Ralhrang ralkap hotu Min Aung Hlaing cun a kuthnuai ih cozah hnatuan mipum 2841 pawl cu daan thar vekin pension nan si thei lo tin an hna ciar a tuanter bet.
Thuneihnak atcilhtu Min Aung Hlaing cun thuneihnak ken vivo a duh ruangah cozah hnatuan mi pakhat cu kum 60 a kim le a hna in a cawl ding timi dan cu kum 62 ah a tthan ih, cucu tu ah a fehpi cih hngal. Cutikah, tui kum ih cawlh ngah ding cozah hnatuan 2841 pawl khal Min Aung Hlaing cun cawlh a siang lo ih, hna a tuanter peh hai.
Thuhla theitu cun “Tui kum ih cawlh la thei ding pawl a hlan vekin cawlh pension an dil ih, pek an rak si lamlam lo. Anmah cu kan cawl zik pam tin mipi lamtang lo tlangpi an si. Sumpai duh le pension duh in hna an tuan peh,Asinan tu ahcun an duh vekin an cawl thei lo ih, kum 2 tuan bet dingin theihter an si,” tin a sim.
CDM pakhat cun “Kannih cu uknak tha lo kan do ruangah, pension tivek khal kan ruat lo. Ralhrang hnuaiah pension khal kan beisei lo hrimhrim. Curuangah, kan hrangah danglamnak ciamco a um lo. Mipi in nehnak kan co tikah kannih cun daan vekin pension kan ngah leh men ding a si,” tin a sim ve.
Bomb Palpuak Ih Thi, 100 Tlun An Um Zo – Tui kum sung lawngah Myanmar ram sung hmun tinkim in ralhrang kammi bomb palpuak ngah mipum 100 an um thlang tin hminsin tuahtu pawl cun thu an suah.
Ram sung buainak ah ralhrang cun hmun tinkim ah bomb an kam ih, bomb puak hrih lo cu Rakhine ramkulh sung le Shan ramkulh sungah a tambik ih, ralhrang in thuneihnak an lak hnu ahcun Sagaing ramthen, makui ramthen, Kaya ramkulh,Karen ramkulh, Kachin ramkulh le Chin ramkulh pawlah ralhrang in bomb an kam tam.
Hivek ruangah Rakhine ramkulh sungih raltlan pawl khal tutiang an khua ah tlung ngam hrih lo an tam. Khua ih tlungsal pawl khal bomb thainfainak an neih fel zonak hmun pawl an si. Hivek in Sagaing ramthen sung khalah ralhrang kammi bomb palpuak ngah ruangah thi an tam.
Bomb palpuak ngah lakah nauhak khal an tam. Ahleice in lo hnatuan pawlin ralhrang kammi bomb an palpuak ngah tlangpi ih, hrekkhat cu a hmun ih thi an um bangin hrekkhat cu sizung ih thi khal an um.
2022, tui kum lawngah ralhrang kammi palpuak ngahmi thi mipum 100 an kim zo. Cuhman, 2022 January thla in March thla tiang lawng cazin an lakmi a si hrih.
Leave a Reply