Min Aung Hlaing In An Kuthnuai Pawl Ttawl Dingin Thu A Pe

Min Aung Hlaing In An Kuthnuai Pawl Ttawl Dingin Thu A Pe – Ralhrang ralkap hotu Min Aung HLaing cun a kuthnuai ralhrang pawl cu na taksa sanzawng le taksa pum thawn mil aw dingin nan ttawl pei, nan taksa ih duh hnakin nan thau lo pei tin thu a pe.

Min Aung Hlaing ih thusuak cu ramkulh le ramthen tinkim ih ralhrang hmun pawlah an kuat thluh.

Min Aung Hlaing cun “Ralhrang ralkap siseh ralhrang palik khal na taksa pum si ding dan vek cekci in nan taksa nan ret ding. Nan ruang pum mil lo khopin nan thau lo pei, nan taksa ih mil in nan ttawl dingih, ziangkim ah firvat thazet le rang zetin cangvai thei ringring nan si ding. Nan taksa pumih si ding hnakin nan rit lo pei,” tin thu a pe hai.

Ralhrang ralkap lakah taksa mil lo ih, thau le taksa mil lo khopih ttawl tampi an um ih, leitlun ramdang ralkap le palik pawl thawn tahthiam ngam ding an silo lawlaw. Tu ahcun Min Aung Hlaing in a kuthnuai ralhrang pawl thau perper ih um lo dingin thu a pe hai cu a si.

Indonesia Ih Bawhlung Sit Buainak Ah Mi 174 An Thi – Indonesia ram ih club bawhlung sitnak ah mipi le palik an buai ih, mi 179 an thih phah zo.

Indonesia ram ih club ral aw zet Arema FC le Persebaya FC cu October 1, zarhte zan ah bawhlung an sit ih, caan a cem tikah Arema 2-3 Persebaya tin mikhual lamin nehnak an co. Kum 20 lenglo Arema club in Persebaya club an rak neh ringring nan, tuitum ah Persebaya lam nehnak an co ve ih, mipi lungawi tuk cu an laam rero.

Inntek Arema lam mipi pawl cu an sun tuar thiam loin an thinheng tukih bualrawn sungah an lut. Cuveten palik pawlin an rak kham hngal ih, mipi cun palik kut an thlak tikah palik pahnih an thih phah. Cuveten palik pawl cun mithli tlaknak bomb an hmang ciamco ih, mipi cu thawhak le mithli tla in a buai.

Bualrawn sungih mipi thawhak ah mipi 125 hranwg an thi ding tin buaipitu pawl cun an sim ih, mipi thawsam le mitcip ih buai tampi an um tikah sizung luhpi rero an sinan, sizung lamah thawhak le mitcip ih thi an um bet vivo ih, thu netabik tiangah mi 174 an thi zo tin tuanvo neitu pawl cun thu an suah.

Hivek thilthleng rapthlak ruangah Indonesia ram ah club pawl zarhkhat sung bawhlung sit hrih lo dingin thu an suah. Bualrawn ah mipum 38000 lawng an tlem nan, mipum thawng 40 an lut tin an sim ih, bualrawn sungih mitthli tlaknak bomb hmangtu palik pawl khal nasaten soisel an si. Thilthleng thawn pehparaw in ziangkim ah nasaten zingzoinak an nei rero lai ih, hremmak a suak leh ding.