Min Aung Hlaing Ih Inn leitu Lakah Ramdangmi Khal An Tel

NUG Cozah cun may thla in Yangon ih Min Aung HLaing inn kan zuar ding tin thu an suah bangin, Min Aung Hlaing inn an zuar rero zo ih, Min Aung Hlaing ih inn leitu lakah ramdangmi khal an tel tin NUG Finance zung cun mipi an simthei.

NUG cun Yangon, In-hlia ih Min Aung Hlaing ih inn cu $10million in an zuar ih, a hlawm ih lei duh hrangah lei theih a si bangin $100 man tete in inn neitu sinak Share khal an zuar tel. Tui dinhmun ah Share leitu an tambik ih, Share leitu lakah ramdangmi khal an tel tin an sim.

May 5 in an zuar thokmi Min Aung Hlaing inn cu ni 5 sungah $3million tluk man an khawng zo ih, a leitu pawl cu $100 man tete in share leitu an si. Min Aung Hlaing ih inn neitu sinak share leitu mipum 5000 tlun an um zo ih, cumi sungin zatek ah 10% cu ramdangmi an si. Ramdangmi lakah Myanmar ram suahsan ih ramdangmi sinak neitu tlunah ramdangmi taktak khal an um tin NUG lam cun an tarlang.

Yangon ih Min Aung Hlaing inn man taktak cu $30million hrawng a man ding tin inn man theitu pawl cun an sim ih, NUG cun man olten inn zate man $10million an zuar. Inn zaten siloin inn neitu sinak share lei duhtu hrangah share pakhat ah $100 in an zuar.

Myanmar ram dothlengnak ah mipi in nehnak kan co asile nehnak kan co caan ah NUG cun a takin Min Aung Hlaing inn an zuar fel dingih, cumi caan ah, tu ih Min Aung Hlaing inn leitu pawlin hlawknak tampi an tel thei ding. Dothlengnak ah mipi in nehnak kan co lo asile, tu ih Min Aung Hlaing inn leitu pawlin tangka an ngahsal lo dingih, NUG hrang an hlu tin a feh lanta ding. NUG cozah cun Min Aung Hlaing ih inn an zuarmi man an ngahmi sumpai zaten dothlengnak hrang an hman ding thu mipi an rak tiam zo.

Ramdang ih um pakhat cun “keikhal Min Aung Hlaing ih inn neitu sinak Share pakhat ka lei ve, neta ah hlawknak beisei siloin NUG cozah ka bawm theinak le dothlengnak ah ka tel theinak a si tin ka ruatih, $100 ngahsal beisei loin dothlengnak hrang sumpai pe ka sisawn,” tin a sim.