Min Aung Hlaing In Daw Suh A Zuam

Ralhrang ralkap hotu Min Aung Hlaing cun Daw Aung San Suh Kyi rori a zuam ih, Myanmar Politics ah Daw Suh tel thei nawn lo dingin khua a khang rero tin ralhrang thuthup a suak.

Ralhrang in rampi thuneihnak an lak hnuih an kaihmi Daw Suh Kyi cu June 22 2022 ah Naypidaw thawnginn sungah an khum thokih, a thubuai le hremnak pekmi a cem hlanhlo ralhrang lamin suah zalen an tum nawn lo. A thok ahcun Daw Suh Kyi cu Naypidaw ih amai inn ah kiltu nei in ret asinan, tu ahcun thawnginn hmuansung ah an ret zo.

Daw Suh Kyi umnak dingah Thawnginn sungah inn an sak ih, thawnginn sung Court ah a thubuai khal rel peh a si thlang ding tin ralhrang thuthup phuangtu cun a rel.

Ralhrang thuthup phuangtu cun “Hotu Min Aung Hlaing in Daw Suh Kyi thawnginn sungih khum dingin le Myanmar politics ah tel thei nawn lo dingin a tawlrel ih , thu a pe. Amah Min Aung Hlaing ih thupek ruangah Daw Suh khal thawnginn sungah an khum zo.

“Min Aung Hlaing ih tummi cu Daw Suh in Myanmar ram a suahsan fel ding lole thawnginn sungah a caan hmang cem dingin timi a si. Hotu cun Daw suh hmel khal a hmu paih lo ih, a hua tuk tin amah in a rel zo. Daw Suh ih thubuai a cem tik khalah thawnginn sungih caan a hman thei dan ding an buaipi ding.

“Thilthleng umdan kan zoh rero asile a tufang caan hrang lawng ralhrang in thuneihnak an lakmi siloin kum tampi daih ziangkim timtuahnak an nei cia in a lang. Sipuazi, Politics le daanpi tiangin hotu lam cun an buaipi thluh. Daw Suh a thih tiang ziangtin thuneihnak kan nei vivo thei ding timi cu ralhrang hotu ih tumtahmi pakhat a si,” tin mipi media a simthei.