pawl cu kannih PDF Gangaw komkhawm cun June 17 ah bomb puah in kan do ih, ralhrang 3 naa tukin hriam an ngah.
“June 18 khalah ralhrang pawl cu bomb puah in kan do betih, ralhrang 3 an thih tlunah ralhrang 2 in hriam an ngah. Ralhrang lamin ralthuampi thawn in kap ciamco nan, kannih PDF lam cu kan him a si,” tin thu an suah.
Leave a Reply