Min Aung Hlaing In A Kuthnuai Pawl A Kawk – Ralhrang khal thlatin meeting an nei ve ih, November thla an meeting ah ralhrang hotu Min Aung Hlaing cun a kuthnuai pawl cu nan tangka hman dan a dik lo tin a kawk hai.
Min Aung Hlaing cun “Ramkulh le ramthen sumpai hman dan pawl kan zoh tikah sumpai hmannak le tuahmi um riai siloin sumpai suah nan tam tuk. Curuangah sumpai lamah kan buai ih, tangka nan suahmi a tam tuk. Sumpai nan dil vek le na suah vekin a takih nan tuahmi a um lo.
“Ramthen le ramkulh tin ih hnatuan ding pawl khal hram nan thok lo. Asinan, sumpai cu nan dil rero men. Curuangah sumpai hman theizat kan suahmi cu ka suah bangin kan thlun thei a tul ding. Cuvekin sumpai suahtu zaten a takin an tuan maw tikhal felfai zetin kan zoh thlang ding a si,” tin Min Aung HLaing cun sumpai tuanvo neitu a kuthnuai pawl a kawk hai.
Ralhrang Rawl Dartu An Kap That – Pago ramthen Tayawaddy myone Thungse khua sanzui veng uktu cu ralhrang lamtang a si tlunah ralhrang pawl rawl a do theu ih, an kap that.
Khuami pakhat cun “A hmin cu Tun Tun tiah an ko ih, ralhrang in rampi thuneihnak an lak hnuah veng uktu a tuan ve. November 25, zinglam nazi6:15 ah an kap that. An veng hall ah ralhrang pawl a umter ih ralhrang pawl tulsammi ziangkim a buaipi.
“A thih hnu reilo ah ralhrang pawl an thleng cupco ih a ruang khal ralhrang pawlin an la. Kan khua luhnak le suahnak khal ralhrang pawlin an khar ih,khua sung an cek ciamco. Sualnak nei lo mino an kai pang ding kan phan zet. Amah Tun Tun sawn cu ralhrang tuanpi lo dingah simtheih rero a sinan, ralhrang a tuanpi peh thotho ruangah a tuar phah a si,” tin a sim.
PDF 10 Le Mipi 8 An Thi – Sagaing ramthen Khin Oo myone ih ni 10 sung doawknak sosang ah PDF 10 le mipi 8 an thi tin Khin Oo PDF cun an sim.
Ralhrang ralkap cun November 15 in Khin Oo myone an rak do thokih doawknak ralhrang thi an tam tin PDF lam cun thu an rak suah. Doawknak ih ralhrang thi an tam tikah ralhrang pawl cun tlunzuang raldonak an hmangih khua 9 an luhcilh vivo. Tutiang in Khin Oo myone boruak a dai thei hrih lo.
November 15 ni ah ralhrang cun Yattaw khua an luhcilh ih khuami pakhat an that. November 18 ah ralhrang pawl cun SHwe Yamin khua an luhcilh ih, doawknak ah PDF 2 an thi. November 19 ah ralhrang pawlin Paungle khua an luhcilh ih, mipi inn 136 an urkang sak tluah mi 2 an that. November 20 ah ralhrang pawl cun Letpan Kyi khua an luhcilh ih inn 73 an urkang. Madaung khua khalin inn 75 an urkang ih, Shweka khua in inn 70 le Sisung lay khua in inn 4 an urkang hnuah mi pahnih an that.
November 21 ah ralhrang pawl cun Sawkyi khua in inn 64 an urkang ih, Tanatsing khua in inn 120 an urkang sak. November 23 ah ralhrang pawl cun Kantaya khua ah PDF pakhat le nauhak pakhat an that ih, Munghlah khua doawknak ah PDF 7 le mipi pakhat an thi. Doawknak ruangah khua 9 in mipi tamtuk hmunhim ah an tlan ih, tlunnak an nei hrih lo.
PDF Fawm Hruh In Cangvai Ralhrang – Ralhrang ralkap cun an hminthatnak dingah le PDF pawl hminsiatnak dingah a phunphun in lamzin an dap ve ih, tu khalah PDF fawm hruh in Mipi inn an nawkkang.
Sagaing ramthen Shwebo myone sungah ralhrang ralkap cun PDF fawm hruh in mipi inn pawl an nawkkang ih,PDF pawl cangvaihnak vekin an langter. Asinan, PDF pawlin ralhrang cangvaihnak an theifel ih, mipi simfiangnak an nei cih ve.
Shwebo PDF hotu Bosuaiye cun “Doawknak a thlen tikah ralhrang ralkap cun kiangkap khua pawl an nawkkang cih ih, pDF pawl cangvaihnak vekin thu an suahmi a tam tuk zo. Anmah ralhrang pawlih urkangmi khua rori khal PDF pawl an mawh men. Cumi cu ralhrang pawlin PDF pawl rori an si timi fiangter duh ah PDF fawm an rak kol thluh ih, PDF fawm hruh in mipi inn an urkang theu.
“Ralhrang hmun pakhat kan domi khalah ralhrang pawl ih thuamhnaw retnak bet kan zoh tikah PDF fawm hlir an rak ret. Kan sakhan in kan fawm lakmi an rak nei ve ih,cumi hmangin ralhrang cun kan fawm vek an tawlrel. Curuangah ralhrang in kan fawm vek an neihmi pawl cu kannih Shwebo PDF in kan hruh nawn lo ding. Ziangahtile, ralhrang pawl thangah kan lut tum lo a si,” tin a sim.
Fala Tlangval Thattu An Kai – Myanmar ram buainak ah fala le tlangval khal koker ah tongaw thei dinhmun ah an um nawn lo. Irrawaddy ramthen Pathein khua ah khua pawn lilawnpi hnuai komker ih tongaw fala le tlangval cu mi pahnih in an va luhcilh ih, an thah hnuah an thilri an laksak.
Sihni pakhat cun “Tu ahcun misual pahnih thuhla relcat a si thlang. Fala le tlangval ummen an va luhcilh ih an va that. That loin an thilri tla laksak men sehla hremnak a dem deuh ding nan, tu ahcun rukru le mithat thubuai hmangin hremnak pek an si. An pahnih in rukru man ah kum 10 thawngtla dingin hremnak pek an si ih, ngaihzawng aw an thah ruangah anmah that dingin Court cun thu a suah. Cun, an thil rukmi pawl rak zuar bawmtu nunau khal kum 2 sung thawngtla dingin hremnak an pe.
“Ram buai hnuih thilthleng a si. Fala le tlangval thattu pahnih cu Cin Aung Htwe ( kum 23 ) le Chit Mintu ( kum 24 ) an si ih, an rukmi pawl zuarsaktu cu Cin Aung Htwe ih nupi a si. Mi an thah hnu reilo ah kaih ngah an si ih, tu ahcun an tuah vekin hremnak an pe zo a si,” tin a sim.
Rakhine Ah UN Bomnak An Phit Bet – Ralhrang ralkap cun Rakhine ramkulh sungin myone 6 pawl ah UN bomnak a rak phit ih, bomnak thilri an lutter duh lo. Tu khalah ralhrang cun UN bomnak lut lo dingin Myone dang pahnih an phit bet.
Ralhrang in UN bomnak lut lo dingin an phihmi myone pawl cu Paukttaw myone, Butituang, Kyaukphyu , minpia, taungkuk, Sitdwe ,Maungtaw ,Ratituang pawl an si.
MYone 8 pawl ahcun sivai le eiin phunphun bomnak khal ralhrang pawlin an luhter siang lo ih, a sungih um mipi pawl cu sivai le eiin phunphun bomnak pek tul tuk an si tin an sim.
Ram pakhat a buai tikah mibawmtu pawl cu zalen zetin bomnak pek sian an si theu nan, ralhrang pawl cun raltlan pawl khal mipi ralkap lamtang an si tin bomnak thilri le eiin an pe duh lo. Ralhrang pawl cun mipi ralkap lawng siloin raltlan umnak khal an kap theu ih, raltlan an thatmi khal a um.
Rakhine ih um pakhat cun “Ralhrang pawl cangvaih dan cu a makin a rapthlak tuk lawlaw. Mipi harsa hrang bomnak thilri pek khal an siang lo ih, lamzin tiang an kham. Anmah ralthuamkai veve buainak ah mipi bomnak pek siang lo tivek cu ralhrang pawl lawng an si,” tin a sim.
Puai Atcilhtu Min Aung Hlaing – Ralhrang hotu Min Aung Hlaing cun amah sunloih theinak dingah puai a tuah rero tin a kuthnuai pawl an phun ih, Min Aung Hlaing ih puai tawlrelmi pawl an relsuak.
Thuneihnak atcilh tuk ruangah Myanmar rampi thuneihnak latu Min Aung Hlaing hi siangpahrang vekih um duh, President vek ih um duh, sunloih le upat duh zettu a si ih, tu khalah anmah an sunloih le an lom theinak dingah puai phunphun a tawlrel.
Naypidaw ih ralhrang pakhat cun “Min Aung Hlaing in puai hman ding a ngah tam lawlaw. Cukhal amai tawlrel a si ih, puai hman nuam a tituk. December thlasung ah Pwin Oo Lwin ralkap tlawng DSA le SDTA ah tlawng khar puai a tuah dingih amah khal a tel ding. December 15 ah Meikthila ah ralhrang puai a tuah dingih amah khal a tel ding. Meikthila ralkap puai ahcun Russia vanzam lei tharmi a pholang ding. January 4 , luatlatyi nih ah ralbawi vekin amah sunloihinak puaipi a tuah ding. Cumi hrang mawtaw ceimawi le thildang phunphun khal a cah rero zo.
“Sunloih upat pekmi hi a duh tuk lawmmam ih amah sunloih le upatnak ding puai a tawlrel rero men. Puai a tuah thluhah a kuthnuai pawl rawl a eipi dingih a tlon rero hai ding. Tu ahcun bawibik, thuneihtu bik siangpahrang vek rori in caan a hmangih nuam a ti lawlaw. Cucu, a duhmi khal a si,” tin a sim.
England Le US Hmat An Zem Aw – 2022 FIFA World Cup zuamawknak ih group B puai hrang England le USA cu November 26 zingah an lek ih goal um loin an duhtawk aw. An duhtawk ruangah hmat 1 veve an zem aw.
Group B pawl khal veihnih ciar an lek zo ih, England hmat 4, Iran hmat 3, USA hmat 2, Wales hmat 1 tin an um. Tu hrih ahcun group B in sungsuak lut fel an um hrih lo ih , England an dinhmun a thabik. Cutirual in USA Le Iran khalin caantha an nei ve. Puai khat ciar lek ding an nei lai ih, thupi bik cu an puai neta bik ih nehnak an co ding a si thlang. Puai dang result le tuizan ih lek ding pawl cu zinglam thuthang ah ka phuang zo.
Leave a Reply