Min Aung Hlaig In Tlangpar Pawlkom 3 Thu A Rak Tiam

Min Aung Hlaig In Tlangpar Pawlkom 3 Thu A Rak Tiam – September 26 ah tlangpar ralthuamkai lakin Wah, SSPP le NDAA pawl cun avei hnihnak hrang ralhrang hotu Min Aung Hlaing an tongih, Min Aung Hlaing cun thu a rak tiam hai.

Tlangpar ralthuamkai pawlkom 3 in Min Aung Hlaing an ton thu ah ralhrang thuphuangtu Zaw Min Tun cun “A thu cun remawknak an nei nan, hlutdaw vekin rel ding asile daan remtul a um. Tu ahcun hlutdaw ih daan cu rem a theih hrih lo ih, hlutdaw felfai a um tikah tuitum ih remawknak thu pawl cu kannih ralkap in kan keng lut dingih a takin thleng dingin kan buaipi ding,” tin BBC a simthei.

Wah palai cun ralhrang hotu Min Aung Hlaing hnenah Wah ramri tuahsak dingin a dil ih, ralhrang hotu Min Aung Hlaing cun rem a rak tisak tin anmah Wah lam cun thu an rak suah ve. Asinan, Wah ramri tuahfel dingah hlutdaw daan rem a tul thu ralhrang thuphuangtu Zaw Min Tun in a rel ve ih, tu rori ah thilthleng hngal dingin a lang lo.

2008 daan hrampi vek asile Wah hi ralhrang hnuaiah mahte uk aw an sinan, ramri tuahsak an si hrih lo ih, Wah in ramri an neih theinak dingah 2008 daan hrampi rem hmaisa a tul. Culo cun 2008 daan hrampi vek asile Wah pawl anmahten an uk aw thei nan, ramri an nei thei lo timi daan a rak um.

SSPP cun a tufang Shan ramkulh sungih ralhrang thawn an doawknak thuhla le ralhrang in SSPP sakhan tthawn dingin thu an pekmi pawl cu Min Aung Hlaing an relpi ih,khat le khat kap aw lo dingin remawknak lam an rel.

NDAA cun Maila hmunram sung cu kanmahten kan uk aw duh tin Min Aung Hlaing an dil ih, Min Aung Hlaing cun nan duh bangin tuahsak nan si ding tin a rak tiam nan, Minla khal 2008 daan hrampi vek asile mahte uk aw thei lo an si ruangah 2008 daan hrampi rem hmaisa a tul thotho. Ralhrang cun 2008 daan hrampi rem an duh dah lo ih, tuitum khal a hmin men in thu an tiam men siko ding, 2008 daan hrampi an rem taktak lo ding tin Myanmar politic thiam pawl cun an hmuhsan an rel ve.

Wah le Maila ahcun 2010 Myanmar rampi hrilawknak le 2020 Myanmar rampi hrilawknak an rak tuah thei lo ih, cozah cangvaihnak um loin anmah ralthuamkai pawl hmunhma an rak co. Cucu, tu ah zalen zetin ralhrang hnenah hmunram an dil lawlawmi a si.

Ralhrang Kaih Duhmi Model Han lay Canada Ih Um Theinak A Ngah – Ralhrang ralkap in Thailand tiang an dummmi Model Han Lay cu Canada cozah in an hnenih um dingin an pom zo ih, September 27 ah Thailand suahsan in Canada ah a zam ding.

Hanlay hi 2021 April thla ih tuahmi Miss Grand ah Myanmar aiawh in rak fehsuak a si ih, Myanmar aiawh in a pholangawk caan ah ralhrang uknak a dokalh ih, leitlun theih ah Myanmar ram buainak a ausuahpi. Cuveten ralhrang cun Model Han Lay cu rampi dokalhtu a si tin thubuai an tuahsak cih ih, kai dingin thu an suah. Cumi ruangah Hanlay cu Myanmar ah tlung ngam nawn loin Thailand ah beu ringring a si.

Ralhrang in kai dingin thu an suah veten Canada ih beu theinak a rak dil nan, duh vekin a rak feh thei lo. Curuangah Thailand ih a um caan khal a cemih, ramdang pakhat khat ah feh lawkin Thailand kirsal ih passport renew ding a si. Cumi hrang Vietnam ram ah a feh duak ih , Thailand a kirsal lamah Thailand palik pawlin an rak kai nan, UN bomnak in Han Lay a luak thei ih, tu ahcun raltlan dinhmun Canada a feh thlang ding.

Ralhrang pawl cun leitlun palik hnenah Han Lay in Myanmar ah daan a pahbal ih kaih kan tum tin a rak simthei. Ralhrang pawl cun leitlun palik ,Thailand palik le Vietnam palik pawl tiang anmah bawm dingin an sawm ih, anmah ralhrang palik pawl khal Thailand tiang an feh phah. Asinan, Han Lay an kai thei cuang lo ih, tu ahcun Han Lay cu ralhrang pawl kaih theilonak hmun Canada ah a zam thlang ding.

Russia Ih Kahawknak Ah Mi 13 An Thi – Russia ram Moscaw khawpi ih peng 600 hla Izhevsk khua ih tlawnginn ah mi pakhat cun duhduh in midang an kap ciamco ih tlawngta nauhak 7 le tlawnginn hnatuan 5 a kap that.

Tlawnginn sungah mipum 1000 hrawng an um ih, kahawknak a um veten Russia ralkap pawl an feh cih nan, midang kap thattu cu palik kutah a pe aw duh lo ih,amah le mah a kap that aw cih ve.

Midang kap thattu bik amah le mah a thahawk ruangah thusuh a theih nawn lo ih, ziangruangah tlawnginn sungah duhtawk in midang an kap ciamco men timi a san felfai theih a silo. Asinan, tufang Putin ralkap thar a lak ding thu le Ukraine ih ralkap thelhbawh pawl kuat a tum thu lungawi lo ruangah hivekin cangvai a si pei maw titu an um.

Tlawngta nauhak 7 le tlawnginn hnatuan 5 an thih tlunah tlawngta nauhak 17 le tlawnginn ih hnatuan 7 dang khal hriamhma an ngah. Mi 13 an thih ruangah September 29 tiang tlawnginn an khar hrih thu tuanvo neitulam cun thu an suah.